![](https://press.et/bakalcho/wp-content/uploads/2024/07/Untitled-6.jpg)
Addis Ababa:- Onte miliyoone dijitaalete tekinoloje qajeelshi horaameeyye qansooti Itophiyaho calla ikkikkinni Ahigurenkerano hexxo uyitannoreeti yaanni Xaphoomu ministirchi Abiy Ahimed (Dr) xawisi.
Xaphoomu ministirchi Abiy Ahimed (Dr) onte miliyoone Itophiyu “kooderubba” amuraate oyimbarra sayinsete muziyemera hanafisiisi yannara xawisino garinni; amuraatu onte miliyoone Itophiyu daga yanna woxxitino dijitaalete tekinoloje qajeelshi horaameeyye assannoho.
Tenne jawa kaayyonni horaameeyye ikkitino wedelli Itophiyaho calla ikkikkinni Ahigurenkerano ga`a hexxo ikkitannoreeti.
Itophiyu albillicho la`anno wodanaamma qansootinni hexxo noose yiinohu Xaphoomu ministirchi; onte miliyoone Itophiyu “kooderubba” amuraati ragaanni qajeeltanno wedelli dijitaalete tekinoloje handaarinni Itophiyu hexxo latissannore ikkitannota xawisino.
Itophiyunnita ga`a hexxo ikkitino wedelli qajeelsha illachunni harunsatenni loosu kalaqaano, kubbaaniyu xintaanonna kalqoomu dikkonni heewisante qaxarantannore ikka agarantanno yiino.
Onte miliyoone “koodere” amuraati wedellaho jawa kaayyo ikkinota xawise; wedellu amuraatu aana borreessamatenni dandoonna kalqoomu buuxishshi afansha afidhanno gede loosa hasiissannota coyi`rino.
Rosu handaarinni wedellunna oosote aana loosa hoongummoro hasi`nanni soorro gumula didandiineemmo yiinohu Xaphoomu ministirchi; konne hedote giddo woratennino maate oosonsa, rosiisaano rosaanonsa borreessiisatenni ga`aha Itophiyu hexxo latissanno gede woshshatto shiqishino.
Onte miliyoone Itophiyu “kooderubba” amuraate halantino Arawete Emireetooti ledo halamatenni gumullanniha ikkanna qajeelshu onte miliyoone qansooti dijitaalete tekinolojenni, mannu loosino huwatate dandoonna amadisiisantino dijitaalayizeeshinete dandoonni qajeeltannoha ikkanno.
Amuraatuno sase dirrara gumullanniha ikkinotano buunxoonni.
Qajeelshu lattanno apilikeeshiinubba horoonsi`ra calla ikkikkinni latissannorenna dijitaalete dandoonna egenno noonsa qansoota kalaqa dandiisiisannoha ikkinotano amuraatunni xawinsoonni.
Abbebech Maatewoos
Bakkalcho Maaja 18, 2016 M.D