Gobboomu amaalammete komishiine Ella 21/2016 MD hanaffe hedo gamba assate amaalammete fooliishsho gumultanni afantanno. Sidaamu qoqqowirano Woxawaajje 22ni hanaffe sirnya gamba assate amaalammete bare Hawaasi quchumira oyimbarra xaphi yino.
Hawaasi quchumira harinsoonni bare aana beeqqitino ri 1 kuminna 800 ali hajo la’annonsa bissa mereerinni amma’note annuwi,wedellunna bisu xe’ne noonsari hattono maccareeti yine hendanniri kullannireeti. Kuri mereerinni Itophiyu pireesete uurrinshara amma’note massagaano hedonsa wortino.
Gobbate gede roore daga ammanaasine ikkitino Itophiyira amma’note annuwi daganniwa noonsa adhamooshshi luphiima ikkasi addaho. Gobboomu amaalammera amma’note annuwi qeechi maa ikka noosi? gumulo seekkanno gede hiitto assino? yitanno xa’mubba aana amma’note annuwi hedo gamba assinoommo.
Itophiyu Ortodoksete amma’no Sidaamu qoqqowi rosiishshi gambooshshi tantano biddishshi sooreessa ikkino Mikre-tiguhaan Qesiis Amaare Girmihu yaatto garinni; amma’note annuwi amaalammete aana jawa qeecha amaddanno.
Amaalamme hoongoommo keere abbate qarunni hasiissanno yaannohu Qesiisi Amaare; amma’note annuwi gobbate hasiissanno yitanno hedo shiqishatenna baqqi yite beeqqatenni keeru kalaqamara qeechansa fula hasiissannonsata amaalanno.
Amaalamme dargaho leellanno olanna gaance gamunnino ikkiro mala abbitanno yee hexxo assannota coyi’rannohu Qesiis Amaare; amma’note annuwi amaalammete gumulora qeechansa fultanno gede amaala agarantannonsata huwachishanno.
Amaalamme gobbatenna dagate hasiissannota ikkasenni; hendoonni garinni agarranni keere abbitanno gede amma’note annuwi qinaambetenni dandiineemmore assate sharrama noonke yaanno. Sidaamu qoqqowi Ulamu amaale mini layinki gambisaanchi Sheh Umer BushIrIhu isi widoonni; gobboomu amaalamme mittu mittunku Itophiyu qansichi irkisara hasiissanno. Keeru Isiliminnu amma’no giddo balaxo uyinanniha ikksi xawisannohu Sheh Umeri; amma’note anna ikkasi bikkinni amaalammete sumbera umisi qeecha fulate wo’manka woyte qixxaawinoha ikkasi coyi’ranno.
Gobboomu amaalamme garunni jeefisa dandiiniro Itophiyu gaancetenni fulte keere afidhanno yaannohu Shek Umeri; amaalamme seyootenni gumulama amma’note anni gede huluullissannonke hajo ikkasenni baalunkuri aleenni balaxo aatenni agaramannonke qeecha fulate loonsanni hee’noommo yaanno.
Wolu Sidaamu qoqqowi amma’note uurrinshuwa gambooshshi layinki gambisaanchinna wongeellu ammanaasine amma’note mini massagaanchi Qees Iyyaasu Xagichohu; gobboomu amaalamme gobboomu mittimma abbate qarunni hasiissanno yaanno.
Xaa yannara Itophiyaho noo gaance gatisate amaalama hasiissannota ikkase xawise; amaalamme garunni gumulanturo badooshshe ruukkisatenni keere kalaqqannota xawisanno.
Itophiyu daga ammanaasiine ikkansa coyi’rabnnohu Qees Iyyaasu; amma’note annuwi garunni rosiinsummoro kalaqamino qarri dikalaqamannonkanni. Baalanti amma’note annuwi wedella amaalanna mittimmanna baxille rosiisa dandiituro ilama gatisa dandiinannita coyi’re, amma’note annuwi gede dandiineemmo baala assineemmo yiino. Olu, mundee duna, dartenna gibbo hasaawunni tidhantanno gede amaalammenniwa dagganno gede woshshatto assanno.
Amma’note annuwi amaalammete gummaa’mara wedella amaalatenni hanaffe dagoomu baqqi yee beeqqanno gede amaale aatenni uminsa qeecha fultanno gede amaalanno. Gobboomu amaalamme gobbate gede e’noommo gaancenni fulate dhaggete hedeweelchonni afi’noonni jawa kaayyooti. Amaalamme gummaame ikkiteenna keere afi’rate lowo manni hexxotenni agadhanni nooha ikkasinni; gummaa’mase buuxantanno gede baxxinohunni dagoomunniwa jawu adhamooshshi noonsari amma’note annuwi gumulote luphiima qeecha fula agarantannonsa.
Bakkalcho Woxawaajje 30, 2016 M.D
