Yaareed Geetaachew
Hawaasa:- Hawaasi quchumi amaale mini 2ki doyicho, 6ki diri loosu wogga, 15ki uurrinshu songo tenne lamalara lamu barrira harisinoha ikkanna songoteno quchumaho babbaxxitino latishshunna danchu gashshooti hajubba saihu 2013M.Dra mixi’ne gumulloonnirenna 2014 baajeetete diri mixo shiqqeenna keennoonni.
Quchumu amaale minihu qaru songaafichi kalaa Demisse Dangisohu baxxinohunni Itophiyu Pireesete Uurrinshara xawisino garinni; harinsoonni songora babbaxxitinoti 7 hasaawu ajanduwa shiqqeenna amaalete mini miilla torbite kaajjishshe sa’ino.
Konninnino babbaxxitino latishshu handaarranni, danchu gashshootinna ga’labbo agarsiisate ragaanni mixi’ne loonsoonni loossa kaajjadu midaadinni la’noonnireeti.
Amaalete miniti uurrinshate komite eela dirrite quchumaho ikko baadiyyete olluubbara loonsoonnita latishshu loossa harunsonna irko assitanni la’ino. Lawishshahono quchumaho safote latishshuwa diiche garunni tua hoogate qarri, doogga, Hawaasi garbi qooxeessira ikko woloottano qooxeessuwara seeru gobbaanni ikkino garinni minantino minna, hodhishshu bobbanke ragaanni hasiisannokki garinni uddeelte hadhannori nootanna hattono investimentete su’minni hala’lado baatto huxxante lattukkinni noota badatenni leellitino xe’ne albillicho suffannokki gede loossa hasiissannotano amaalete mini miilla faasho wortino.
Quchumunnita latishshu, danchu gashshootinna dagate owaante uyinanni handaarra sai diri loosu mixonna gumulshi kaiminni hananfoonnihu haaru baajetete dirira loossa mixi’noonni garinni gumulantanno gede assate amaalete mini miilla kaajjishshe hedonsa wortino.
Quchumu giddo baxxinohunni 2008M.Dnni kayse hanafanturono gumulantukkinni doogo gufidhe keeshshitino pirojektuwa gumulantanno gede saihu 2013M.Dra gatino baatooshshe mucci assine baanteenna pirojektuwate loosi gumulamasi kaajjadu midaadi gede la’noonnitano songaafichu xawisino.
Wolootano Tuulate sinu quchumira 81 kumi ale ikkanno mannira horo aannoha xalalu anganni way pirojekte, diichenna giddo doogga loosino gumulameenna dagate horo aa hanaffanno gede assinoonni.
Amaalete mini miillano quchumu deerrinni sai dirira konni albaanni hanafante gumulantukkinni keeshshitino pirojektuwa loosi gumulamanno gede assinoonnihu kaajjadu midaadinni keentino.
Xaa yannara gobbanke e’ino jifonni fultannonna gobbannita gargarooshshu olanto irkissanno dirano quchumunna qoqqowu deerrinni harinsoonnita qummi assinohu songaafichu; gobba diinunni gatisate assinanni irkora baala quchumu teessaanono agarranninsaha qansichimmate qeecha fultanni afantannotano buuxisino.
Gobbanke xaa yannara amaddinoha latishshunna lophote doogo gufisate wo’naalanni noohu cancishaanchu HWHT junti madaarameenna gobbanke keeraanchimma afidha geeshsha quchumu teessaanono ikkito amaalete mini deerrinnino kaajjado uurrinshaati amandoonnihu yino songaafichu.
Hananfoonnihu haaru baajetete diri Itophiyu qansooti roduuwimmanna mittimmanke kaajjishi’ratenni dagankenna gobbanke wolapho buuxi’neemmo yanna ikkanno yinohu songaafichu kalaa Demisse; amaalete mini 2014 baajeetete dirira babbaxxitino latishshu, owaantetenna danchu gashshsooti loossa halashshatenni dagooma horaameeyye assate gaammoonniha xaphooma 2 bixxille 6 biiliyoone birra baajeette shiqqeenna amaalete mini kaajjishe sainotano amadissisatenni.
Bakkalcho Woxawaajje 20/2013
