– Sidaamu qoqqowira sirnya gamba assate fooliishsho jeefantino
Tigrayetenna Amaaru qoqqowubbara amaalammete loossa gumulanturo qara gobboomu amaalammete gambooshshe albiidinke Arfaasu aganira gumullannita gobboomu amaalammete komishiine xawissu. Sidaamu qoqqowira lamala harunsitino barrubbara harinsanni keeshshinoonniti sirnya gamba assate fooliishsho jeefantino.
Gobboomu amaalammete komishiine qaru komishinerchi Mesfin Ariaya (P/r); Sidaamu qoqqowi sirnya gamba assate amaalammete bare jeefo aana afame assino hasaawinni; Tigrayetenna Amaaru qoqqowubbara gumullanniri qoqqowu amaalammete loossa gumulanturo qara gobboomu amaalammete gambooshshe albiidinke Arfaasu aganira harinsanni.
Xaa yannara komishiine qoqqowubbate sirnya gamba assate fooliishsho gumultanni afantannota qummeesse; gamba assinoonni sirnyuwanni qara ikkitinore doorre qara gobboomu amaalammete barera amaallannita kayisino.
Amaalamme qeelaanchunna qeelamaanchu hee’rannota dikkitino yinohu qaru komishinerchi; amaalammetenni noo qarrubba tirre baalanka qeelaancho assinannita ikkase xawisino.
Jajjabba uurrinshuwa sirnyansa qinaawino garinni komishiinete shiqishshanni afantannota coyi’rannohu qaru komishinerchi; hiikkuno hasaawu illachi noonsa daga sirnyansa komishiinete shiqisha dandiitannota coyi’rino.
Sidaamu qoqqowi lamala harunsitino barrubbara harisanni keeshshinoti sirnya gamba assate amaalammete bare gummaame ikkitinota xawise; harinshote gumulamara qeechansa fultino bissa galatino.
Sidaamu qoqqowi hajo la’annonsa bissa riqiwaano qoqqowu sirnya komishiinete uyitino. Sirnya gamba assate amaalammete bare xaphoomu qixxaawo aana Ontente hajo la’annonsa bissanni doorantinori 25 hajo la’annonsa bissa riqiwamaano Sidaamu qoqqowi sirnya qineessite Itophiyu gobboomu amaalammete komishiinera uyitino.
Sidaamu qoqqowi gumulantino sirnya gamba assate bare aana 900 ikkitannori Sidaamu qoqqowira afantanno 45 woraddanni doorantinori dagoomu riqiwamaano, qoqqowoho afantannori poletiku paartuwa, sasenti mootimmate bissa riqiwamaano, addi addi uurrinshuwanna maamarra riqiwamaanonna macca mannooti riqiwamaano beeqqitino.
Qiddist Gezzaheny
Bakkalcho Woxawaajje 30, 2016 M.D
