Addis Ababa:- Tayxe giwiru dirinni xaphooma 145 miliyoone birra eo gamba assate mixo amande loonsanni hee’noonnita Wodiidi Sidaami zoone Alatta wondi quchumi gashshooti e’’ote sinu borro mini xawisi.
Quchumaho tayxe giwiru baatooshshe tekinoloojetenni irkisamme harancho yanna giddo haammata baataano haa’nanni hee’noonnita kulloonni.
Alatta wondi quchumi gashshooti eote sinu borro mini sooreessi kalaa Teshaale Teshoome hajo laise Itophiyu pireesete uurrinshara xawisino garinni; tayxe giwiru baatooshshinni quchumu daddalaanonni xaphooma 145 miliyoone birra eo gamba assate hende loonsanni hee’noonni.
Deera “C” giwiru baataanonni 10 miliyoone birra eo gamba assate mixi’noonnihu giddonni tenne odoo qixxeessini yanna geeshsha 4 miliyoone birra eo gamba assinoonnita kayse; konninnino mixotenni amandoonnihunni 43% jeefinsoonnita buuxisino.
Quchumaho xaphooma 1 kumi 552 giwiru baataano nooha ikkanna 120 miliyoone uurrinshu giwiru baataanonni gamba assinannita ikkitanna; 25 miliyoone kayinni maazzagaajunni gamba assinanni giwire ikkinota kalaa Teshaale lede huwachishino.
Kuri giddonni deerra ‘A’ giwiru baataano 98 ikkitanna , deerra ‘B’ 47, deerra ‘C’ kayinni 1,407 giwiru baataano ikkansa kulannohu sinu borro mini sooreessi; tekinoloojete hayyonni e’’onsa 1 miliyoone ale higginori 98 deerrunni reekkantanno baataano heedhannota lede qummeessino.
Tayxe giwiru baatooshshe baalante gobbate qarqartora tekinoloojetenni irkisamme Teelebirrenni gumullanni hee’noonniha ikkasi ledo amadaminohunni quchumahono konni garinni gumullanni hee’noonnita kaysino.
Sooreessu xawishshi garinni; sa’e sa’e Neetworkete murmurama heedhurono harancho yanna giddo batinye baataano haa’nanni hee’noonni. Konninnino baataanote tultaawa luphi yino deerrinni gatissino.
Eo heedhurooti loosanna latisa dandiinannihu yaannohu sooreessu; ; konni daafira quchumu giddo heedhanno daddalaano gadachonsanna yawonsa fula noonsa. Giwirensa yannatenni baatatenni mittu mittunku qansichimmate qeechansa fula hasiissannota sokaksi saysino.
Qiddist Gezzaheny
Bakkalcho Maaja 18, 2016 M.D
