Addis Ababa:- Haaru diri ayyaani ledo amadisiisaminohunni laalchu anje xaaddannokki gede gibrinnunna industirete laalchubba shiqisho woyyeessate looso loonsanni hee`noonnita Sidaamu qoqqowi daddalunna dikkote latishshi biiro egensiissu.
Qoqqowu daddalunna dikkote latishshi biiro layikki sooreessinna daddalu handaari sooreessi kalaa Burqi Buxxuulihu Itophiyu pireesete uurrinshara xawisino garinni; qoqqowoho haaru diri ayyaani ledo amadisiisaminohunni laalchu anje xaaddannokki gede gibirinnunna industirete laalchubba shiqisho woyyeessate laashshaanotenna hajo la`annonsa bissa ledo loonsanni hee`noonni.
Kalaa Burqi xawishshi garinni; ayyaana korkaata assatenni gibirinnunna industirete laalcho baxxinohunni gaashete gidi, furnote bullee, atikiltenna laalote gumma, lukkuwu, quuphu, maalu, sukkaarenna zayitete shiqisho hala`ladunninna islanchimmatenni shiqqanno gede illacha assine loonsanni afammanni.
Qoqqowoho Hawaasi quchuma ledanna uurrinshu dikkuwa gobbaanni 64 ikkitanno qidaametenna sambatu dikkuwa noota xawisinohu biirote layinki sooreessi; qoqqowunni kayise eela zoonetenna woraddate aana maazzagaaju noonsa qooxeessubba lede laalchu ikkadu garinni shiqanno gede illachunni loonsanni hee`noonnita buuxisino.
Hawaasi quchumira Masqalu xawira luphiima geexaano afantannoti jawa baazaarete dikko fanante loossanni afantannota kalaa Burqi buuxise; 15 ale ikkitannori mittimmate maamarra gibrinnunna industirete laalcho shiqishshanni afantannono yiino.
Hawaasi quchumira uurrinshu dikko gobbaanni shoole mereershuwa bande ikkadu garinni maamarra taalino waaginni lukkuwa shiqishshanno gedeno assinoonni.
Ledoteno ayyaana korkaata assatenni mootimma qoqqowoho 4.6 miliyoone zayite gaantinota kalaa Burqi xawise; Hawaasi quchuma lede eeli geeshsha geexaanote mittimma maamarra widoonni dagate tuqisate qixxaawo assinanni hee`noonnita buuxisino.
Baxxinohunni ayyaanu yannara sagalenna agatto labbino laalchubba aana allaggicho coye karsiisatenni hirate wo`naaltannonna waagu lexxo assitanno daddalaano heedhara dandiitanno yiinohu layinki sooreessi; konne assoote gargadhatenna qaafo adhate handaarunni deerru deerrunkunni eeli geeshsha gaamo tantanne yawotenni loonsanni hee`noonnita qummeessino.
Abbebech Maatewoos
Bakkalcho Woxawaajje 30, 2016 M.D
