Addis Ababa:- Dagate riqiwaanonna Federeeshinete amaale minna assitino 4ki diri loosu yanna fanote songora gobbayidi hajo ministircho ikke loosanni keeshshinoha Ambaasaadder Taayye Atsiqesillaase IFDR pirezidaante assite mootoonsitu.
6ki dagate riqiwaano amaale mininna Federeeshinete amaale mini shoolki diri loosu yanna songora eote qixxaawora; gobbayidi hajo ministircho ikke loosanni keeshshinoha Ambaasaadder Taayye Atsiqesillaase pirezidaante asse mootoonsino.
Ambaasaadder Taayye mootoo’minohu onte huuro aate ruxxeessinninna roorima huuronni ikkanna; qaalu sheemaateno eino.
Hakko barrano loosu yannase jeefissinoti albi pirezidaantitte Sahileworqi Zewude haaru mootoo’mihura gobbanniha bayiriidi seera sayisse uyitino.
Haaru dooramaanchi lamunku amaale mini 4ki diri loosi yanna mittimmate gambooshshi fa’namasi kule pirezidaantimmate mootoommesi looso hanafino.
Amaalete minna afii fano aana nabbamboonniti dhaggesi huwachishshannonte gede; pirezidaantichu Ambaasaadder Taayye Atsiqesillaase ilaminohu Debarqi Aliyye Gondereraati. Umikki digiresi Addis Ababu Yuniversitenni poletiku sayinsenninna kalqoomu xaadooshshinni afi’rino.
Ingiliizete afantanno Sankister Yuniversitenni kayinni kalqoomu xaadooshshinninna istiraateeje xiinxallonni layinki digiresi afi’rino. Babbaxxitino gobbuwanni harammaadda kalqoomu xaadooshshinna poletiku sayinse qajeelshootanna korsoota adhino.
Gobbayidi hajo ministeerenni Awuropu biddishshi handaari, Galchimi Awuropira qaru handaari sooreessa, mashalaqqete/ informeeshinete lekkisaancho dayirektercho, Sitokiholm IFDR embaase amaalaanchimmatenni, Waashingitenete IFDR embaasera amaalaanchimmatenni loosasi qummi assinoonni. Ambaasaader Taayye; Losi Anjelesete qonsila jeneraale, 1998 M.D kayinni wo’ma ambaasaader ikke mootoo’mino.
Losi Anjelesete wo’ma Ambaasaadderimmanni mootoo’me qonsilu borro mini sooreessa, Awuroppahonna Ameerikaho hajubbate dayirekter jeneraale, 2008 MDnni kayinni gobba hajo ministeere ministir de’’eeticha ikke loosino.
Gibtsete Itophiyunniha wo’ma mootoomme Ambaasaadderimmanni, halantino mootimma uurrinshira Itophiyunniha ha’nura soqqamaanchimma woshshamaanchikke loosino. Xaphoomu ministirchira gobbayidi hajubba poolise amaalaancho ministircho ikke loosino.
Ambaasaader Taayye IFDR pirezidaanticha ikke mootoo’masira albaannino gobbayidi hajo ministircho ikke loosate aana noonkanni.
Demmellaash Demmeqe
Bakkalcho Wocawaaro 30, 2017 M.D
