Allaamurchu 70 diri geeshsha hee’ra dandaanno. Ikkollana 70 diro wo’ma hagiirrunni hee’rasira albaanni ayirranno coy xaadannosi.
Umihu sagalesi woshshaadate horonsi’rannoti culunqasi bikku aleenni lophitannohura sagale baattote aaninni kayisate qarramanno.
Layinkihu miqichu gatikkinni hiiqqate dhuki noosihu afiisi eramannohuranna shokkannohura sagalesi bashshonte gede saga`la hooganno.
Sayikkihu qoolisinna bisisi aana noo baalle ayirritannosihura gordu aana buuwanni ha’ratenno dhukiweelo ikkanno.
Kuri sase ayirritanno coyibba Allamurchu dirisi goofimarchinni xaaddannosi ayirritanno qarrubbaati. Xa Allamurchu noosi doorshi lameholla. Geedhino bisisi ledo sammi yee ofolle reyosi agadha woy onte agana adhitanno shettonna qarru noosi waaga baate gatino 35 diro hagiirrunni sayisa. Umiha doodhiro dirisi bocinni reyaannohura dhaggesi hakko gawa`litanno. Layinki doorsha doodhiro kayinni aantino onte kakkalooshshubba sa’’a agartannosi.
Umihunni, luphiimu Ilaali aana fulatenni callisi mine loosi`ranno. Mine loosi’rihu gedensaanni umi loosisi afiisi qara kinchu ledo kibbatenni buqqise hunate. Konne assihu gedensaanni haaru qari fulannosi. Qarisi lopha geeshsha cince minisi giddo may sagaleno saga`likkinni keeshsha gadachosi ikkitanno. Haaru qari fulisi gedensaanni lekkasi aana noota akkalla culunqa kayise hunanno.
Haaro lekkate culunqasi lophitu gedensaanni qole kuri haaro culunqa horonsiratenni bisisi aana qa`midhinota, buuwannokki gede guficho ikkitinota, jawoo`mitinorenna geedhitino baalluwa buqqise hunanno. Basete haaru baallichi fulanno.
Konne onte agana konni garinni jawaantetenni sa’’i gedensaanni wirro umosi haaroonsenna kaajjishe Allamurchu gaamo karsamanno. Atino labbino doogonni sa`e haaro heeshshonni luphi yite buuwatto gede Allammurchu heeshshowinni rosicho adha noohe.
Baca qarrubba millo miqqo ho`litinoheha ikkara dandaanno. Ikkollana, qarrubbate giddonni fulte haaro heeshsho massaga hasiratto. Haaro heeshsho massagate qole murciraancho ikka agartannohe. Kayinni mucidhe ka’’ate wolqa hoogattora dandaatto. Baca korkaattano kiiratto. Murote yanna dixaati; additi yanna dagganno woyte murcireemmo yaattorano dandaatto. Murci’rate qole yanna diillitino yinanni coy dino. Aye woyteno ikkiro murci`nanni yanna xaati; techooti.
Heeshshokki giddo soorra hasirattohu mittu coy hee`ranno. Kayinni qara xa`mo konne coye hiissite soorratto yitannote. Konnira qole aleenni kayinsummohu Allamurchu heeshsho dancha lawishsha ikkannohe.
Atino konni albaanni kuttuwe amadinoheha busha rosicho agurte haarunni riqiwi. Loosatto, daafuratto kayinni gumu hoogahera dandaanno. Konni daafira buqqisama noosirenna geedhitino loosu hayyo harunsattoha ikkiro insa agurte haaro, shotanna busulletenni irkisamino looso harunsi. Kuni loosikki aana calla ikkikkinni heeshshokkinnino gumaamo ikkatto gede assahera dandaannohura loosu aana hosiisi. Hakka woyte heeshshokki baala soorrantanni hadhanno. Atino adda ikkinota huwatanna Allamurchu gede luphi yite buuwa hanafatto. Dancha barra!
Abbebech Maatewoos
Bakkalcho Onkoleessa 22, 2016 M.D
