-Konninni 200 miliyoone doolaare gobbayidi woxu soorro afi’nanni
Hawaasa:- Sidaamu qoqqowira tayxe laalchu dirinni xaphooma 36 kume toone ale buna gobbayidi dikkora shiqishate mixo amande loonsanni hee’noonnita Qoqqowu Bunu, Laalotenna Makmaanote Biilloonyi egensiisino.
Kuni laalchu bikki sai sasu dirinni sonkoonni laalchi ledo heewisiinsanni woyte woyyaawinoha ikkasi kulloonni.
Biilloonyunnihu qaru dayirekterchi kalaa Mesfin Qarre Itophiyu Pireesete Uurrinsha ledo assino hasaawinni; qoqqowoho xaphooma 170 kume hektaare baatto bununni diwantinoha ikkanna; konni giddonni 142 kume hektaare aana noo buni laalcho aannoha ikkasi coyi’rino.
Mitte hektaarenni 11 toone buna gamba assinannita kulannohu qaru dayirekterchi; tayxe dirinni 1.5 miliyoone toone buna gamba assate hende loonsanni heenoonni yiino.
Konninni, 36 kumenna 100 toone qullaawa buna mereerima dikkora shiqishatenna 204 kume toone ale ikkannohu luu’lote buni gamba yaanno yine mixo amandoonnitaati biilloonyu dayirekterchi uurrinshankera xawisinohu.
Konni giddonni xibbuunni 89% hayishshamenna 11% moola buna gobbara sonkannita lede buuxisino.
Kalaa Mesfini xawishshi garinni, sa’u sase dirrara luphiima isilancho buna gobbayidi dikkora shiqinshoonni; tayxeno kaajjinshe sufisiisate loonsanni hee’noonni. Tenne lamala giddo qoqqowoho afantanno 150 ikkitanno Industirete sooreeyyeranna woradu ogeeyyera bunu isilanchimma aana illachishino qajeelsha uyinoonnita egensiisino.
Bunu gobbankerano ikko qooxeessinkera jirote; konne jiro ikkino laalcho loosidhe galtino daga laalchimma ledate garunni amada hasiissannonsa; baxxinohunni, paakeejenna komposte hironsirate aana jirsa tuga hasiissanno. Tayxe tenne hajubba aana illachinshe loonsanni hee’noommo yiino.
Bunu laalchimma diru dirunkunni sufisiisateno bunu giddo caalu haqqe kaasa hasiissannota huwachishino.
Hattono buna qasiisotenni loosa hasiissanno yine hananfoonni loosi sufa hasiissanno; togo yaa bununnita wo’ma paakeeje horonsi’ra hasiissanno. Laalcho aannokkiha geedhino buna buqqinse haaru buninni riqiwa hasiissannota qaagiissino.
Qoqqowoho xaphooma 102 ale bunu Industirranna 70 ale mittimmate maamarra noota qummeessinohu kalaa Mesfini; hallanyootunna mittimmate maamarra isislancho buna kalqete dikkora shiqishshe gobbayidi e”o lossate jawaatte loosa hasiissannonsa yaanni sokkasi sayisino.
Qiddist Gezzaheny
Bakkalcho Wocawaaro 9, 2017 M.D
