Balaxote rosi hala’la rosu isilanchimmara jawa qeecha afi’rinota kullanni. Balaxote rosira uynoonni illachi gobbate rosu isilanchimma buuxisiisatenna rosaanote ikkadimmate anje tirate dandiisiisannota ammannanni.
Sa’u boode dirra albaanni gobbankera loosu aana keeshshinohu rosu budi seeda dirra gedensaanni umisiha hi’naancho xiiwo ilamatenna gobbate aana kalaqinoti qaangannite. Kunino, gobboomu rosu hiiqqammera jawa qeecha fulinoha rosu bude ikke saino.
Ka’’a bushshara ga’ra bushshino yinanninte gede rosu budinke hunda kaima seyinokki daafira baca ilama rosu gumi woffi yaanno gede korkaata ikkino. Maateno seeda dirrara daafurte daffe rosiisidhino oosonsa fonqolu gumi agarroonni garinni maareekkaminokki daafira beebba daafuro ikkinoti muli yanna qaaggooti.
Ikkollana, xaa yannara kayinni balaxote rosira jawa illacha tungoonni daafira albillicho rosu handaarinni woyyaawu gumi maareekkamannota hendanni. Ilamano kaimunni hasiissanno ogimmanna egenno adhite lophitara dandiitanno daafira bilchaatanna heewisamaano ikkitara dandiitanno.
Xaa yannara gobboomu deerrinni balaxote rosira uynoonni illachi kaiminni daaimu hoshshora ikkitanno rosi minna mootimmatenni, mootimmate loosaasinenni, dureeyyetenni hattono dagoomu beeqqonni ijaarranninna halashshinanni hee’noonni.
Balaxote rosi konni albaanni quchummate calla nooha ikkanna; baadiyyete ilama tenne kaayyo afidhukkinni keeshshitinonkanni. Konni korkaatinni quchumaho rossinori woyyawa gumanna yannitte hayyonni rosate kaayyo afidhanna; baadiyyenniri kayinni uminsanni hixamanyite rossurono agarroonni gumi daanna dila’noonni.
Dirinsa umi dirimi rosi deerrira iillinokki qaaqquulli balaxote rosi kaayyo afidhannokki daafira dirinsa iilli gedensaannino rosu egennonna ogimmansa woffi yitinota ikkitanno.
Konni ragaanni xaaddanni keeshshitino guffa tirate dagooma beeqqaano assino garinni deerraho ikkitanno rosi minna ijaarranninna halashshinanni hee’noonni. Daaimuno kuri rosi minnara hossanni deerrinsanni afi’ra noonsa ogimmanna dandoo amaddanni no. Hoshshonsano woyyaabbinotanna mimmitu ledo noonsa xaadooshshino kaajjinoha ikkanni dayno. Qaaqquullu tenne kaayyo afi’ransannino hagiirraamma ikkitanni daggino. Buqqeensano hakko bikkinni fa’nitanni noota maatensa farcidhanno.
Dirinsa umi dirimi rosira iillinonsakki qaaqquulli daaimu hoshsho afi’ransanni rosu mini qooxeessano rossanni umi dirimi rosinsara balaxote qixxaawo assitanno gede kaa’lannonsa.
Konni deerrinni amada hasiissannonsaha safote ogimma afi’ra dandiitanno daafira uurrinshu rosinsara ikkadda ikkitannota kaayyo kalaqantannonsa.
Konni rosu deerrira xaa yannara uynoonni illachi ikkaddanna heewisaama dandiitanno qansooti kalaqantanno gede jawa irko assanno. Ilamateno dancha hexxo aanno loosi hanafamino.
Xaa yannara umi dirimi roso karsantannori baalunku qaaqquulli taalo heewisamaano ikka dandiitanno kaayyo afi’ransa jawa hexxo aannoho. Rosu isilanchimma buuxantanno gedeno jawa safo tugannoho.
Daaimu rosira illacha tugatenni uurrinshu rosi minnano hattonni dagoomu beeqqonninna uminsa kakkaooshshinni dagoomu horaameessimmara hajantanno hallanyootinni rosu uurrinshuwa halashshinanni hee’noonni.
Sa’u boode dirra giddo umi dirimi rosi minnanna hattono olluubbatenna amma’note uurrinshuwarano daaimu hoshsho qixxeessinneenna qaaqquullu hakkiicho hossanno gede assinanni keeshshinoonni. Xaa yannara kayinni daaimu hoshshora calla ikkikkinni xaphooma gobboomu rosu isilanchimma buuxisiisatenna rosaanote rosu guma woyyeessateno balaxote rosi deerri lowonta hasiisannoha ikkasi ammannoonni.
Konni kaiminni, baalante qoxeessubbara daaimu hoshsho woy deerransa agartinore balaxote rosi minna hala’ladunni iillinshanni hee’noonni.
Konni kaiminni, xaa yannara gobboomu deerrinni xaaddinota rosu hiiqqamme sissate balaxote rosi jawa qeecha fulannota hendoonni garinni handaaru loosi jawaachishanno garinni loosamanni afamanno.
Mootimma umisenni baajeette gaamteenna ijaarsiinsanni rosi minna heedheennanni baxxinohunni mootimmate loosaasinenna dureeyyetenni balaxote rosi minna ijaarate hananfoonni loossa gobbate jawa hexxo uytannote.
Kuni jawaachinshannihonna baalante qooxeessubbara kaajje sufa noosihura hiittino dagoomu bissa annimmatenni beeqqaano ikkitanno garinni kakkayisa agarranni.
Gobbatenna ilamate dancha hedatenninna hegeraamo iqqa ilamate ragisiisate kakka’ino anguwa jawattanno gede hasi’nanni. Gobbano tenne ilamanni jawa looso agadhitanno. Egennotenninna ogimmatenni hattono danchu amanyootinni bilchaattino ilama heedhuro gobbate lophono rakkinota ikkitanno. Ilamano kalqoomu deerrinni heewisamaano ikkitanni hadhanno.
Aanannohu haaru rosu dirinnino dagoomu qaaqquullensa qooxeessinsara ijaarroonni balaxote rosi minnara hosiisi’rate kaayyo noonsa. Tenne kaayyo garunni horoonsi’ranna ilama hexxo ikkitino uurrinshuwa hala’litannonna deerrunni agarranni ogimmanna egenno hala’litanno gede injoo kalaqqannota agarranni. Kuni daaimu aana loosa ilamate wowe ikkinota leellishanno faashooti.
Amsaalu Felleqe
Bakkalcho Woxawaajje 16, 2016 M.D
