Lamu agani calla gatino Paarisete olompikera gobbuwa Atleetiksete gobboomitte gaamonsa xawo assitanni afantanno. Atiletikisete Ispoortetenni agarranni gobbuwa mereerinni afantannoti Itophiyu babbaxxino xeertinyira Atleetootase egensiisse qixxaawo hanaffinoha ikkanna; quqquxammoonnita maaratoonete gaamono xawo assinoonni. Kunino waajjishshanno maaratoone yiisiissara dandiitannota kalqoomu tuqu xaadooshshuwa odeessitanni afantanno. Baxxinohunni Atleetiksete baxillaano wodana goshooshshinoti kayinni macca Atleetichi Qenennisi Beqqelehu seeda dirra gedensaanni marro Olompikenniwa higasiiti.
Itophiyu Atileetiksete federeeshiine xawo assitino Atleetootu ayimma garinni meentu Maaratoonenni kalqoomu wiinamu yanna amaddinoti Atleet Tigist Asaffiti, kalqoomu shaampiyoona Amaane Bariisotinna Megertu Alamuti doorantinoha ikkanna; kalqoomu shaampiyoona gummaame Atlileetitte Goyititom Gebresillaaseti hattono Buze dirriiba aantaano heewisamaano ikkitino. Labballunni kayinni sai aganira harinsoonnita Bosteni maaratoone qeelaancho ikkinohu Sisay Lammihu, Zuurik (Seville) maaratoone qeelaanchi Derreesa Gelata hattono sai aganira Lendenete maaratoonenni lipheessunni calla qeelame layinki deerra amade gumulinohu Itophiyu duuchunku woyti bareedda mereerinni mitto ikkinohu Qenennisi Baqqalihu dooramino. Origeni kalqoomu Shampiyooni Atleet Taammiraat Tolanna Useddin Mehammedihu aantaano Atleetoota ikkansa xawinsoonni.
Doorsha harunse konni xeertinyinni xiiwo kalaqatenni afantanno Soojjaati Afriki gobbuwa mereerinni mitto ikkinohu Itophiyu Paarisete aana dhaggete guma borreessiisate dandiisanno gaamo amadino. Tenne odoo xawo assitinoti Itophiyu Atleetiksete federeeshiine dooramaano harunsite doorshu daafiranna bikkaanchu shiqishino tittirshi hoogirono; Atleetootu noonsa yannate ikkadimmanna maaratoonete wiinamu yanna garinni dooramansa egensiissino. Baxxinohunni labballu widoonni macca Atleetichi Qenennisi Baqqalihu gaamote giddo hanqafante heewo balaxotenni agarantannota assitinose. Seedu xeertinyi Atleetikse bareedi batinye ayirrinye afi’rino ba’re xeerti’rinkunni 12 dirra gedensaanni dodannoha ikkanna miteekke goofimarchu beeqqosi ikkitara dandiitanno yine hendanni.
Qenennisi afamino seedu xeertinyi memete heewonni doogimaru hewowa reekkamihu gedensaanni ispoortete maate rossino guma agadhirotuno higge higge xaaddannosi gawajjo korkaatinni maaratoonete albisa ikkara didandiino. Sa’u dirrara 18 ikkitanno kalqoomu jajjabba maaratoonete heewo aana beeqqaancho ikkatenni qeelle afi’rara dandiino. Ikkollana konni xeertinyinni deerra amadate hasatto 2 lipheessinni gede’nite adda ikkitada didandiitino.
Faranjootu 2019 Berliinete maaratoonenni 2 sa’’aate, 1 lipheessinna 41 xu’eessa ikkitino yannanni e’’inohu Qenennisa Beqqele xeertinyunni sayikki woyyaabbino yanna Atleetichaati. Aanino diro 42ki dirosi ayirrisannohu kuni maala’lisanno Atleetichi agannate albaanni Vaalenshiyaho 4ki deerra amade jeefisanna Lendenete kayinni qeelate assinohu kaajjado wo’naalshi dhaggeeffachishannoho.
Kiirre fullannikki Atleetiksete qeellesi mereerinni sasente Olompikete beeqqosinni sase culkunna 1 birru meedaaliyubba hattono mitto dipilooma borreessiisino. Umi kalqete shampiyooni aana beeqqo assatenni Culkunna Camote meedaaliyubba adhinowa paarisete agarranni olompikete beeqqosinni layinkimeeshsho higanno.
Qenennisi dirrate gedensaanni heewote aana leellasira qoteho hajo roorenkanni agarrannita assitinoti kayinni memetenni doogimaru geeshsha wo’munku woyti hettisamaanchosi ikkino Keeniyu Atleetichi Eliyud Kipchege ledo xaadasiiti.
Lamunku Atleetooti Maaratoonete qeelaanchimma gobbaanni beeqqonsa kalqete amadantino yanna woyyeessate ikkinota kulloonni. Atleetiksete heewonni seeda dirrara mootoo’mite keeshshitinori lamunku dhaggeeffachishshanno Atleetooti lamu lipheessinni balaxamansa woyyeessate mimmitinsa ledo assitanno qolchansho heewo kaajjishshara dandiitanno yine hendanni. Konni gobbaanni kayinni maaratoonete bareedda wedellu Atleetootira jawa ayirrinyenna heewisamaanchimmatenni millimmonna kakkaooshshe bowirsidhanno hedeweelcho kalaqase digattanno. Baalunkuri aleenni kayinni Atleetiksete maate calla ikkitukkinni Atleetiksete ispoorte dhaggenni de”antara dandiitannokki dhaggeeffachishshanno ikkito Olompikete iibbille ikkitanno maaratoone ikkase addaho.
Qiddist Gezzaheny
Bakkalcho Onkoleessa 29, 2016 M.D
