Addis Ababa:- Irreechu babbaxxitino ayimma giddo Itophiya leellishanno ayyaanaati yitu miti mitu Sidaamu qoqqowi wedelli.
Ayyaanu hornyubba kaima assatennino wedellu dagatenna gobbate mittimma hegersate mittimmatenni loosa hasiissannotano huwachishshino.
Sidaamu qoqqowi Woga Turizimenna Ispoortete Biiro loosaasincho ikkinohu wedellichu Asinaaqe Ayyele ayyaana laise coyi’ranni; Irreechu ayyaana sase dirrara diru dirunkunni basete leelle beeqqatenni ayirrisinota qaagiisse; ayyaanunnihu kaimisi Oromiyu daganni ikkanna; hornyisi mitte dagaha calla ikkikkinni hala’ladonna haammata dagarano ikkannoho yaanno.
Xaa yannara hala’ladunni ayirrisamanni noo ayyaana ikkasi kulannohu wedellichu Asinaaqe; hawadi yanna gunde arri yannara sa’nanniha ikkirono; giddosiinni haammata hornyubba amadinoha ikkasi coyi’ranno.
Irreechu ayyaani akkalu dirinni haaru dirira sa’nannihanna galatunniha ikkasinni baxille, mittimma, latishshanna mimmitu ledo ayirrisamanniha ikkasino xawisanno.
Dagatenna gobbate mittimmanna keeri, Kaaliiqa ayirrisanna galaxxa, hanqafaanchimmanna araaruno qarunni gumullanni amuraatubba ikkansa coyi’ranno.
Irreechu ayyaana konni albaanni ayirrisse egentinotanna ayyaanu mittimmanniha, baxilluna lowonta hagiirrunni ayirrinsanniha ikkasi kayinni Wedellitte Eden Desta coyidhanno.
Tayxeno, basete leellite ayirrisate quqquxante agadhitanni noota kulte Edeni; ayyaanu Oromote dagaha calla ikkikkinni Itophiyu daga baalanti mittimmatenna baxillunni ayirrissannoha hattono jawa tiro afi’rinoha ikkasi kultanno.
Sidaamu Afii sirbaancho ikkinohu Merihun Zerihuni isi widoonni; sa’u dirrara aante aantetenni ayyaana Oromote daga ledo Addis Ababaho ayirrisinota coyi’re; tayxeno ayyaana beeqqate quqquxamanni agadhanni noota kulino.
Ayyaanu mittimma, baxille, keere, gobbate keeraanchimmanna qullaambe halchinanniha ikkasinni Sidaamu daga haaru diru soorro Fichee Cambalaallate ledo xaaddissannosi hornyubba amadinotano xawisanno.
Ayyaanu babbaxxitino ayimma giddo gobbanke Itophiya leellishannnoha ikkasinnino keerunna mittimmano ayyaanu hornyubbanni qara ikkitinota wedellu coyidhanno.
Hedo uytinonke wedelli amadisiissenno, ayyaana ayirrissannore baalanka hawalle Irreechu ayyaanira iillishi’ne yitanno sokkansa sayissino.
Amsaalu Felleqe
Bakkalcho Wocawaaro 16, 2017 M.D Hamuse
