Addis Ababa: Sidaamu qoqqowira amandoonni baajeettete dirinni 100 kume sa’anno wedellira loosu kaayyo kalanqannita qoqqowu pirezidaantichi Desta Ledamo xawisi.
Qoqqowu loosunna dandoote interpirayize latishshi biiro 2017 handaari songora leellatenni pirezidaantichu kalaa Desta Ledamohu coyi’ranni; qoqqowo noo wolqanna doorshubba horonsi’ratenni wedellunnita loosu kaayyonna ikonoomete horaammeeyyimma halashshate illacha uyinoonni.
Konni dirinni wedella loosu giddora eessatennino sainohunni loosu aana noore irkisatenni jiroo’mate widira sa’anno gedenna industirete giddora e’anno gede assate loossa loonsannita coyi’rino.
Harunsitino horaameeyyimmansa buuxisiisate egennotenni massagantinota loosu kaayyo kalaqa illachu faasho ikkase qummi asse; tekiniketenna ogimmate uurrinshubba noonsa qeecha fultanno gede gamba/ xaadde doogonni loossannota xawisino.
Qoqqowoho tekinolooje hegersatenni, dandiisatenninna sayisatenni ikonoomete lopho jawaachishate kaa’litannore haaruudde tekinoloojubba egensiisannohu qoqqowo mereersino amaale mine uurrinsannitano xawisino.
Konninnino haaro dijitaale ikonooome hanqafo garinni latishsha halashshatenna qoqqowunnita ikonoomete lopho jawaachishannohu gumaamu loosi loosamanno yiino.
Qoqqowu loosunna dandoote interpirayize biiro sooreette baabba HagereTsiyon Abbebe ise widoonni xawissino garinni; dandoo noosihu, ikkado ikkinohunna laooshshisi biife soorramino qansicha loosu giddora eessate tekiniketenna ogimmate uurrinshubba ledo mitteenni loonsanni he’nonni.
Koleejete qaru loosinnino sainohunni dikko illachishinoha babbaxxino qajeelsha aatenni wedelloota loosoho ikkadda assitanno gede assinanni hee’noonnita kultino.
Biirote sooreette xawishshi garinni; baajeettete dirinni kalanqanni loosi kaayyora 400 miliyoone birri liiqoote shiqonna 500 hekitaare sa’anno baatto qixxaabbino.
Hallanyu handaari ledo noo harinsho kaajjishatenni loosiisaanchonna loosaancho xaadisa, dijitaale ikonoome seekkate qajeelsha aatenni hedo kalaqa diroho amandoonni mixo giddonni qara qara ikkitinoreeti yitino.
Barete beeqqaano giddonni Hawaasi Polii Tekinikete Kolleeje diine kalaa Melkaamu Baraasa umisi widoonni; qoqqowu mootimma mixidhinota daandoo illachishshino loosu kaayyo kalaqate looso kaa’late kolleeje umise widiidi qeecha fultanni noota xawisino.
Wo’manna harancho yanna qajeelshubba ikkadonna hettisamaano qansoota kalaqatennino sa’e industirete ekisteenshine pirograamera interpirayizoota irkisatenna tekinolooje sayisate looso loossanni noota xawisino.
Konninnino tantanantino interpirayizooti riqiwaano laalo laashshate widira e’anno gede kaa’latenna gobbayidi gobbuwa loosira wedella qixxeessate loosino loosamannota xawisino.
Barete 2016 baajeettete dirinni woyyaabbino maareekko borreessiissino uurrinshubbara afansha uyinoonniha ikkanna; dagganno yanna faasho aanano hasaawa assinoonni yaanni IZA odeessino.
Gaazeexu odeessaanchinni
Bakkalcho Wocawaaro 30, 2017 M.D
