Abebech Maatewoos
Addis Ababa:- Cancishaano HWHT olu yannara qaaqquulleho iillitannonsa bisunna buqqeete gawajjonni rahotenni woyyaabbe ikkado qansoota ikkitanno gede dandiissate qixxaabbe kaa`lotenni shiqqinota dhaabbanno sagale moore qodhaanote sinqe assi’rinota meentu, qaaqquullunna wedellu ministere tiyyidhe gibbino.
Konne assoote kalqete dagoomi giwanno gede woshshatto shiqishshino.
Ministerete seeru hajubba dayrekiterichi kalaa Derejje Teggiyibeluhu baxxinohunni Itophiyu preesete uurrinshara xawisino garinni; muli yannanni qafadamaanote anga afantinoti qaaqquullunniti dhaabbanno sagale taaltino sagale anje korkaatinni gawajjo iillitinonsa qaaqquulle irkisate kaa’looshsheho shiqqinote.
Cancishaanchu HWHT qaaqquulleho e’inota dhaabbanno sagalla mooranni qodhaanote beehanni afamannota tenne lamala giddo olu basenni afi’noonni mashalaqquwa faajje assitinota buuxisinohu kalaa Derejje; kuni gaamote assooti saalfachishannoha ikkinota coyi`rino.
Kalaa Derejje xawishshi garinni, cancishaano gaamo qaaqquulle kaa`late e`inota dhaabbanno sagale moortanni qodhaanote horonsi’ransa ilamate heddannokkirenna ilama shitannore ikkansa loosunni leellishshino assooteeti.
Qaaqquulle amansawiinni badde olaho bobbaasansa ajjukkinni gattino qaaqquullira e`inota dhaabbanno sagale hasiisannokki assootira horonsi’rasnsa qaaqquullu ledote qarri aana ubbanno gede assino. Kuni assooti kalqeteno ikko gobbate giddo seerinni jaddo ikkinota anfara hasiisanno yino. Ministerete loosu minino hajo lowo geeshsha huluullissannota ikkase buuxisino.
Cancishaanchu HWHT jawa kakkachimma hanaffinohu amansa hanqafonni fula noonsakki qaaqquulle fushshite olaho beeqqitanno gede assitu yannaraati yinohu kalaa Derejje; xa kayinni qaaqquullu hudetenni gooffanno gede assate kaa`lote sagalensa adhitanni afantanno; kunino qorichunnino saino qorichaati yino.
Qaaqquullu sagale afidhara dagginota dhaabbanno sagale uminsara horonsi’ra qorichunni saino qorichaati; olunnino aleenni hudetenni gooffanno gede assa kakkachimmate birxeeti yinohu kalaa Derejje; qaaqquullu tenne mitiimmanni gatturo nafa ikkado sagale afidhinokkire ikkitannohuranna babbaxxino dhibbira reqecci yaate qarri xaadannonsa, kuni kayinni gobba riqibbanno ilama heedhannosekki gede assannota xawisino.
Baalanti kaa`laano miilla tenne hajora beeqqitino yaa lowo geeshsha ayirritannote yinohu kalaa Derejje; ikkollanna kayinni mitu mitu konne assoote gumultanna, gumulamanno gede injeessitanna anfe uurrinsoonni; xa leellannohu kayinni olunni gawajjantino dagara baxxinohunnino qaaqquulleho daggino sagale tenne gaamora sayisansaati. kunnirano kaajjado qorqorsha assa hasiisannota coyi`rino.
Cancishaano HWHT albano sharrote dhaggensanni Tigrayete daga irkisate dayinoha kaa`lote gide Sudaanete widoonni sayissanni hirtanniiti heedhinohu; tennennino rosichu noonsa gaamooti yinohu kalaa Derejje; xaano albi amalinsanniiti xawo fultinohu.
Konni alba kaa’looshshu gide moorte ittisansanni gobbaanni hirtanni olu uduunne hidhitanni keeshshitino; xa tenne hatto assa dandaa hoogansanni moorte uminsara horonsidhanni afantanno. kuni kayinni lowo geeshsha saalfachishanno assoote ikkasi baxxinohunni irkisaanote yitannori ikkollana Tigrayete qaaqquulli daafira gado noonsakkiri galchimi gobbuwanna wolootuno huwattara hasiisannota xawisino.
Cancishaano HWHTnni iillitanni noota qaaqquullu qoosso xiiwate dano baalunku afaranna huwatara hasiissanno yinohu kalaa Derejje; baxxinohunni irkisaano uurrinshuwa dandaami bikkinni yawonsa garunni ammanamatenni fula ga’a gobba riqibbanno ilama gatisa hasiissannonsata qaagiissino.
Dandiinirinni buqqeensara ammanante loosa agarantannonsata egensiisinohu kalaa Derejje; konni gobbaanni assitanno millimmo seerunni xa’misiissannonsata ikkitinotano xawisino.
Kalqoomu dagano baxxinohunni mannoomittete irko aana beeqqitanni noo baali togoo jaddo aana beeqqa hoogatenni tiiunnino ikko seeru xa’mamaanchimmanni umonsa agara hasiissannonsata huwachishinno.
Bakkalcho Woxawaajje 20/2013
