Itophiyu atileetiikisete federeeshiine qixxeessitanno diru heewubba mereero bareedu Shaambel Abbebe Biqilihu maaraatoone mitto ikkitanna, tayxe 40ki yannara Hawaasi quchumira sa”i sambatu barra harinsoonni. Oromiyu polise atileetootino heewo aliidimmatenni jeefissino. Lame doyichubbanni 42 kiilomeetire xeertinye dibbino heewonni labballunni Gosa Ambelu; seennunni qole Kureni Jeliila qeelaano ikkitino.
Qoqqowunni, quchumu gashshootinninna kilabbatenni filantino atileetooti beeqqitinoti tini heewo luphiima heewisamano dukkissinotenkanni. Lamunku koo/teenni xaa noorinna rosichu noonsa atileetooti heewisantinoha ikkanna; barraho noo diilallote akatino kaa’linonsankanni. Labballu atileetooti mereero goofimarchu geeshsha assinoonni cinca guddanno heewonni 37ki kiilomeetire geeshsha qeelaancho badate harishsho qarrissinotenkanni.
Kaajjado ikkitino heewo goofimarchunnino Oromiyu polise atileetichi Gosa Ambelu qeelaanchimmanni gumulantino. Atileetichu gattino 5 kiilomeetire maala’lissanno rankenna jeefishshinni diwatenni culku meedaaliya eessira dandiino. Heewotenni luphiima heewisama leellishatenni Gosa ledo goofimarchu geeshsha sharro assinohu Itiyo atileetiiki atileetichi Gizewu Abejje layinkiha ikke e”atenni birru meedaaliya adhinoha ikkanna, Omedilunnihu Sahilesillaase Nigusu qole sayikkiha ikke nahaasete baraarsha afi’ratenni heewo jeefisino.
Seennu widooonnino maala’lissanno heewonna qeellete sharro la’noonniha ikkanna; Oromiyu polise atileetitte Koreni Jeliila maala’lissanno ikkadimmanni qeelte culku meedaaliya umiseha assa dandiitino. Qeelaanchimmate heewonni goofimarchu geeshsha sharrantinoti Omedilunniti Muluhabit Tsegga layinkita, woleno Oromiyu polise atileetitte Yaadene Alemaayyehuti qole sayikkita fulatenni birrunna nahasete meedaaliyubba eessitino. Atileetootu jawiidi maaraatoonete heewonni agarroonnikki guma borreessiisatennino dhaggennita ikkitinno qeellete ayidde ikkitino.
Labballu heewo qeelaanchi atileet Gosa Ambelu; bayiriidi atileetichi Aabbebe Biqilihunni su’minsoonni maaraatoonete heewonni qeelatenni jawu hagiirri macciishshaminosita coyi’rino. Atileetootu mereero noo heewisama kaajjado ikkitinotanna 20ki kiilomeetire geeshsha ayirritinositanna 25ki kiilomeetirera iillita kayinni shottanni dagginosita xawisino. Heewo 32 kiilomeetire aana iillita 200 meetire xeertinyinni massaganni noo kilawete atileetichi aana iillate hede albira sa“asi hedikkinni qeellaancho assitinosi.
37 kiilo meetirera atileeticha sa“ihu gedensaanni mooraale macciishshantinositanna hatte rankenni dode qeelinoha ikkanna; diilallote akati waajjinoonninte gede ikka hoogasi kaa`linosi. Albbillicho agartannosi kalqoomu heewubbara fooliishsho adhihu gedensaanni qajeelshaanchu ledo kaajje loosatenni konninni woyyino guma borreessiisate loosannotano huwachishino.
Seennu heewonni qeelle assitinoti atileetiitte Kureni Jeliila ise widoonni heewo qeelasenni jawu ayirrinyi macciishaminoseta coyidhino. Heewote aana jajjabbanna ikkadimma noonsa atileetooti beeqqansanni kaajjado heewo dukkinsoonni. Kilawese atileetooti ledo gaamote loosinninna irkisamatenni goofimarchu yannara heewo tonne atileetooti mereero ikkitino yannara deerra amadde jeefisate hedde albira fulatenni qeeltara dandiitino. Maaraatoonetenni dancha saate heedhuserono ilatenna gawajjote korkaatinni seeda yannara heewotewiinni xeertidhe higguhu gedensaanni qeelasenni hagiidhitinota xawissino.
Federeeshinete heewotenna beeqqote dayirekiterichi kalaa Asfawu Daanye; Itophiyu champiyooninni aane bareeda ikkinohu Shaambel Abbebehu maaraatoone Hawaasi quchumira iibbadu garinni harinse jeefinsoonnita xawisino. Haammata atileetooti beeqqitinnonna luphiima heewisama leeltino heewo konnin albaanni gumaamma ikkitino Omedila labbino kilabba gumu widira higansa jawa seyooti. Bareedda atileetootino noonsa kalqoomu heewora umonsa keentanno gede kaa`lannonsatano lede huwachishino.
Seennu gaamonni Oromiyu polise 17nna labballunni Omedila 35 bixxillubbanni umire ikkite jeefisatenni boowete ayidde ikka dandiitino. Seennunni Itophiyu daddalu baanke 39nna federaalete seejjote mini 53 bixxillubbanni layinkinna sayikkiha ikkite jeefissinoha ikkkanna labballunni Mechaalinna Oromiyu polise 52nna 61 bixxillubbanni layinkinna sayikkiha ikkite heewonsa gumultino.
Abbebech Maatewoos
Bakkalcho Maaja 4, 2016 M.D
