Addisu Adoola
Addis Ababa: Itophiyu haaroo’mate kofatto Itophiyu daga umise woxinninna wolqanni loosidhanni noo kofatto gooffuro Itophiyu daga tunsichunni fultanno; gobbano lophitanno yaannoha danchummatenni la”a hasiissannansa hinaasunni la’annori mite mite gobbaydi wolquwa noota IFDR dagate riqiwaano amaale mini Seerunna Farcote uurrinshate komite gambisaanchi Kalaa Pheexiroos Woldesembetihu egensiisi.
kalaa Pheexiroos Woldesembetihu, baxxinohunni Itophiyu Pireesete Uurrinshara xawisino garinni; Gibitsetenni hanaffe Suudaanenna horotennino insa ledo uurritinori mite mite Galchimi gobbuwa ninke buximate giddo hee’neenna yanna baala buxanete tungannire insa tuggannanke insa anga calla la’nanni hee’nammoranna haxonke gotti yineemmokki gede hasidhannohura haaroo’mate kofatto loosi gumulamannokki gede assate wo’naaltanni noota xawisino.
Kofattote loosi amandoonni yannanni gooffoommero kuni baalu qarri di-iillannonke yinohu kalaa Pheexiroosi; gobbaydi harinshonnino roore sa’u yannara gobba gashshite sa’uri cancishaanchu HWHT gaamo tenne kofatto su’minni gamba assinanni woxe umissa horora hosiisi’ratenninna ijaarsha rosichono ikko dhuka afidhinokki uurrinshara aansanni dagate woxu itamanna loosu loosamikkinni goofa hasiissannosi yannara aleenni keeshshasinni gobbaydi wolquwa angansa wortanni xiiwo iillishankera wo’naaltino yino.
Itophiyu daga kayinni noonsahu aaninni kayse uytanna konni garinni uminke woxinni umonke woyyeessineemmo yine loonsanni keeshshinoonnita qaagiisse; wo’mante gobbanke daga sharronni daggino soorronni kofattote loosi haaru garinni hananfeenna loonsanni hee’noonnitanna xaa yannara xibbuunni 70 anga gumula dandiinoonnitano kulino.
Abbayi haaroo’mate kofatto loosi konne deerra iillanno gede gobbankera daggino soorro qeechise jawaho yee; konnirano dagate riqiwaano amaale mini miillano aganu baatooshshensa aatenni hanaffe dargu geeshsha marte towaatatenni qansichimmate qeechansa fultanni afantanno yino.
Gobbanke aana iillinshanni hee’noonni jifo xaano agurantinokkita xawisinohu kalaa Pheexiroosi; juntu gaamo xa badheenni loossannowiinni sa’e xawoho tenne kofatto gufisate deerra hadhanni noo gede huwachishe; Itophiyu daga kayinni bi’re Xaaliyaana qassu wari gede kofattote looso gudatenna juntu aana adhinanni qaafora mittimmatenni hadhanni noo daafira Abbay kofattono danchu garinni gumulantanno yitanno amma’no noositano coyi’rino.
Bakkalcho Woxawaajje 20/2013
