Addis Ababa:- “Itophiyu Baandeeri gobbate utuwimmara baantoonni duuchu dagoomi mittimma malaate, taalleenyanna wolambinate leellishannoho yiino; IFDR Pirezidaantichi Taayye Atsiqesillaase.
Gobboomu deerrinni 17ki yannara “Baandeerinke gobboomu mittimmankera; utuwimmankeranna Itophiyu gottimmara” yaanno adawarshinni ayirrinsoonni.
Gobboomu Baandeera tiro afi’rino garinni ayirrisa gobbate mittimmara, utuwimma hegersatenna qara kaima ikkinotano pirezidaantichu huwachishino.
Itophiyu duuchu dagoomi budi, Afuubba, amma’no, hedubba hattono baca kalaqamu jiro nooseta ikkase seekkine huwatatenni gobboomu Baandeeri hundaanni gutunni gamba yaa hasiissannotano qummeessino.
Duuchu dagoomi mittimma kaajjishatenni kaajjado mootimma safanna Itophiyu gottimma kaajjado safo aana xinta dandiinannihu Baandeera gotti assatenni hattono bobbankoommo handaaranni kaajjine loosatenni ikkinotano hattonni.
Bire hundinni kayisse Itophiyu bareedda techo geeshsha mundeensanni, miqichinsanni, hattono lubbonsa kakkaltanni gobbanke wolambinatenna utuwimma agarsiissanni daggino yiinohu Pirezidaantichu; xaa ilamano egennonsanni, ogimmansanninna hunkiinsanni gobba latisanna lossa agarantannonsata huwachishino.
Itophiyu keere, latishshanna hegeraamimma ayirrisiisate waaga baattanni afantannore gobbate gargarooshshu olanto, ga’labbote bissa, latishshunna lophote bissa baala ayirrinyu hasiisannonsa yiino.
Gobbate keere booreessatena duumballicho hedonsa filiqqisate wo’naaltannore hunote bissa assootinsanni eemarantanno gede assatenni Baandeeru ayirrinyira gutunni uurrine dhaggete yawonke fula noonke yaanni qummeessino.
Ilama hananfoonnita gobboomu miinju, dagoomittenna poletiku woyyeesso guuta ikkino garinni gumulantanno gede qeechansa fula hasiissannotano hattonni.
17ki Baandeeru ayyaana gobbate duuchante qooxeessubbara iibbadu garinni ayirrinsoonni.
Duuchante qoqqowubbarano konne ayyaana “Baandeerinke utuwimmanke xawishshaati!”, “Baandeerinke duuchu dagoomi mittimma leellishannoho” yitannonna wolootta sokka sayisatenni ayirrinsoonni.
Gobboomu Baandeeri barra sa’u 16 dirrara diru dirunkunni Birra agani umikki lamalara babbaxxitino massagote hedubbanni ayirrinsanni keeshshinoonniti qaangannite.
Amsaalu Felleqe
Bakkalcho Birra 7, 2017 M.D
