Dombophiichote care yaa babbaxxitino korkaattanni dombophiichote ufuuffa giddo kalaqantanno careeti.
Ikkinohura tini care noosi manchi qiwaate noonsa sagalla saga`lanno yannara carubba kuusantino dombophiichote du`namaano ledo mitteenni shimiidi helleete kifilera fulate wo`naaltanno woyte dombophiichote ufuuffa goowu boombe giddo gatatenni masmara yannate geeshsha cuffanno; hatte yannara godowu xisso kalaqantanno yaate.
Dombophiichote care godowu xisso akatoomisenni
Aliidi qiniiticho godowu woyi aliidi mereeri godowu qarqarira macciishshantanno xisso ikkitanna saltote xisso ledo lawisantanno.
Xisso taxxi yitukkinni 1-5 saate geeshsha keeshshitara dandiitannonna hakkiinnino agurtannota, qiniitichote widinni badhera higge hadhanno woyi badhete xisso ledo amadisiisantara dandiitanno.
Xissote ledo amadisiisaminohunni looqqi assanna tushshiishano kalaqantara dandiitanno; batinye yanna looqqi assate macciishshamme heedhannohura meessi hasattonni kokke angichunni kisatenni tufate wo`naalshino hee`rara dandaanno.
Batinye yanna tini xisso kalaqantannohu hashsha hashshanna baxxinohunni qiwaate noonsa sagalla woyi mitte yanna giddo baca sagale intirooti.
Tini xisso saltonna hellee saga`linoommo sagalla daakkenna karsiisse gudda geeshsha dombophiichote ufuuffa care giddo cufantinonte gede keeshshite kuni sagale daahate amanyooti goofanno woyte dombophiichote ufuuffa millimillo ajjannohura cufantino care dargase higganno; hatte yannara xisso ba`anno yaate.
Garunni buuxo assine afa hoongiro konne dana labbanno akattanna xisso wirro wirro hige kalaqantanno yaate.
Ikkolla ikkinnina kuni akati wirro wirro higannoha ikkironna yannantenni xagisa hoongiro xagisatenni qarunni lowo geeshsha waajjishshannonna heeshsho danote aana tuggara dandiitannore sase fayyimmate mitiimmubba iillishshanno.
- Dombophiichote ufuuffa infekishiine kalaqama
Qarunni leellanno malaati dombophiichote care malaatta noowa heedheennanni xisso baxxitannohu:-
24 saate ale keeshshitanno, xagisa hoongiro mudditanno, aliidi qiniiticho godowu kifilenna badhete widira hadhanno xisso hattono
Iibbabbo heerate.
- Dombophiichote du`namaano shiimiidi helleete sayisaano boombe cufamanna infekishiine kalaqa
Dombophiichote care dani xisso noowa heedheennanni qarunni leeltanno malaatta:-
Iibbabbisha
Illete kuuli baqqala ikka
Bisu hangaarsiisa
Shumate kuuli kolishshiranna cilu kuuli waajjirate.
- Saltote infekishiine
Qarunni leeltanno malaatta
Kaajjado ikkino aliidi mereeri godowu kifile xisso
Amadisiisame xisso mereeri godowu kifile sa`e badhera hadhannotanna
Hallunni albira shootti woyi heeshshi yiniro ajjanno xissooti.
Konni daafira xaphoomunni amaallanni coyi mitte higeno ikko marro hige dombophiichote care malaatta kalaqantu`neronna altirasawundete buuxonni dombophiichote care afantino`ne mannooti heedhiniro wirro wirro higge ka`anno godowu xisso shettonni hurate hattono xawinsoonnita sasentanni kaajjado fayyimmate mitiimmubba balanxe gargadhate darre xagisira hasiissanno`ne.
Ledotennino carete bikki 2.5 saantimeetirenna hakkunni ale ikkiro dombophiichote ufuuffa kaanserera reqecceessate kaayyo noosihura malaatu hoogi`nerono darre xaginsanni xaginaate assira hasiissanno.
Darre xaginsanni xaginaate assineemmo woyte care calla ikkikkinni wirro kalaqantannokki gedenna carete kalaqamara korkaata ikkino dombophiichote ufuuffano mitteenni hunnanni gede assineemmo.
Dombophiichote care darre xaginsannihu lamu daninni ikkanna:-
- Fano dombophiichote ufuuffa huna
Konne darre xaginsanni xaginaarte qiniiticho aliidi godowu gidgiddu kifelera godowa fanne loonsanni darre xaginsanniho.
- Kaameerunni irkisamino dombophiichote ufuuffa huna
Kuni qole godowu gidigidda fannikkinni shoole base aana shiimmaadda xulluwa kalaqatenni kaamurunni irkinse la`nanni loonsanni darre xaginsanniho.
Darre xaginsihu gedensaanni ranke hura dandiinannikkihuranna amadisiisantino qarrubba kalaqamate kaayyonsa aja ikkitinohura fano darre xagisate xaginaatinni roore kaamerunni irkisamino darre xaginsanni xaginaati dooramaanchoho.
Ikkolla ikkinnina aleenni xawinsoonniri xissote malaatta heedhu`nekkinni hedeweelcho altirasawundete buuxonni dombophiichote care afantino`ne mannooti heedhiniro hasiisannoha ikke leelliro ikkinnina darsiisidhi`ne xagisira dihasiissanno`ne yaate.
Bue:-Hakim
Abbebech Maatewoos
Bakkalcho Ella 13, 2016 M.D
