Manchu lowo geeshsha umosi baxannoho. Gaaggaadaa’masi batinyinni umisiha woleho di aanno; manniha kayinni gane adhanno busha manchooti. Cubbo looseno ikkiro jirote aana jiro lexxate di cee’manno; batinye loosaasinenna hala’lado baatto afi’rino dureessaati.
Barrunni mitto barra togo ikkanno; shiimu Borsi giddo amadinoti 100 Culku Saantuwa hedeweelcho ba’anno. Kuni gaaggaadaamu dureessi gobba hunanni raga baala loosaasinesi gattukkinni bobbaase hashsha barra hasi’nokkiwi dino. Ikkollana ba’u yinoonniri Culku Saantuwa afantara di dandiitino.
Jeefoteno jaallasinna maatesi baala gamba asse shiimu borsi giddo corinori Culku Saantuwa ba’inositanna afi’rihu hee’riro isita ikkitinota afe aannosi gede kaajjishe huwachishanno.
Lame barrubba gedensaanni Mitte Tonnu diri qaaqqo doogote ubbeenna afidhinoha Culku Saantuwa amadino Borsa annisera massite uytanno. Annuno Culku Saantuwa 100 ikkansa buuxiti kuni woxi baattosi loosanno gaaggaadaamu dureessiha ikkinota huwati. Maatesi buximatenni shettinosi buxicho ikkirono; maatesi
qarrantino yannara hiliccirichinni kaa’late hasatto noosikkiha ikkinota afirono; ‘’Ammanama buximate giddoonnino ikkiro callicho badooshshesiitina’’ umisiha ikkinokki Culka annisira qolate ka’’anno. Xurte baino uddanosi giddo maaxinoha Culkunni wo’mino Borsa amadinonte gedeenni caaccaawate batinyinni goxanonna keere hoogino mootichisi holge e‘’anno.
Borsasi Tonnu diri qaaqqosi affe abbite uytinositanna kiiri woyteno 100 Culku Saaantuwa ikkansa buuxinota xawise uyisi. Bainosi Culka afirasinni lowo geeshsha hagiidhino dureessi Saantuwasi Mitte Mittenta kiira Hanafi woyte; buxichu manchi uurre la’’anni hedanni noohu isira kiisannosirichi daafiraati. Ikkollana agadhinokkiri xaadannosi; dureessu manchi ba’ino’’e yinohu xa angasi e’inota 100 Culku saantuwa ikkiturono manni woxi coommannosihura ‘’Ba’inori 100 Culku Saantuwa ikkitukkinni 125 ikkasenni gattinota 25 Culku Saantuwa raaqootto’’e’’ yaatenni sorote kisse kassasannosi.
Kuni buxichu manchi shilootu albaanni uurre ledote 25 Culku Saantuwa afi’rate halchi. Hajo Lamunku ragaanni
macciishshanni keeshshino yooaanchino, dureessu manchi balaxe ba’ino’’e yinota Culku Saantuwa bikka buuxe iillihu gedensaanni aantino yoo saysanno;
‘’Ati dureessu manchi baino’’e yoottohu 125 Culku Saantuwa amidino Borsa ikke hee’reenna konni buxichu manchi qaaqqo afidhinohu 100 Culku Saantuwa calla amidino Borsa ikkiro kuni Borsu ateha di ikkino yaate.
Konni daafira wole yannara 125 Culku Saaantuwa amidino Borsa afi’ri manchi atera aannohe gede ikkona. Ikkollana tini Culku Saantuwa anete yaanno manchi ikkado taje shiqisha hoogi eega wo’munni wo’ma konni buxichu manchinna qaaqqosi ammanamate atoote ikkanno gede yoote mini muro saysino’’ Yee barru hajo cufanno.
‘’Qulxu’me woshshaadannohu dhudhuufa fushshanno; manniha hasi’rannohu umisinka hooganno’’ hattono
‘’Duuwoommo yaannokkihu tufanni galanno’’
Faro faronte galaalchitannorinni ‘’duumboommo yitannokkirinni’’ agaro’ne.
Bakkalcho Woxawaajje 6 , 2013
