Hawaasi Quchumi doogimaru latishshi teessaanotenna turiizimete woyyaabbinonna hee’rate injiitino base qalaqqanni noota quchumu Kantiwi Mekuriya Marshayehu xawisi.
Itophiyu piresete uurrinshanni ledo assino hasaawinni Kantiiwu Makuri qummi assinonte gede, kuni latishshi hanafaminohu heeshshonna turiste woyyeessateeti yiino.
Xiinxallo leellishshannonte gede, konni doogimaru latishshi looso kiisate mitte biliyoone meddisanno woxe hasiisanno yiino. Kantiiwu xawishshi garinni tini Hawaasi doogimaru latishshi pirojekte lame doyichonni ha’rinsannite. Umi doyichono, base halashshate aana illachishshannota ikkite, 35 kiilomeetire ale ikkitannota 10 doogo amaddanote. Layinkiti illachishshannohu quchumu mereero noota woyyeessatenna halashshate aana ikkanna, sase doogga harunsite, 5.7 kiilomeetire ale amaddinote.
Geeshshisennino Sawuzi Ispiringetenni kayisse Hayile Rizorte 3.7 kiilomeetire doogo amaddinota ikkite; hala’linyisenni kayinni Shaafeetate Doyicho geeshsha 40tenni 50 meetire ikkitannote.
Kantiiwu Mekuri egensiisinonte gede, quchumu gashshooti haanja muro latishshi pirojektera,baxxinohunni Membonni kayise Riferaalete geeshsha mitte kiilomeetire amadanno bayichira 140 miliyoone birra gaamino. Kunino quchumu giddo haanja muro kakkaooshshira umo ikkitinori giddo mittoho yine hendanni.
Dagate owaante woyyeessate hajo la’annnonsari babbaxxitino bissa ledo halamatenni duucha loossa loosantanni noota illachishino. Hawaasi quchumi latishshunna konistiraakishiinete biddishshi sooreessi injiner mihiretu Gebire xawisino garinni;koriderete woy doogimaru latishshi gobbayidi investeroota latishshaho goshooshatenna turistete bobbaho luphi assate qara hayyoti. Hattono teesaanote baxisannonna injiino qooxeessa kalaqate doorshu nookki hanafooti yaanni guwursino.
Doogimaru pirojekite latishshi wedellaho loosu kaayyo kalaqate widoonni umise qeecha afidhino yiinohu injiner Mihiretu,xaa geeshsha umi hanafo 1.1 km latishshi loosira 200 ali wedelli loosu kaayyo afidhinota buuxisino.
Qiddist Gezzaheny
Bakkalcho Woxawaajje 30, 2016 M.D
