Addis Ababa:- Sa’u onte dirrara Itophiyaho dirunni laashshinanniha Bunu laalchi bikka 500 kume toone noowinni erotenni lossa dandiinoonnita Xaphoomu ministirchi Abiy Ahimed (Dr) coyi’rino.
Maakiro Ikkonoomete woyyeesso harunsite sa’u lame agannara gobbaydi dikkora sonkoonni Bunu laalchinni sa’u dirranni roore luphiima eo afi’noonnitano xawisino.
Xaphoomu ministirchi tenne yiinohu sa’u muli barrubba giddo gobboomu Bunu reqecco harinsi yannara handaarunni bobbakke luphiima gobbaydi woxu soorro gobbatenni qaddo ikkitino bissara afansha uyi yannaraati.
Itophiyu Bunu laalchinna gobbaydi dikkora sonkanni daddali gumulshinni woyyaawino qeecha fultinori loosidhe galtinorira, Buna sokkannorira, maamarrate hattono qoqqowubbate afanshanna baraarsha uyno.
Tenne yannara xawisino garinni; sa’u onte dirrara Bunu laalchi isilanchimma lexxitanno gede jawa illacha tunge loonsoonni.
Baxxinohunni, woyyaabbinonna luphiima laalcho aa dandiitanno Bunu chigginye kaashshinna geedhinonna laalcho aannokki Buna mukkate ragaanni illachunni loonsoonnita qummeessino.
Konninni, Itophiyaho diru giddo laalshshinannihu Bunu bikki sa’u onte dirrara albaanni 500 kume toonera noowinni 1 miliyoone toone widira lossa dandiinoonni yiino.
Handaarunni afi’nanni eo ragaannino sai dirira gobbaydi dikkuwara sonkoonni Bunu laalchinni 1.4 biliyoone doolaare ale eo afi’ra dandiinoonnita kayse; amandoonni baajeettete dirinnino tenne kiiro 2 biliyoone doolaare widira lossate illachinshe loonsanni hee’noonnita egensiisin.
Itophiyu Bunu afamino gobba calla ikkitukkinni kalqete deerrinni Buna luphiimu deerrinni laashshitanno gobbuwa mereerinni mitte assate hananfoonni loossa kaajjite suffannotatano coyi’rino.
Tenne ajuuja loosunni adda assateno mootimmate waatira Buna gobbaydi dikkuwara sokkannori Bunu laalchi isilanchimma nooha ikkanno gede dandiisiissanno woyyaabbino hayyo horoonsi’ranna agarranninsa qeecha fula noonsata huwachishino.
Buna gobbaydi dikkuwara sokkannori biifadu garinni qixxeessite woyyaawino waaga afi’nanni garinni soyaate illachisha noonsatano qaagiissino.
Wole widoonni, maakiro Ikkonoomete woyyeesso Itophiyu duuchunku handaarinni kalqoomu dikkuwara roorenkanni beeqqaancho ikkitanno gede assannota coyi’rino.
Miinju gashshooti woyyeesso harunsite sa’u lame agannara gobbaydi dikkuwara sonkoonni Bunu daddalinni albaanni sa’u dirranni luphiima eo afi’ra dandiinoonnita xawisino.
Aantanno yannarano xaaddara dandiitanno jiffa gufissukkinni baalante latishshu handaarranni Itophiyu jireenya adda assate mootimmanna dagano halante loossannota coyi’rino.
Gobbaydi dikkowara Bunu laalcho soyaatenni qaddo ikkinohunna sa’u muli barrubba giddo qixxaawote kifilenke ledo keeshsho assinohu Karaamo Buna Sonkanni Uurrinsha Safaanchinna Ha’nura ikkinohu Kalaa Niguse Gammadihu tenne hajo laise kaysino hedonni; urrinshansa isilancho dooramino Buna kalqete dikkora shiqishatenni 2012M.D umikki deerra fultino.
Aaneno 2013M.D-2015M.D geeshsha uurrinshansa danchu garinni qixxeessite sokkinotanna 2016M.D sonkoonnihunnino 4 miliyoone doolaare ale gobbaydi woxu soorro afidhinota coyi’ranno.
Sa’u shoole dirrara aante aantetenni harinsoonni heewonni gobboomu deerrinni Sidaami Buni umikki deerra amade keeshshinota kaysino.
Qooxeessaho loosidhe galtinori Buna isilanchimmatenni laashshitanno daafira ninkeno woyyaawino waaginniiti Insawiinni hidhineemmohu yiinohu kalaa Niguse; Mootimmateno agarranninke giwire baanteemmo yiino.
Kalqoomu deerrinni Itophiyu Buna hidhate hasidhannori kiiro diru dirunkunni lexxitanni daggino yaannohu kalaa Niguse; tayxe dirinnino Itophiyu Bununni 1.4 biliyoone doolaare gobbaydi woxu soorro afidhinota qummeessino.
Amsaalu Felleqe
Bakkalcho Birra 7, 2017 M.D
