Addis Ababa:- Qoqqowunna gobboomu horo noonsa sirnyuwa badatenni harinsanni hee`noonni gobboomu amaalamme harinshonni baalunku yawosi fula hasiissannota Itophiyu gobboomu amaalamme komishiine qaru komishiinerchi piroofeeser Mesfin Ariaya huwachishi.
Itophiyu gobboomu amaalamme komishiine Somaalete qoqqowira Jigjigu quchumira hajo la`anno bissawiinni sirnya gamba assate amaalammete bare harisate aana no.
Sirnya gamba assate amaalammete harinsho aana afaminohu Itophiyu gobboomu amaalamme komishiine qaru komishiinerchi piroofeeser Mesfin Ariaya coyi`rino garinni; komishiine lowo geeshsha qara ikkitino hajubbanni sumuu yaa hoongete qarrubba badde amaalammetenni mala abbate uurrite loosu giddora e`ino.
Gobbankera amaalammete harinshora injaanno loosu amanyoote qixxeessite, gobbate 1 kumi ali woradda amadde beeqqaano badatenni xaa yannara qoqqowunna quchumu gashshooti sirnya gamba assate amaalammete gafa aana iillitino yiino.
Komishiine qoqqowunna quchumu gashshoottara sirnya gamba assate amaalammete gafa Addis Ababu quchuminni hanaffe, Benishaangulete, Gaambeellaho, Hararete, Mereerimi Itophiyira, Sidaama, Affaarete qoqqowira hattono Dirredaawu quchumi gashshootira hajo la`anno bissa amaalatenni sirnyuwa angara adhitinota xawisino.
Sa`u sanyote barra birra 4/2017 M.D hanafe qole Sumaalete qoqqowira lawino garinni sirnya gamba assate amaalammete harinsho harinsanni afammanni yiino qaru komishiinerchi.
Qoqqowoho Jigjigaho, Goodenna Doolo Addo mereershuwara birra 4-6/2017M.D geeshsha 1 kumi ali dagoomu riqiwaano amaalatenni sirnyuwansa badantanno gede assa dandiinoonnita egensiisino.
Sasunku mereershira noo amaalammete barenni dagoomu riqiwamaano noonsa beeqqo lowontanni maala`linannita ikkitinota buuxa dandiinoonnita xawise; konnirano komishiinete su`minni galatasi shiqishino.
Sa`u lamala giddo hanafantinotanna doorantinore 100 dagoomu riqiwamaano lede poletiku paartuwa, mootimmate riqiwamaano, addi addi maamarranna uurrinshuwa hattono xiiwo kalaqqanno hallanyooti riqiwamaano beeqqitannoti sirnya gamba assitanno amaalammete gafaati yiino.
Aantaano sase barrubbara hajo la`annonsa bissawinni sirnyu hedo gamba assate harinsoonni amaalammete harinshonni aleenni xawinsoonni onte hajo la`annonsa bissanni doorantinori 1 kumi 200 ali riqiwamaano beeqqitinota xawisino.
Riqiwamaanono qarunni gobboomu amaalammete songonni beeqqitanno riqiwamaano doortanno; qoqqowunna gobboomu horonsa luphi yitino sirnyuwano badde komishiinete uytannoha ikkanno yiino.
Amaalammete harinsho lowontanni qara ikkitino hajubba bandanni gafa ikkasenni dagoomu riqiwamaanonna hajo la`annonsa bissa baqqeenyunni beeqqatenni qoqqowunna gobboomu horo noonsa sirnyuwa badatenni hananfoonni gobboomu amaalamme harinshonni malaate`ne wortinanni gede qummeesseemmo yiino.
Jigijigaho harinsanniti Somaalete qoqqowi sirnya gamba assate amaalammete gafa qoqqowunna gobboomu horonsa luphi yitino sirnyuwa bandannita ikkitanno gede hexxo assi`rannota xawisino.
Abbebech Maatewoos
Bakkalcho Birra 14, 2017 M.D
