Dombophiichote care dombophiichote ogori giddo afamanno dombophiichote du`namaancho woy dombophiicho afaletenni helleete widira massitanno tuubuwa giddo kalaqantanno allaggicho coyeeti.
Dombophiichote du`namaancho afalete munyuuqqanni laashshantannota, maxinaame shiilubba amaddinoha ikkanna saga’lineemmo qiwaatenna vayitaamiine daahantanno gede kaa’litanno. Bisinke giddo afantannota hadhaabbino shiilubba hunateno kaa`litanno.
Dombophiichote care kaimubba
80 anga xibbuunni ikkitannoti dombophiichote care kalaqantannohu qiwaatetenni woy kollestiroolete batinyinni ikkinota fayyimmate ogeeyye coyidhanno.
Dombophiichote care reqecco leddanno coyibba qole፡-
- Qiwaate noonsa sagalla batinye yanna horoonsira
- Bikku aleenni ikkino du’milli
- Bisu giddo noo qiwaate ajishate kaa’litanno xagga adha
- Godowinni hee’noonni yannara akkimale du’ma
- Ila hooltanno xagga
- Diru xiiwa baxxinohunni meyaate aana xisso kalaqantanno gede assitanno
- Sukkaarete xissonna labbinoreeti.
Dombophiichote care xisso malaatta
Dombophiichote care seeda yannara xissote macciishshamme leellishshukkinni keeshshitara dandiitanno. Dombophiicho fultanno tuubbo dombophiichote carenni cufantanno yannara qiniiticho godowinke aliidi kifile aana dagganni higganno woy taxxi yitannokkita xissote macciishshamme iillishshanno.
Dombophiichote care xisso saltote hattono qiniiticho qotiranna badhete tuqate akatino noose. Xissote macciishshamme qiwaatete gide saga’linummohu gedensaanni iibbabba saltote xissonni bandeemmo gede kaa’litanno.
Qara qara malaatta:-
- Qiwaate noose sagalla saga’lineemmo woyte sumuu yaa hooga
- Sagalete gedensaanni kalaqantanno bodirate macciishshamme
- Looqqi assatenna tushshiishate qarra
- Dewee’la
- Sagalete hasatto aja
- Bisu aana duummaadda malaatta hee’ra
- Goxanote saatera xissote macciishshamme leella
- Illete kuuli baqqala ikka
- Bisu gogi haanji`ranna baqqalu widira soorrama
- Ille, gogunna shumate kuuli baqqala ikka
- Cilu kuuli s oorrama
- Qiniitichu midaadi aliidi kifile qarqarira lowontanni kaajjado ikkitino xisso hee`ra
Dombophiichote care gargadhinanni doogo
- Taaltino sagale saga’la
- Sagalete saatera saga’linikkinni sayisa hooga
- Ikkado waa aga
- Bisu du’mille rahotenni ajisha hooga dombophiichote care gargadhinammora dandiineemmo boode dooggaati.
Dombophiichote care xisso xaginaati
Xissote macciishshamme luphiima ikkituro qiwaatete sagalla saga’la aguranna xisso ga’labbissanno xagga adha xisso yannate geeshsha ga’labbissanno.
Addintanni mittu manchi malaatta leeltinosihura calla xagicho adhasira albaanni dombophiichote care noositanna noosikkita buuxira hasiissannosi.
Xisso kaajjitanni hadhuro kayinni dombophiichote care dadhine fushshiishiratenni xagisira hasiissannota fayyimmate ogeeyye amaaltanno.
Dadhine xagisira dandiinannikkiha ikkiro qole xissote gariha xagicho horoonsi’ratenni carubba shiilsa dandiitanno; tini doogo kayinni baca dirra adhitannota fayyimmate mashalaqqubba leellishshanno.
Abbebech Maatewoos
Bakkalcho Woxawaajje 2, 2016 M.D
