Chaynaho Nanjingi harinsoonnihu kalqete mini giddoydi champiyoni sa’u lamala goofimarchira jeefisami woyte Itophiyunniti beeddakko atileetitte champiyonaho gobbasera layinkiha culqu meedaaliya borreessiissino.
Gudaaf heewo 3:54.86 ikkitino champiyonu bayi’ra yannara albisa ikkite guddanno woyte, wole Itophiyu beeddakko Dirribe Wolteji 4.5 lipheessa gede`nite birru meedaaliya wodhitino. Kunino wedellitte atileetittera champiyoonaho umikkise medaaliya ikke borreessamino.
Gudaafira xeertote 2ki culqa ikkanna, AKG 2016 camote medaaliya borreessiisase qaangannite. 2022 kayinni 3000 meetirenni wodhitino birri ledo heewote 4 meedaaliya lukkino atileetitte assinose. Kunino muxxe ikkitino Atileetitte Genzebe Dibaabite dhagge beeqqitanno gede dandiisinoseha ikkanna; heewote dhaggenni 1500 meetirenni lame culqa luka dandiitinoti callicho atileetitte Genzebe callaatinkanni.
Itophiyu culqa borreessiissanno yine agarroonni seennu 800 meetirenni beeddakko Atileetitte Tsigge Digumiti kayinni diborreessiissino. Ikkeennano agarroonnikki wedellitte Itophiyunniti Nigisti Geetaachew 1:59.63 layinkita fulatenni birru meedaaliya lukkino. Kunino xeertote dhaggenni layinki Itophiyu birru medaaliya ikkino.
Itophiyu heewote beeqqa hanaffunkunni kayse tayxeha lendikkinni 33 culqa, 14 birranna 16 camote meedaaliyubba gamba assatenni Ameerikunna Ruusiyunni aante kalqetenni sayikki deerri aana ofoltanno. Tayxeno champiyonaho konne deerrase sufissino.
Amadantino mashalaqqenni Chaynaho Nanjingi quchumira harinsoonni mini giddo champiyoonira leeltino maala`lissanno gumuluwa mereerinni labballu 3 kumi meetire batinyu wodana goshooshshinote; ispoortete maateno naaddinote.
Maala’lissanno heewonni xueessunni balaxame birru meedaaliya gobbasira borreessiisino Itophiyu Atileetichi Berihu Aregaawi; konni champiyoniyra Itophiyu Atileetikse Federeeshiinewiinni shiqqinosi woshshatto adhinohu hallanyunni beeqqara qixxaawinota boco maaratoone heewo huneeti.
Kuni duuchaho lawishsha ikkara dandaanno loosino gaamo gobbase widira higase harunse galatisiisinosiha ikkino. Champiyoonaho kalqetenni 3kita Afrikunni kayinni albisa ikkatenni jeefissinoti atileetiksete gaamo tenne lamala giddo Boole kalqoomu diilallote doogo iillitu woyte IFDR budunna ispoortete ministire hattono federeeshiinete loosu massagaano hawalle keere daggini yite haadhinonsa.
Mereerimmanna seeda xeertohu worbu Atileetichi Berihu Aregaawi hallanyisi heewo agure gobbasira birru meedaaliya afisiisasinni macciishshaminosiha jawa hagiirre xawisino. Beeddakko wedellichi mini giddoydi champiyoona beeqqate mixo hooggusirono shiqqinosi woshshatto garinni lame lamala qixxaawo yannanni barete umikki yannara gumaamo ikkino.
800 kumi seenu olompiike worba Atileetitte Tsigge Diguma jeefishshaho agarroonni garinni meedaaliya borreessiisa hooggurono wole atileetitte Nigisti Geetaachew birru meedaaliya adhitino. Itophiyu ispoortete akkaadaame guma ikkitinoti tini wedellicho atileetitte umikki yannara beeqqitino champiyooni ayirrinoha ikkirono gumaamimmatenni gumulasenni hagiirraamete. Rosichu noonsa atileetooti ledo doddinoha ikkirono umise hayyonni dodase meedaaliyu ha’nura assitinose. Suffeno 800 nna 1 kumi 500 meetirenni gobbase kalqoomu champiyooni gedee barubbara riqiwate kaajjite loossannota hedose uytino.
12 atileetootinni shiima xeertuwanni kalqete mini giddoydi champiyoona beeqqitinoti Itophiyu 2 culkunna 3 birru mitteenni 5 medaaliyubba borreessiisatenni Ameerikunna Norweyinni aanchite guddino. Konnirano korkaata ikkinohu qajeelsaanotenna atileetootu mereero noo amaalamme ikkase gaamo massagginoti federeeshiinete loosu gumulsiisaano komite miila Baabba Abeba Yusuufi qummeessitino.
Federeeshiinete pirezidaantichi albisu Atileetichi Silesh Sihini isi widoonni; gaamo afisiissino gumi albillichote dancha malaate ikkasiiti xawisinohu. Sunfeno champiyoona kaima assatenni loosama hasiissannonsa qixxaawubba gobbate giddoydirano ikko kalqoomu heewubbara kawaanni qolle assinannita ikkitanno yiino. Gumaame gaamorano harunsine jawaachishshaho woxu baraarsha uynanninsata buuxisino.
Atileetootaho hawalle keere daggini yaanno hasaawa assinohu IFDR budunna ispoortete ministire ispoortete handaari ministire deeti Mekkiyu Mehaamedi; Itophiyu atileetikse qeelle rossinota ikkasenni ‘’Itophiya Naaxxissinoonnise’’ yiino. Ispoorte gobbannita sarraaqantino mitiimma tirate wolqa nooseta ikkasenni tenne doogonni loosatenni suffe heedhanno heewubbara qixxaawa hasiissanno yiino. Konnirano ispoortete qara mitiimma ikkinohu hoshshote bayichuwinna memi anje mulenni tiro afidhannota qummeessino. Daanno kalqete champiyoonirano atileetootu qixxaawonsa tiraakete aana assitannotano qaale eino.
Demmellaash Demmeqe
Bakkalcho Badheessa 18, 2017 M.D
