Qiddist Gezaheny
Addis Ababa:- Cancishaano HWHT gaamo kalaqqino oli aleenni donnanke aana illacha assite agartinori gobbaydi qansooti batinyeho yaanni Itophiyu donu eeggo maamari qaru loosu gumulsiisaanchi kalaa Meqoyya Maammohu egensiisi.
kalaa Meqoyya Maammohu Itophiyu Pireese Uurrinshara xawisino garinni; mannimmate kaa’looshshi su’minnino ikko babbaxxitino doogonni Itophiya e’inori gobbaydi qansooti baalunkunnihu illachinsa di-mittoho. Gamu HWHT hanaffino ola balba’lite muxxe donnanke xooqisate sharrantannore ikkansanni kaajjado harunso assa hasiissanno.
Itophiyu giddo afantannori batinyu amma’noteno ikko budu Donna wole kalqera afantannokkireeti yinohu kalaa Meqoyya; kipho kalaqanturo haja assite tenne Donna hasidhanni dagganno mulqaano heedhannota huwachishino.
Kipho donna babbaxxitino doogonni fushshate sharrantannorira roorenkanni injoo kalaqantannonsahura eannonna fultanno base baalantera hasiissannota qorophishshu qaafo adha hasiissanno yino.
Gobbaydi qansooti Itophiyu Donna afidhuro di-sa’anno; quqquxissannonsa yinohu kalaa Meqoyya; konni oli yannara dona xooqisa calla illacha assite millissanno bissano heedhanno. Olu aleenni donnanke aana illacha assite ikkito agadhitannori gobbaydi qansooti batinye ikkansano coyi’rino.
Kalaa Meqoyya xawishshi garinni; mannimmate irko su’minni e’inori gobbaydi qansooti mitootu illachinsa gobbaanni millissannoreeti. Kipho horonsidhe kaa’looshshu su’minni riqimbeemmokki donna xooqisate wo’naalansa digattanno. La’nummonte gede suuqetenni hidhinoommolla yitanno; ko darginni uyneennankeeti yite donna adhite fultara wo’naaltanna ayyerete doogora amadantinori batinyeho.
Tenne dago horonsidhe jajjanke adhate luphiima qixxaawo assitinno yine hendanni. Tenne danonni gatate baalunku qansooti hiikkunni qooxeessi doni uminsaha ikkinota huwatatenni huluullisanno coye la’uro hasiissannota qorophote qaafo adha hasiissannonsa yino.
Kaa’looshshu su’minni dagganni amma’note uurrinshuwano ikko maareekkote basera afantanno donnanke xooqissannokki gede ea fulansa seekkine agara hasiissanno. Baxxinohunni ayyerete doogo qorqorshi aana amma’note donna garunni bada dandaanno uduunnichonna ogeeyye gaamme kaajjado qorqorsha assa agarantannonsa yanna aana hee’noommo.
Babbaxxitino gobbuwara billaallitino donnanke hiittoonni qolsiisa noonke yine hendanna HWHT iillishshanno ganonni gobba giddo noo doni mooraho aamamino yinohu kalaa Meqoyya; gobbaydi wolquwa Donnanke afidhu hedeweelchonni gobbansa massite muxxe ikkino waaginni hirtanno. Hakkonni gobbaanni ninke woxeeti yite wolu illachira hosiissanno. Kuni qarri gobbate jiro gufisate geeshsha iillishshanno yaaddo kalaqinoho yaanni tini hajo noo derri huluullisannoha ikkasi duu’re xawisino.
Bakkalcho Woxawaajje 20/2013
