Addis Ababa:– Afriku lekkate kuwaase konfedereeshiine (CAF) Itophiyu shiqishinota Afriku boowe qixxeessate xa’mo haadhe kaajjishshanno gede IFDR Pirezidaantichi Taayye Atsqesilaase xa’mino.
46ki CAF uurrinshu xaphoomu gambooshshe tenne lamala giddo Addis Ababaho hananfi yannara hawalle keerunni daggini yaanno hasaawa assinohu pirezidaant Taayye, CAF Itophiyu daga 2029 Afriku boowe qixxeessate xa’mo adhitanno gedenna kaajjishshanno gede xa’mino.
“Afrku daga mine’ne ikkino Itophiya hawalle keerunni daggini” yiinohu Pirezidaantichu; Itophiyu Afriku lekkate kuwaase giddo jawa sumuda afidhinotanna CAF 67 diri albaanni saffino gobbuwa mereerinni mitte ikkase kayisino.
Albihu (CAF) pirezidaantichi Yidneqaachw Tesemmahu Afriku lekkate kuwaase kalqete bare aana hasiissannose base afidhanno gede umisi qeecha fulinota qummeesse, Itophiyu Miliyoonetenni kiirranni lekkate kuwaase baxillaano gobbaati yiino.
Itophiyu konne Afriku lekkate kuwaasera nooseha dhaggete qeecha hedote giddo woratenni Ontu diri gedensaanni 2029ni Afriku boowe qixxeessate xa’mo shiqishshinota kayisino.
Itophiyu Afriku boowe horonsidhe Afriku lekkate kuwaase lossatenna Ispoortetenni gobba gatamarate loossannota coyi’rinohu Pirezidaant Taayye; Afriku boowe qixxeessate babbaxxino xawo gatamartanninna nooreno haaroonsitanni afantannota xawisino.
CAF Pirezidaantichi Patris Motisepe (Dr) uyino xawishshinni, Itophiyu shiqishinoti Afriku boowe qixxeessate xa’mo CAF noose loosu harinsho amanyootinni la’’antannota coyi’rino.
Itophiyu Afriku lekkate kuwaase giddo dhaggete qeecha afidhinotanna CAF safaancho miila gobba ikkase qummeesse; Itophiyu Afriku wolaphora luphiima qeecha fultino gobba ikkase kayisino.
“Itophiyu Afriku boowe qixxeessate xa’mo shiqishshinohu taalo yannanniiti” yiinohu Motisepe; Itophiyu daga lekkate kuwaasera noonsa macciishshammenna xaadooshshi luphiima ikkasi huwatannotanna kunino daga mitte assanno jawa dhuka ikkasi huwachishinno.
Xaphoomu ministirchi dokter Abiy Ahimedihu Itophiyaho gatamarranni hee’noonni xawubbanna ispoortete base daa’’atisiisinositanna laino coyinnino hagiidhinota lede kulino. Itophiyu CAF uurrinshu xaphoomu gambooshshe garunni qixxeessitinnota xawise; Itophiyu daga wosincho adhate budensano dhaggeeffatino.
Itophiyu barrubbate albaanni 2029ni Afriku boowe qixxeessate CAFra faajjetenni xa’mo shiqishshinoti qaangannita ikkitanna; IFDR xaphoomu ministirchi Abiy Ahimed (Dr); CAF xaphoomu gambooshshira Itophiya daggino gaamora gashshootu mine hurbaatu koyishsha assi yannara coyi’ranni; Itophiyu 2019ni Afriku boowe qixxeessate dhuki nooseta coyi’rino. CAF loosu gumulsaano komite miillano gatamarranni hee’noonni biheraawe xawo daa’’atisiisihu gedensaanni borrote minesi hasaawino.
CAF pirezidaantichi Patris Mutisepe (dr) hurbaatu koyishshi aana coyi’ranni; Itophiyu assinonsa koyishshira galata shiqishe; Itophiyu budi, hornyinna wosina adhate amanyooti “Itophiyu minenke ikkinota maciishshamannonke gede assinonke” yaatenni coyi’rino.
CAF Itophiyu xa’mo lainohunni aanino diro Moroko harinsanni xaphoomu gambooshshi aana muro sayinsanni yine agarranni.
Qiddist Gezzaheny
Bakkalcho Birra 14, 2017 M.D
