Addis Ababa:- Itophiyu gobboomu amaalamme komishiine Itophiyaho heedhanno diyaspooru maamarrawinni gamba assinoonni amaalammanni sirnya artiist Zelleqe Gessesenna ogimmate gutamaanonni “Amaalammo” yaanno uminni loosantinota sirbu kiliipe oyimbarra angara adhitino. Komishiine Affaarete qoqqowira ajanda gamba assate harinshono tenne lamala giddo hanafisiissino.
Itophiyu gobboomu amaalamme komishiine qaru komishiinerchi Mesfin Araya (p/r) tenne yannara xawisino garinni; komishiine gobbate sumuu assitannokki hajubba amaalamatenninna qajeeltino doogonni tirate loossanni afantanno.
Gobbaydi gobbuwara heedhannota Itophiyu daga gobboomu amaalamme giddo qara beeqqaano assatenni loossanni afantanno yiinohu qaru komishiinerchi; konni albaanni Afrikaho, mereerimi soojjaatira, Awuropaho, Kanaadaho, Aliyye Ameerikinna wolootta gobbuwara heedhanno Itophiyu daga ledo gobboomu amaalemme komishiine ajuuja daafira 10 ale interneetete mashalaqqe xaaddonni hasaawa assinoonnita qaagiissino.
“Itophiyu hajora eessannoe yitanno ayee xa`mono digattanno” yiinohu qaru komishiinerchi; gobbaydi gobbuwara heedhanno Itophiyu daga gobboomu horo noonsa yitanno xa`mubba ajandunni qixxeessite gutunnino ikko hallanyunni komishiinete soyaa dandiitanno yiino.
Gobboomu amaalammera waaco ikkitanno ajandubba babbaxxitino qoqqowubbanni gamba assinanni keeshshinoonnita qaagiisse; tenne lamala giddo qole Itophiyaho heedhanno diyaspooru maamarrawinni gamba assinoonni ajanda angara adhinoonnita xawisino.
Gobbaydi gobbuwara heedhanno Itophiyu daga gobboomu amaalamme loossanni noo loosinna albillittete harinsho daafira huwanyo heedhansara hasiissannotanna baqqi yitino beeqqo assa noonsata coyi`rino.
Wole widoonni Addis Ababu diyaspooru maamari pirezidaantichi artiist Zelleqe Gessese “amaalammo” yaanno adawarshinni qixxeesse amaalammete komishiinera konni albaanni xorshantino huuro calla baraasinota sirbu kiliipe angara uynoha ikkanna; artiist Zelleqenna ogimmate guutamaanosira galata shiqishshino komishiinerichu.
Wolootta dagoomu kifilla konninni roso adhatenni loossanno agimmanni gobbanna daga owaata hasiissannotano coyi`rino.
Gobbate giddonna gobbaydi gobbuwara afantanno seesimurgote ogeeyye keeru daafira loosa qara yawonsa ikkitara hasiisannotanotano lede xawisino.
Addis Ababu diyaspooru maamari pirezidaantichi artiist Zelleqe Gessese isi widoonni; seesimurgo horoonsiratenni gobbate noo kiphuwanna sumimmete hoonge tirate keereho, baxillehonna mittimmate loosa hasiissanno yiino. Konninnino ogimmate gutamaanosi ledo ikkatenni dagoomu mereero keere, baxille, sumimmenna gobboomu mittimma xawisanno sirba loose Itophiyu gobboomu amaalammera oommo yee coyi`rino.
Seesimurgo dagoomu hincilaallo ikkasenni aanteteno wolootta seesimurgote ogeeyye konni loosinni beeqqitanno gede woshshatto shiqinsheemmo yee egensiisino.
Sirnya gamba assate harinsho Affaarete qoqqowira afantanno 49 woraddanni doorantino 800 ali dagoomu kifilla riqiwaano hattono qoqqowoho afantanno 700 ali poletiku paartuwa riqiwamaano, mootimmate riqiwamaano, babbaxxitino uurrinshuwanna maamarrate riqiwamaano hattono egennantino hallanyooti beeqqitanni afantanno.
Abbebech Maatewoos
Bakkalcho Wocawaaro 23, 2017 M.D Hamuse
