Lamu Haqqe boccannori loosoho qaxarantanno. Loosu tutumma bocate; loosonsa hanaffannohuno ikko fooliishshidhannohu taalooti. Lamunku mittu layinkihunni woyyaawino garinni batinye tutumma bocatenni bocino haqqe duune ko’onninni rooranno.
Konni garinni Sase barrubba kiirantu. Shiima calla bocinohu miilisinni lowo geeshsha hinaasasinni kainohunni isinni taalo batinye xaraffa boce duunate noosi wolqa gudise horonsi’re rahe rahe bocirono jeefote angasi daafurteenna barru qeelamanno woyte bocce duuntino haqqe la’’anno woyte xaano rooramino.
Miilisinni hinaasinohu kuni bocaanchi fooliishshote gaffi assitanno woyte togo yee xa’mannosi; ‘’ Meesanenke mitto danaati, uynanninkehu tutummate danino mittoho, fooliishshi’neemmohuno taalooti. Ati bocatto haqqe batidhara dandiitinohu hiittoonniiti?’’ yaanno.
Laynki bocaanchi togo yee dawarisi……
‘’Yoottori garaho jaala’ya, baalunkuri aana atinna ani taaloho, ikkollana mimmito roorreemmohu fooliishshi’neemmo yannara callaati. Ati fooliishshonke yannara Meesanekki ka’a qolte olte ofollatto; Ani kayinni fooliishshote yanna’ya meesane’ya morodi’ranni sayseemmo.
Badooshshe kalaqinohu konne coyeeti.’’
Hanni konne lawishsha halashshine la’no……..
Badooshshu kalaqaminohu kowiichooti? Fooliishshote yannakkinni ma loosatto? Meesanekki morodi’rattonso sammi yite ofollatto? Loosikkinni woy ogimmakkinni umokki morodattonso woyi gara ikkinokki coyinni yannakki hunatto?
Qara ba’ino egennonni heeshshokki sheshsheerattonso? iibbitino meesanenni doddoltanni doogokki injeessi’ratto?
Hiikkunni ogimmate handaari giddo noottohano ikkiro loosikki suwinoha ikkanno gede duuchanka woyte meesanekki morodiri.
Bue:- Nabbamboommohunni
Qiddist Gezaheny
Bakkalcho Woxawaajje 6, 2013 M.D
