![](https://press.et/bakalcho/wp-content/uploads/2024/07/450669787_934339582039314_7813573037620187171_n-880x528.jpg)
Hawaasa:– Sidaamu Qoqqowi 6ki doorshu diro 3ki loosi wogga 7ki uurrinshu songo aana babbaxxtino lallawubba la’’e buuxatenni wo`ma huuronni kaajjishino.
Amaalete Minira shiqqino lallawubba eote giwiri, taakiste gashshooti, baadiyyete baatto horoonshi baatooshshinna gibirrinnu loosi eo lallawa, faayinansete gashshooti safote lallawa, woyyaawino yooaanote lallawa, woyyaawino yoote minna lallawa, Affini songo uurrisatenna afamishsha aate fulino lallawanna gashshootu amanyoote gumulate fulinoha xaphoomunni sette lallawa buuxe wo`ma huuronni kaajjishino.
Wole widoonni, Amaalete Mini Xaphoomu Yoo mini bainchu assootinna mussinnunni huluullameenna qaxxarame hunaancho ikkinoha yooaancho geegiissate shiqishino gumulote hedo maccciishshe yooaancho loosunni shorramanno gede wo`ma huuronni kaajjishino. Wole widoonni barraho Qoqqowu Odiitete Biiro Sooreessi Kalaa Simbo Shibbiruhu Odiitete Biiro odiitetenni loonsoonni loossa Amaalete Mini Miillra shqishinoha ikkanna; qoqqowu giddo xa`mama, xawado loosonna dancha gashshoote kalaqate hattono qoqqowu miinja hasiisanno garinni massagatenna gashshate, ammanantino taje afi`rate odiite qaranna mitte hayyo ikkitinota buuxxissino.
Kalaa Simbo shibbiruhu, “Odiitete Biirohu qaru loosi qoqqowoho noota mootimmate uurrinshuwa womaashshunna jajju gashshoote, gamba assinanni eo, shallagote amadooshshinna fulo fajjinoonni doogonninna wodhonni loosamase buuxanno” yiino.
Odiitete Biiro Odiite qorqorto assitinohu qoqqowu mootimmate biiro giddo noo mootimmate uurrinshuwa ikkitinota qummeessinohu Biirote Sooreessi Kalaa Simbo, xaphoomunni 186 biironna uurrinshuwa aana odiite assinoonnita buuxisinno.
186 mootimmate uurrinshuwa aana odiitete looso jawa illacha tunge loonsoonniha ikkanna; assinoonni odiite qorqorto garinni minshenna xe`ne nookki biiro onte calla ikkitinota buuxisino.
Wolootta biiro kayinni shiimunni kayse jajjabba miliyoone birri geeshsha addi addi daninni xawinsanni odiitete xe`ne noonsata qummeessino.
Xe`ne, minshenna womaashshu gashshooti aana foonqe nookki biiro, Xaphoomu Yoo mine, Amanyootunna Tsere Mussinnu Komishiine, Dagitte Owaantenna Mannu jiro Latishshi Biiro, Gorsu Latishshi Biironna Farcote Biiro ikkitinota kalaa Simbo Amaalete minira xawisino.
Amaalete minino ripoorte macciishshi gedensaanni seeda yanna adhe torbihu gedensaanni wo`ma huuronni kaajjishino.
Abrahaam Saamueel
Bakkalcho Maaja 11, 2016 M.D