Riqiwamaano ispoortete ogeeyye kalaqate harinsanni gobboomu heewo mereerinni mitte qacale wedelli keeno heewooti. Tini gobboomu heewo sa’u lee dirrara murante keeshshitinoha ikkanna tayxe haaru garinni hananfoonni. IFDR budunna ispoortete ministere qixxeessitannoti tini heewo tayxe 8ki yannara Wodiidi Itophiyi qoqqowira wolayitta Sooddote quchumi qixxeessonni bero hanafantino.
Heewo “qacale ispoortete maate latishshi qeelaancho gobbara” yaanno adawarshinni Wolayitta Sooddote xawira iibbadu amanyootinni hananfoonniha ikkanna dargaho leelte hasaawa assitinnoti IFDR budunna ispoortete ministircho dukko Shewwit Shanka; mootimma sa’u onte dirra giddo ispoortete uyitino illachinni baxxinohunni ispoortete safote latishshi gatamarshi aana loosase xawisse; 2017 M.D nni murante keeshshitino heewubba hanafantanno gede sharro assitanni afantannotanna kunino baxxino garinni illacha tungeenna kaajje sufannota huwachishinno.
Ministirchote xawishshi garinni; Ispoortetenni qeelaancho gobba kalaqate qacalete sufo noo qajeelsha 17 ispoortete daninni uyinanni. Babbaxxitino qoqqowubbara konni qajeelshi giddo afantanno 2 kumi ali qacale murante keeshshite marro hanafantino heewo beeqqaanooti. Heewotenni jawaante, gaamote looso, ayirrisama rosatenni sainohunni qajeelshu mereershuwaranna gaamote filamate kaayyo afidhanno.
IFDR budunna ispoortete ministere ispoortete latishshi ministr dieeti kalaa Mekiyu Mehammedihu isi widoonni; gobboomu deerrinni murante keeshshitinori addi addi heewubba marro hara hanaffinota kayise; Kuri mereerinni qacale wedelli keeno heewo mitte ikkase xawisino. Qacale ispoortete ogeeyye aana loosa ispoortete lopho aana luphiima qeecha afidhinota coyi’rinohu ministr dieetu; kunino gobbate gede ispoortete handaarinni leeltanno foonqe diwate dandiisanno yiino.
Dirrate gedensaanni hananfoonniti qacalete keeno heewo aantete suffino barrubbara harinsannita ikkase qummeessatenni; ispoorte gobbanke qarra tiratenna jaalooma kaajjishate kaa’litannota ikkasenni gobboomu deerrinni halashshatenna dagoomu bude ikkitanno gede loonsanni hee’noonnita coyi’rino.
Ministir dieetu xawishshi garinni፤ministerete loosu mini assino xiinxallo garinni ispoortete hiiqqamme sissate loonsanni hee’noonniha ikkanna baxxinohunni foonqe leeltino ispoortete seerinna loosu harinsho aana hattono heewote aana illacha tungoonni.
Fanote barra baalanka hanqaffinota mannimmate guunte Sooddote xawira harinsoonniha ikkanna simpooziyeeme hattono chiginyete kaashsho quchumu gibrinnu kolleejera harinsoonni. Mannimmate guunte baalante basera uurrinshunni suffanno gede assinannitanna dagate mereero roduuwimma, mittimmanna gobboomu su’ma biifisate bude assine loonsannita ministircho dukko Shewwiti qummeessitinno.
Heewo hanafasera balanxe hasaawa assinoonniha ikkanna; qacale wedelli ispoorte qajeelsha la’anno hajubba hala’ladunni ka’ino. Qcalete ispoorte latishsha ikkase garinni gumunni keenama woyi bikkama hasiissannose yitanno hedo aana hasaawa assinoonni. Kunino wo’mante kalqera loonsannita ikkitanna qajeelshunni ikkadda ikkitino qacale harinshotenni qajeelshu merershuwanna kilabba karsantannore ikka hasiissannonsata qummeessinoonni. Filatenni qajeelshu geeshsha handaaraho leeltannore diru suwashshimmanna qajeelshu harinsho aana loosa hasiissannota kulloonni.
Heewo gobboomu qacale wedelli ispoortete qajeelshi qixxaawo qajeelsha uyinanni afammanni 11 ispoortete daninni lekkate kuwaase, Atleetikse, Volli bool, waa daaha, Xarapheezu teenise, Bokse, tekwando, Qircaatete kuwaase, angate kuwaase, Shalleette, Paaralimpikenna macciishsha dandiitannokkiri (Deef Spoort) harinsanniha ikkanno. Baalante qoqqowubbanni fultinori 2 kumi 656 ikkitanno qacale beeqqaano ikkitanno.
Heewo qacale wedelli ispoorte qixxaawonni lame dirrara qajeeltanni keeshshitino qacale qajeelshu islanchimmanna gummaa’ma keenate widoonni foonqe bande woyyeessatenni aleenni qajeelshu uurrinshuwa, kilabbanna biheraawe gaamo riqibbannori hexxo tunganninsa qacale doorate dandiisanno yine agarranni.
Qiddist Gezzaheny
Bakkalcho Arfaasa 29, 2017 M.D
