Addis Ababa:- Gobbanke bayirroonye kaajjado safo aana uurrisatenna mittimma hegersate ilama gadacho nooseta Pirezidaantichu Desta Ledamo coyi’ri.
Pirezidaantichu tenne yiinohu 17ki gobboomu Baandeeru barra tenne lamalara ayirrinsi yannaraati.
Baandeeru barra ayirrinseemmo woyte gobboomu bayirroonye luphi assatenni, mittimmanke kaajjishatenninna buxima dhagge assate bareendetenni sharramatenni ikka noosi yiino.
Pirezidaantichu kalaa Desta coyi’ranni; Baandeeru mitte gobba bayirroonyi xawishsha ikkasinni barra ayirrinseemmo woyte bayirroonyenke kaajjishatenna baandeerinke ayirrinye luphi assate ikka noosi yee; Bandeeru yaa bayirroonyeho, ayirrinyeho, wolaphote. Konni daafirano gobbanke bayirroonye kaajjado safo aana uurrisate ilama umose kakkalatenni gobbanke mittimma agarate gadacho noose yaanni huwachishino.
Gobboomu bayirroonyira jawa waaga baattanni keeshshitino qansootinkera jawu ayirrinyi hasiisannonsa yiinohu Pirezidaantichu; baandeerinke ayirrinye agaratenni buxima dhagge assate assinanni wo’naalshira baalunku qansichi qeechasi fula noositano sokkasi sayisino.
Qoqqowu amaale mini songaafitte dukko Faantaye Kebbede ise widoonni; 17ki Baandeeru barrira hawalle iillishi’ne yitanno sokka sayisse; hiikku manchino baandeerinke ayirrinye luphi assate yawonna gadacho noosita xawissino.
Duuchu handaarinni gobboomu yawonke fula hattono danchu gashshooti qarrubbanna baincho assootubba sharrama gutu yawo ikkitinota huwante kaajjine loosa hasiissannotano coyidhino.
Mundeetenninna miqichunni agarame keeshshino Baandeeri ayirrinyenna bayirroonye roorenkanni kaajjisha dandiinannihu bobbankoommo loosu handaarinni loosonke jawaantetenni gumullummorooti yitino.
Baandeeru barri gobboomu amado noonsa babbaxxitino sokkuwanni ayirrisamino. “Itophiyu yannate jiffa xaadduserono qeelte sa’anno, oosose kakkalooshshinni Itophiyu mittimma kaajjite suffanno; bareedda gobbate gargaroshshu olanto bayirroonyinke malaateeti, Bandeerinke daganna dagoomu mittimma xawishsha, mittimmanke gutu malaate hattono baandeerinke kaajjado gobbate mootimma ijaarshira” yitanno 17ki baandeeru barri sokkuwa mereero afantanno.
Gaazeexu Odeessaanchinni
Bakkalcho Birra 7, 2017 M.D
