![](https://press.et/bakalcho/wp-content/uploads/2024/07/448986344_786668336989957_3555680781792128620_n-880x528.jpg)
Kalqete aana lophitanni noo gobbuwannino lowontanni kullannire ikkitanni daggino handaarra mereerinni mittu ispoortete turizimeeti. Hanafote aana afantannoti Itophiyuno muli yanna kawa handaaraho illacha aatenni jawaachishshanno loossa gumulate aana afantanno. Tenne ledo kayinsanni assootubba mereerinnino muli barri giddo babbaxxitino handaarra aana bobbakkino xiiwo kalaqqanno hallanyoota beeqqissino “Shenen Afriku festivaale” mittoho. Sase barrubbara harinsoonnihu ahigurete deerri faashinete, turizimetenna ispoortete festivaaleno ispoortete turizime baqqi assate ragaanni luphiimu qeechi noose.
Festivaalete gumulantino amuraatta mereerinni mittu ispoorte ikkanna; IFDR xaphoomu ministirchi Abiy Ahimed beeqqino baxillaanchimmate godo`le albi lekkate kuwaase beeddahe ledo Wedaajinneti paarkera kiiro lame assinoonni. Bareedda Nayjeeriyu biheeraawe gaamo godo`laano Nuwaanko Kaanu, Daanieel Amokaachi, Taariibo Weest hattono Awuroppu liiguwanni godo`linohu Senegaalichu Henri Kamara qole festivaalete aana afantino ispoortete ayiddeeti.
Lekkate kuwaase godo`le harunseno xaphoomu ministirchi Abiy Itophiyu Afriku boowe qixxeessate xa`mo shiqishshinota buuxisiisino. Anfinte gede Itophiyu Afriku boowe xintaano gobbuwa mereero mittete. Ikkollana barete noose beeqqono ikko qixxeessate dhagge harinshotenni shaangitanni daasenni lekkate kuwaase ayiddi qaaggotenni calla hee`ranno assino.
Ahigurenniha jawiidi lekkate kuwaase heewo dukkisatenni ispoortete ayiddi halcho adda assate mootimma xa`mo shiqishshe balaxote qixxaawote loossa gumulate aana afantannota buuxisino. Afriku boowe dukkisa sarraaqantino harinshubba xa`mannota coyi`rinohu xaphoomu ministirchi yannate Afriku lekkate kuwaase konfedereeshiine pirezidaante ledono hajote aana hasaawa assinoonnita buuxisino.
Afriku boowe Itophiyaho harase Itophiyunniha lekkate kuwaase baqqi assatenni sae su`mahonna turizimete handaari baqqeenyira jawa horo noose. Konni kaiminni Afrikunniti jajjabba albi lekkate kuwaase godo`laano Itophiyu widira daansa tenne Itophiyu mixo egensiisate jawa kaayyo kalaqqanno. “Bayriidi qolchansho Itophiyaho Itophiyu ayimma leellishate ragaanni noose horo kulatennino aantete farado gulufa lede babbaxxitino ispoortete handaarranni loonsanni loossa kaajjite suffannotano buuxisiisino yaatenni Itophiyu odoote owaante odeessitino.
Albiri Afriku lekkate kuwaase beeddahe lekkate kuwaase godo`lenni sae chigginye kaasatenni haanja harumansa wortinoha ikkanna; babbaxxitino latishshu loossano towaattino. Konne harunseno Arsenaali lede Beayaakis, Intermiilaan, Westbiromiichinna Portismawu kilabba godo`linohu Nuwanko Kaanu; Itophiyu lowontanni biifadunna dhaggeeffachishanno budi noose gobba ikkase xawisino. Itophiyaho noonsa keeshshonni noo wosinsi`ranna amadooshshu minensa noohu gede macciishshamannonsa gede assasinni aanteteno Itophiya wirro higge daannota; hattono xaphoomu ministirchi Itophiyaho noosi ajuuja kaima asse gumulanni noota latishshu loossa towaattinotano coyi`rino.
Wole Nayjeeriyichi albi Intermilaaninna Eesi Milaani godo`laanchi Taariibo Weest isi widoonni; Itophiyaho gumulantanni noo latishshu loossa xaphoomu ministirchi gobbatenni sae Afrikaho noosi ajuuja leellishshannota huwatasi buuxisino. Xaphoomu ministirchiti Afriku boowe Itophiyu qixxeessitanno gede assatenni gobbanniha lekkate kuwaase baqqi assate mixo adda ikkitannota noosita dancha halcho xawisino. Albi ahigurete jajjabba godo`laano Itophiya daansa Itophiyu ledo xaadooshshe kalaqatenni lekkate kuwaase budi woyyaawanno gede injaanno akata kalaqanno. Nayijeeriyu biheeraawe gaamo miila ikkinohu wolu godo`laanchi Daanieel Amokaachi keeshshonsanni Itophiyu daga ayirrinyunninna baxillunni wosinsidhinonsata coyi`rino.
Abbebech Maatewoos
Bakkalcho Ella 27, 2016 M.D