Hawaasa:- Sidaamu qoqqowira 7ki doyicho womaashshu sekitere songo tenne lamalara harinsoonni.
Sekiterete songo,qoqqowoho womaashshu bu’a garunni massagatenni duuchu handaari jireenya buuxisiisate illachishshinota ikkaseno xawinsoonni.
Songote leelle hasaawa assinohu Sidaamu qoqqowi Jireenyu paarte sinu borro mini sooreessi kalaa Abirahaam Maarshaallo coyi’rino garinni; qoqqowo womaashsha horoonsi’nanni hayyo gummaame ikkitanno garinni halashsha hasiissanno.
Qoqqowoho amandoonniti Jireenya buuxisiisate ajuuja garunni timo gantanno gede noota boode jiro garunninna yinoonni illachira horoonsi’ra hasiissannotano huwachishino.
Sa’u dirrara handaarunni loonsoonni loossanni guma maareekkisiinsanni dangoonnita kaysinohu kalaa Abrahaami; qoqqowoho eote bu’a garunni horoonsi’ne agarranni eo gamba assanna afi’noonni jiro xawadimmanna xa’mamaanchimma noo garinni massaga dandiisiissanno hayyo kalanqoonnita coyi’rino.
Gamba assinanni eo womaashshu gashshooti wodhonna hayyonni massagatenni baincho assootubba gargarate loosi hiittenne yannarano aleenni illachunni massagama hasiissannota huwachishino.
Noonke miinjanna miinja burqissanno bu’a bade afa, anfoonni miinju bu’a ragunni horoonsi’ranna gamba assa hattono gamba assinoonni jiro hiittoonni horoonsi’ra hasiissanoro afa qara qara hajubba ikkitinota kayisinohu kalaa Abirahaami; hendanni hee’noommo ajuuja gobbanke lossate; konnira kayinni eote bu’a halashshatenna lossate yiino.. daggino jiro hiittoonni horoonsi’neemmoro buuxate odiitete seera lifixisate tekinolooje horoonsi’ra doorshu nookkiteno yiino.
Qoqqowu Fayinaansete biro sooreessi Araarso Gerremew (Dr) tenne yannara coyi’ranni; Biiro sa’u dirrara qoqqowoho deerru deerrunkunni womaashshu gashshooti wodhotenni hattono xalallenna xa’mamaanchimma noo garinni massagantanno gede illachunni loossanni daggino.
Fayinaansete seeri hanqafubbano loosu aana hosiisatenni haammata seyoo hattono woyyaawu gumi maareekkaminota qummeessino.
Womaashsha horoonsi’nanni amanyooti yannitte hayyonni irkisamanno gede assate hananfoonniti haammata loossa noota kayse; albillichono handaaru roorenkanni gummaamo ikkanno gede deerru deerrunkunni hajo la’annonsa bissanni ledo qinaambe loonsannitanna rahotenni tekinolooje loosu aana hosiisate loonsanni hee’noonnitano qummeessino Araaro (Dr).
Barete womaashshu handaarinni sai diri mixote gumulshanna amandoonni haaru baajeettete diri mixo lainohunni hala’ladunni torbinoonni.
Qoqqowoho sai dirira woyyaawa guma maareekkisiissinori womaashshu sekiterrara afanshano uynoonni.
Yaareed Geetaachew
Bakkalcho Wocawaaro 30, 2017 M.D
