![](https://press.et/bakalcho/wp-content/uploads/2024/07/Untitled-8.jpg)
Hawaasa:- Quchumaho hananfoonnihu doogimaru latishshi loosi turizimete millimmo lossate dandiisannoha ikkasi Hawaasi quchumi gashshooti xawisino.
Hawaasi quchumi kantiiwi kalaa Mekuriya Mershaye baxxinohunni Itophiyu pireesete uurrinshara xawisanni; muli yannanni quchumaho hananfoonnihu doogimaru latishshi quchumu suude woyyaawino garinni soorrate dandiisannoho.
Doogimaru latishshi doogo biifisate loossa hanqafinoha, shalleettetenna lekkaasinu doogga badinoha hattono bisu xe’ne noonsare hedote giddo worino garinni gumullanni hee’noonniha ikkasi xawisino.
Doogimaru latishshi jeefamanno woyte quchumaho ledote biinfille ledatenni quchuma e’anno daa’’ataano kiiro ledanno yinohu kantiiwu; daa”attote handaara lossate widoonni jawa kaa’lo heedhannosi yiino.
Quchumu doogimaru latishsha lamu garinni hananfoonni yaannohu kalaa Mekuriya; loossa halashshinanni qooxeessubbara gumulantannorenna quchumaho mereeroho gatamarrannire sase qara qara gola amadinoha ikkasi qummeessino.
Halashshate looso 34.5km dibbannore sase qara qara dooggara balaxo uyine gumullanni hee’noonnita qummeesse; dooggate deerra woyyeessate loossa gumulantanno yiino.
Doogga Hayile Rizoorte albi maazzagaaji Membo kaaffenni Hawaasi Riferaalete Hospitaalenna DMC kayisse Hawaasi Yuniversite widoonni kolishshu wayi geeshsha diriirsinoonnire ikkansa xawisinohu kantiiwu; dooggate deerra woyyeessate, lekkaasinu, shalleettetenna bisu xe’ne noonsari doogga, dagate shumate mini hattono fooncho xaphi asse amadannota coyi’rino.
DMC ni Hawaasi seeraamikete ijaari geeshsha noohu doogote latishshi kayinni qooxeessaho afantanno uurrinshuwanni latannota xawise; uurrinshuwa doogga latisate hedotenni 1 miliyoone birri geeshsha fushshitannota xawisino.
Qiddist Gezzaheny
Bakkalcho Maaja 18, 2016 M.D