Addis Ababa:- BRICS kalqoomunniha duucha bissa amanyoote buuxisiissanno mootimmuwate buusamme uurrinshaati yaanni Xaphoomu ministirchi Abiy Ahimed (Dr) coyi’ri.
Xaphoomu ministirchi Ruusiyaho Kaazaani quchumira harinsanni hee’noonni 16ki BRICS miilla gobbuwa songora leelle assino hasaawinni; songo duucha bissa kalqoomu amanyoote loosu aana hosiisatenni xaaddannonsa qarrubba gutunni tidha dandiitanno hexxo noota leellishshannote yiino.
Itophiyu haaro BRICS miila ikkasenni taalo ikkino garinni lophitinonna lophitanni noo gobbuwa mereersinoha duucha bissa halamme dhaabbattanno gede assate loossanno yiino.
Kalqenke duucha bissa halamme hasidhanno haammata shetto giddo sa’anni noota ikkase kayse; baxxinohunni, lophitanni noo gobbuwa lopho taalinokki kalqoomu womaashshu korkaatinni jifantanni afantannotano Xaphoomu ministirchi Abiy Ahimed (Dr) bero songote xawisino.
Kalqoomu miinju hanqafo giddo duuchanko taalinokkiri heera lophitanni noo gobbuwa miinji aana badooshshu, waagu oolto hattono loosu hoonge qarrubba kalaqantanno gede assitanni noota huwachishino.
Ledoteno, diilallote gadi soorro kalqe jiffanni noota ikkanna; diilallote gadi soorro woyyeessate hasiisanno womaashshinna adhinanni qaafubba lainohunni shiqqino xa’mubba kayinni xaa geeshsha dawaro afidhukkinni keeshshitinota duu’re kaysino.
Gaazeexu Odeessaanchinni
Bakkalcho Birra 14, 2017 M.D
