Addis Ababa:– Tayxe rosu dirinni 526 kumi ali rosaano tekiniikenna ogimmate qajeelsha karsantanno yine agarrannita Loosunna Dandoote Ministere egensiissu.
Loosunna Dandoote ministere 2017M.D tekiniikenna ogimmate qajeelsha e`nanni guma tenne lamala giddo faajje assitino.
Ministerete tekiniikenna ogimmate handaari ministir deeti Teshaale Berreecha (Dr) xawisino garinni; e`nanni guma 2016M.D 12ki kifile gobboomu fonqolo adhitino rosaano hedote giddo woratenni murroonniha ikkanna owaatannohuno 2017 qajeelshu diri geeshshaatilla.
Konni garinnino deerra I na II borreessantanno qajeelaano 12ki kifile gobboomu fonqolinni labballu 141 na hakkunni woro, seennu 138 na hakkunni woro abbitinoreeti.
Lophitanni noo qoqqowubbaranna baatto loosidhe galtinori qooxeessubbara labballoho 137nna hakkunni woro, seenneho 134nna hakkunni woro, baalunku qoqqowira bisu muso noonsari 124nna hakkunni woro abbitinore ikkinotano xawisino.
Deerra sasunna shoolunni borreessantanno 12ki gobboomu fonqolinni labballu 142nna hakkunni ale, seennu 139nna hakkunni ale abbitinore ikkansa egensiisino.
Lophitanni afantanno qoqqowubbaranna baatto loosidhe galtinori qooxeessira labballoho 138 na hakkunni ale, seennu 135 na hakkunni ale borreessiissinoreeti.
Deerra V (ontunni) qajeelanno labballi 179 na hakkunni ale, seennu 170 na hakkunni ale borreessiissino rosaano qajeelsha adhate hasiisanno bikkaancho wonshitinore ikkitanna lophitanni noo qoqqowubbanna baatto loosidhe galtinori qooxeessira labballu 167 na hakkunni ale, seennu 162 na hakkunni ale hattono baalunku qoqqowinni bisu muso noonsari 154 na hakkunni ale borreessiissinori deerra ontunni e`e qajeela dandiitannota Ministir deetu huwachishino.
Ministir deetu babbaxxino qajeelshu daninni tekiniikenna ogimmate qajeelsha e`ara dandiitanno qajeelaano batinyi 526 kume 683 ikkanno yine agarrannita xawisinoha ikkanna; sa`u dirra gadubba kaiminni uurrinshu qajeelshinni borreessante qajeeltanno yine agarranni qajeelaano mereerinnino xibbuunni 30% ikkitannori harammaadda qajeelshu progiraamenni qajeeltara dandiitanno yine hedote giddo worroonnita huwachishino.
2016 rosu dirira albaanni 12ki kifile gobboomu fonqolo adhitino rosaano konni qajeelshu dirinni tekiniikenna ogimmate qajeelsha e`e qajeela hasidhuro qajeelshu dirira murroonni bikkaanchi garinni dukkisantannotano lede xawisino.
Abbebech Maatewoos
Bakkalcho Birra 14, 2017 M.D
