Tittiro
Addis Ababa:– Gobboomu amaalamme hasaawa sirnya gamba assate gafa babbaxxitino qoqqowubbara harinsanni afammanni.
Itophiyu gobboomu amaalamme komishiine Affaarete qoqqowira muli yanna giddo hasaawu sirnya gamba assate amaalammete gafa jeefissinoti qaangannite. Xaa yannara qole Somaalete qoqqowi hasaawu sirnya gamba assate amaalammete harinsho gumulanni afamanno.
Amaalamme mittimmase agarantino kaajjado Itophiya kalaqate dandiisiissanno harinsho ikkitinota haammata poletiku paartuwa xawissanno hajooti. Harinshote aana beeqqitinori qoqqowoho millissanno poletiku paartuwa riqiwamaano gobboomu amaalamme mittimmase agarantino kaajjado Itophiya kalaqate dandiissanno yitanno hexxo noonsata IPUra coyidhino.
Affaarete abiyootaawe dimokiraase paarte layinki murrichi Mehammed Awwol; paartete gede gobboomu amaalamme hasiissannota seeda yannara kayinsanni keeshshinoonni hajooti. Seeda yanna adhitinoti xa`monke soorrote mootimmanni dawaro afirasenni uminke qixxaawo assatenni amaalammete harinsho hanaffanno yanna quqquxxotenni agarranni keeshshinoommo yaanno.
Itophiyu daga mitto ikkite kaajjado Itophiya kalaqa dandiitanno gede hedubbanke mimmito lawa hasiissanno yitannotenni hasaawa agaransa buuxisannohu layinki murrichi; amaalammete bare fanantanna paartensa isi widoonni songote deerrinni hasaabbe qixxaaawo assite baddinota ajandu hedubba amadde shiqqinota huwachishanno.
Kalaa Mehammed huwachishino garinni; gobboomu amaalamme hasiissinohu qaru korkaati mittimmanke agarre kaajjado Itophiya kalaqateeti. Amaalamme baalunku dagoomu kifillanni fultino bissa xaadde qajeeltino doogonni hasaabbe gobbatenna dagate injiitanno sumumme aana iillitanno gede assitanno.
Paartesi kaajjado Itophiya safate loossannota buuxisinohu layinki murrichi; konni hasaawinni diammanneemmo yite gattino paartuwa huluullonsa badhera aguratenni qarrubba tidhantannohu shinqe hasaawatenni ikkinohura amaalammete widira daa hasiissannonsa yaanno.
Affaarete wolassaancho paarte loosu guutisaano miili Ahimed Hasen isi widoonni; gobboomu amaalamme qoqqowu gede Affaarete dagara gobbate gede qole baalante Itophiyu dagara kaa`lo assitannotaati coyi`rinohu.
Baxxinohunni, xaa yannara noo qarrubba tiratenni gobbanke diigamate danonni woxxite daganke mittimmatenni heedhanno gede assitanno yee huwachishanno.
Keeru daannohu ge`ino doogonni dimokiraasaawe hasaawa assine sumuu yaa dandiinirooti. Amaalamme gobbanke qarri mamiichooti yitannota bande madase xagisa dandiinannita leellishshannonna sai gashshootu amanyooti kalaqino bassuwa wirro kalaqantannokki gede gari raga wortannota ikkitanno yine agarreemmo yaanno.
Affaarete qoqqowira assinoonnita hasaawu sirnya gamba assate harinsho paartesi beeqqisaanchonna dimokiraasaawe ikkase buuxxinota coyi`rinohu Ahimed; ninke gobbankeha xissote malaateeti yineemmoha bandenna amaalle ajandanke sayinsoommo yee coyi`ranno. Kunino wolootta qoqqowubbanni gamba assinanni ajandubba ledo karsine gobboomu amaalamme assine gobbanke qajeellete gottimma aana worate dandiissanno harinsho assineemmo gede kaa`lannonke yee hexxo assireemmo yiino.
Argobbu dimokiraasaawe millimmo paarte massagaanchi Jemaal Hasen isi widoonni; gobbanke lossatenna keeru dirranno gede assate gobbate deerrinni calla ikkikkinni woradunni hanafe noo gashshootu tantanubba riqibbanno dagoomu kifillanna hajo la`annonsa bissa beeqqitanno amaalamme harisa hasiissanno yaanno. Xa Itophiyu gobboomu amaalamme komishiine harissanni afantannohu konne dancha looso ikkasinni irkisa hasiissannota huwachishanno.
Gobboomu amaalamme gobbankera keeru dirranno gede assitanno yite ammantannota xawisannohu paartete massagaanchi; amandoonni doogonni amaalammummoronna hasaambummoro dancha deerra iilline qarrubbanke tidhineemmo yee coyi`ranno.
Xaphooma hananfoonniti amaalammete harinsho kaajjado gobba heedhankeranna woyyino deerri widira luphi yineemmo kaayyo uytanno yitanno hexxo noosita xawisanno.
Qoqqowinke gobboomu amaalamme assanno beeqqo baalanta dagoomu kifillanna hajo la`annonsa bissa beeqqissinota ikkitanno gede ikkado qixxaawo assine hasaawu sirnya gamba assate amaalammete bare dancha doogonni gumulloonni yaanno.
Qoqqowinkera millissannoti hewisamaano poletiku paartuwano uminsa ajanda shiqishshe hasaawanna amaale assitino yaannohu qole Affaarete qoqqowi zoone mittete jireenyu paarte borro mini sooreessi Naasir Mehammediho.
Gobboomu amaalamme konni albaanni nookkita umi yannara afi`noonni kaayyo ikkitinota kayisannohu paartete borrote mini sooreessi; konni albaanni qansootu hedonsa wolaphotenni dukkissanno doogo heedhunsakkinni gatasenni babbaxxino doorshubba giddora e`ino akati noota qaagiissanno.
Amaalamme haadhe dagginota hiittenne hedono kursete ofolline tira dandiinanni doorshaati. Amaalamme xaara hanafote harinsho aana afantannota ikkiturono xaa geeshsha leeltanni noo harinsho jawaachinshannite yaanno.
Amadisiiseno; gobboomu amaalamme bayiriidi seera lede babbaxxitino hajubba aana addi addinninna gutunni ka`anno xa`mubba aana hala`ladunni hasaawa assine hasaawu harinshonninna dagate huuronni dawaro afidhannota ikkase buuxissanno. Amaalammete gedensaanni gobbate gede amande hodhineemmoti gutu hedonna laooshshu hee`rannonke yitanno hexxo noonke. Gumunnino gobbanke hodhitanni afantanno lophote doogo aana rahotenni qaaffanno gede waalchu fanamanno yite hedonsa jeefissino.
Abbebech Maatewoos
Bakkalcho Birra 7, 2017 M.D
