![](https://press.et/bakalcho/wp-content/uploads/2024/07/Untitled-12.jpg)
Baxxinohunni qiidanno diilallote akati hee`ranno woyte kasale mine iibbishi`rate horoonsi`ra rosantinote.
Ikkinohurano diqillo (kasale) mannu babbaxxitino owaantera horoonsi`ranno yannara hasiissanno qoropho assa noonsata ogeeyye amaaltanno.
Korkaatuno hasiissanno qoropho assa hoongiro kasalete wiliile reyoo lede heeshshote diri geeshsha suffanno xisso ikkitino surrete gawajjonna wodanu xissora reqecceessitannohuraati yitanno.
Hajote aana harinsoonni xiinxallubba leellishshanno garinnino; kasalete wiliile illetenni leeltannokkinna foolu noosekki hadhaame gaaze noose.
Tini gaaze kalaqantannohuno gaaze, zayite, kasale woy haqqe wo`munni wo`ma kashilte gaafa hoogasenni ikkinota xawinsanni.
Kasalete wiliile noo qarqarira diilallo giddoydira xuruurranni yannara, mundeete giddo e“atenni duume mundeete munyuuqa ikkitinotanna okisijiine bayidhe babbaxxino bisu kifillara iillishshanno hemogiloobiine ledo karsamatenni manchi beetti aana ayirritanno gawajjo iillishshanno.
Konni korkaatinnino mundee okisijiine bayi`ra uurrissanno; konninni kainohunni munyuuqqanniti manaadda kifilla gawajjantanno; saeno reyitanno.
Kasalete wiliilenni (kaarben monokisayidetenni) gawajjamino manchi leellishanno malaatta:-
Umu damuume, hawwu assanna xissama, daafuru macciishshammenna buuxate qarra, garunni uurrate qarrama, buuxe la“a hooganna qaaga hooga, meessaneeto hawa, mittu coy aana illacha assa hooga, godowu xisso hattono folate qarrama labbino malaatta leeltara dandiitannota ogeeyye huwachishshanno.
- Kasalete wiliile hiittoonni gargadha dandiinanni?
Kasaletenni sagale ra“isa hasidhiniha ikkiro ikkado diilallo afi`rate minu gobbaanni ra“isa; minu gobbaanni ra“isa dandiitinannikkiha ikkiro qole wo`munni wo`ma kashilasenna wiliile gudase buuxxine eessa hasiissanno.
Ledoteno kasalete bacce horoonsi`nanni hee`ne waalchonna maskoote cufa hooga, kasaletenni sagale ra“inse ka`niro wayinni xoyissanna waalchonna maskoote fanatenni mine foorarsa hattono kasale mini giddo wodha hasiissannokkita ogeeyye amaaltanno.
Konninni saeno kasale mini giddo qitiissine goxa woy haawaa iillishshanno gawajjo ayirritannota ikkasenni togoo assootubbanni qoropho assa hasiissanno.
Kasale uyitannonke horo jawa ikkiturono hakko bikkinni iillishshankera dandiitanno gawajjo shota gede la`nannita dikkitino. Hawadi yannara minu minunkunni mine iibbishi`ratenna qiida hoo`late horonsira rosicho ikkitino. Ikkolla ikkinnina dagoomu sagale qishi`rateno ikko giwaarate wiliile guddinokki kasale minira eessatenni qoropho assa hasiissanno.
Babbaxxitino yannara kasalete wiliilenni fugante heeshshonsa hooggino, reyotenni quuxxi yite gattinno mannooti daafira macciishshinoommo halaali dihooganno. Ikkinohurano kasale reyote aana tuggannota hadhaame gaase giddose amaddinota ikkase huwatatenni umonkenna maatenke hattono dagoomanke tenne danonni agara hasiissannonke yaa banxeemmo.
Abbebech Maatewoos
Bakkalcho Maaja 18, 2016 M.D