Surrete xisso maati?
Surrete fayyimma yaa mittu manchi umisi dandoo huwate rosantinota heeshshote hekko dandee gummaamo looso loosannohonna dagooma kaa’la dandaanno fayyimmate akataati. Gurchunni surrete xisso kayinni macciishshammete, hedotenna amalu soorro gamba asse amadanno fayyimmate qarraati. Wole widoonni surrete xisso yaaddotenni, dagoomittete heeshsho, loosu woyi maatete ledo noonke millimillo ledo amadisiisante leeltanno qarrubbaati. Surrete fayyimma qarri mitte baxxitino gaamo woyi dagooma gawajjannoha ikkikkinni, baalanta dagoomu bissa qarru gawajjamaano assannoho.
Batinye daga surrete xisso aana noonsa huwanyo sodhinota ikkiturono; xisso hiittene mannimmate xisso gede yaano wodanu xisso woyi sukkaarete xisso gede kalaqamanno qarraati. Surrete fayyimma qarri batinye meessineeti, qooxeessu, ayyaanaamunna poletiku akatubba mereero noo sarraaqantino ikkitubba gumaati. Kuri mereerinni heeshshote hornyanna keeraancho ikkinokki amale (lawishshaho; sijaara wiliishsha, jallaagissaanno xagga horonsi’ra), luphiima meessineetinna loosu base mitiimmubba, babbaxxitinoti buqqqeetenna mannimmate gano amaddanno.
Buqqeete xaginaati (psycho therapy) maati?
Buqqeete xaginaati yaa hasaawunni gumullanni xaginaatu dana ikkanna; mittu buqqeete ogeessinna mittu owaante hasi’rannohu mereero gumullanni xaadooshsheeti. Hasaawu wolootu hasaawu daninni baxxannoti addi addi xawishshubba no.
Buqqeete xaginaati wolootu hasaawu daninni baxxannohu umihunni sayinsitte hayyubba horonsi’rasiiti. Togo yaa xiinxallotenni irkisantinore mannootu hedo, amali, macciishshamme, dagoomittete xaadooshshinna mannu heeshshote deerrinni gummaame soorro abbannoha ikkasi leellishanno.
Xaginaatunna wolootu hasaawu daninni baxxanno xawishshubba mereerinni wolu umisiha ikkino biddissi hattono xaginaatu kaimanna iillo afi’rinoha ikkasiiti. Konni aleenni ogimmatenni qajeelino ogeessinni uyinanniha ikkasi baxxannoha assitannosi.
Surrete xissonna buqqeete xaginaate
Itophiyaho balaxaancho ikkatenni surrete xissamaanora fayyimmate owaante uyitanni afantanno Amaanueel surrete baxxitino.
Hosptaale safantu yannanni kayisse goxxe, hodhitanni, hedeweelchu xaginaati, umu giddi buuxo, elektirikete huxano xaginaate, qaaqquullu surrete xaginaati, seeru ledo amadamino surrete xaginaatenna buuxo (Foorensik) hattono nervete xaginaati owaante uyitanni afantanno.
Amaanueeli surrete baxxitino Hospitaalera uyinanni xaginaatu owaantenni buqqeete xaginaati owaante mittete. Surrete xisso sarraaqamanna duuchu Dani korkaatta afidhinota ikkitino daafira qarra tirate babbaxxitino ogeeyye ledo qinaambe loosa agarantanno.
Kuri xaginaatu owaantenni mittu buqqeete xaginaate ikkanna; surrete fayyimma handaari dagoomittete, buqqeete qarrubbara eewaancho soorro abbate widoonni jawu qeechi noonsa. Fayyimmatenna xissote hedo huwatate widoonni qara qeecha fulanno.
Buqqeete xaginaati buqqeete qarrubba, mannimmatenna surrete fayyimma ledo xaaddannota dagoomittete qarrubbanna akatoomu xe’ne xagisanno. Ledoteno amale woyyeessatenni,canco gargaratenna xagisi’raanote heeshshote dandoo lossate umisi qeecha afi’rino.
Amaanueeli Hospitaale xaadooshshu giddo fayyo ikkitinokki sumimme noonsa surrete xissamaanora, barru barrunku loosonsa, dagoomittete heeshshonsanna maatensa ledo surrete xisso korkaatinni qarrantino heeshshote tunceenyira addi addi xaginaatu hayyo horonsi’ratenni xissamaano xissonsa uminsanni dandaate, keeraancho dagoomittete xaadooshshenna meessineetinni irkirate dhuka ledatenni hodhite, goxxenna woyyimmate mereershira buqqeete xaginaate uyinanni.
Xaphoomunni Amaanueeli surrete baxxitino hospitaale surrete xaginaati gumaamo ikkanno gede buqqeete owaante wolootu surrete xaginaati gede tuqqanno gede baxxino illacha tugge addi addi loossa gumultanni afantanno.
Qiddist Gezzaheny
Bakkalcho Badheessa 4, 2017 M.D
