![](https://press.et/bakalcho/wp-content/uploads/2024/07/Untitled-4.jpg)
Hawaasa:– Sidaamu qoqqowira amandoonni 2016M.D 889 Lukkuwu latishshi qacha tantannoonnita Qoqqowu Saadate Jiro Latishshi Biiro egensiissu.
Sasu barrinni 120 kume Quuphe barrunni kayinni 40 kume quuphe mereerima dikkora shiqinshanni he’noonnitano xawinsoonni.
Biirote sooreessi kalaa Tekile Jonba qoqqowoho handaaru loossa towaanyo assitino odeessaanote gaamora uyno xawishshinni; baxxinohunni, maatete Jireenyi loossa hananfi kawa qoqqowoho gummaamma loossa loonsanni hee’noonni.
Qoqqowoho sai 2015M.D maatete Jireenyi loossanni Lukkuwu, Gereewu, Diidu, Adote latishshi, Qulxu’mete hattono Haarrete da’muulchi latishshinni loosidhe galtinori tantanante qasiisotenni laashshira dandiitanno gede assinoonni.
Lawishshaho, 2016M.D 899 Lukkuwu ceatto qacha tantana dandiinoonnita qummeessinohu Biirote sooreessi; qoqqowoho mini giddo horooonsi’nannihu gobbaanni; sasu barrinni mitteenge 120 kume Quuphe mereerima dikkora sonkanni hee’noonnita xawisino.
Mittu mittunku qachira 120 kumi loosidhe galtinori tantanante Lukkuwa ceatenni Quuphe batinyunni dikkote shiqisha dandiitino yiino. Quuphe batinyuni laashshansanni dikkote xaadooshshi loossa loonsanninsa gede xa’midhanni nootano hattonni.
Gobbate giddo noota dikkote doorsha horoonsi’ratenni Quuphu laalchi dikkote qarra tirate loonsanni hee’noonniha ikkanna; Addis Ababa lede Bahir Daarete, Jigjigahonna wolootta quchummarano Quuphu laalcho sonkannita egensiisino.
Maatete Jireenyi loossanni afi’ra dandiinoonni laalchinni dikkote oolto ga’labbisa dandiinoonni yiinohu kalaa Tekile; kuni loosi hanafamara albaanni qoqqowoho mitticho Quuphicho 14 woy 15 birrinni hirrannitanna xaa yannara kayinni Quuphichu waagi 7 woy 8 birra calla ikkinota xawisino.
Adote laalchino hattonni konni albaanni mitte litire 70-80 birri hirranita qaagiisse; xaa yannara kayinni mitticho litire 45 birrinni Yirgaalamete Agiro Industirera hattono dikkote 52-55 birri geeshsha calla hirrannita coyi’rino.
Tayxe dirinni sa’u 11 agannara calla 7.9 miliyoone ale Quuphunna maalu Lukkuwi caacurre tuqisatenni 540 kumi ale dagoomu bissa horaameeyye assa dandiinoonnita kule; 2kumenna 400 Yuniversitetenni maassante fultinori Lukkuwu ceattonni hattono 1 kumi 787 wedelli kayinni Adote latishshi handaarinni loosu kaayyo kalanqoonninsa yiino.
Qoqqowoho Qulxu’mete, Lukkuwu, Adotenna maalu saada ceattonni, malawu, Haarrete da’muulchi latishshinni xaphoomunni 23 kuminna 144 qansooti loosu kaayyo horaameeyye ikkansa lede egensiisino.
Amsaalu Felleqe
Bakkalcho Maaja 11, 2016 M.D