Mitu mitu manni shiimu korkaatinni hashsha ma`nate aana kawa ka`a gangalchamanni ofollanni ka“anni tegede goxikkiinni geleele galanno; mito mito woyteno ille luphi assikkinni la“anni galara dandaanno. Mito mito woyte qole goxihu gedensaanni hashshu taalira baqqi yee babbaxxitino hajonna coyibba daafira daallasisi aana haawinonte gede woy qucu`mi yee hedanna yaada hanafanno. Mannu akatinni, macciishshanno coyinni, horonsi`ranno tuqu xaadi korinni shotu garinni yaadannonna goxicho goxate qarramanno manni kiiro shota dikkitino.
Togoo akatinni qarrantinanniha ikkiro heeshsho`nenni hattono hoshsho`ne giddo yanna uyitinikkinni biddi assira hasiissanno`ne coyibba heedhanno yaate. Konne akata ajishatenna dancha goxicho goxxine surre`ne fooliishshiishate woy yaachishanno`ne coye uurrisate assa hasiisanno`ne coyinni roore assa noo`nekkire bade afa hasiissanno`ne. Leeshshi yaanno woyte 11 saatenni hanafe 12 saate geeshsha mite mite assa noo`nekki coyibba rosiisira dandiitinanni.
Ikkinohurano umihunni macciishshammete yaaddo giddora eessanno`ne manni ledo noo`ne hasaawa keere gashshiro iillitinannina ga`ara gashshidhe. Barra dode daafurino bisi woy loossanni hossino surre hashsha fooliishsho hasidhannota habbooti. Layinkihunni qole macciishshammete sarraaqamme uyitanno`ne hedonna murote harinsho ga`ara sayisse. Hakkiinnino keeraa`mino goxicho goxxe. Sayikkihu macciishshammete qarrira korkaata ikkitara dandiitannore yaachishshanno odoo, duduwo, tuqu xaadi qoolla, mannu hedubbanna labbino akatubba ga`ara gashshidhe.
Aleenni xawinsoonnita sase hedubba amande qaafatenni hashsha goxicho goxxinannikki gede assitanno`neti wolootta rosichubbano heedhuro mitto mittonkanni xinqitinanni giggishshitine keeru goxicho`ne qolsiisse.
Ikkadu goxichi macciishshamme`nera, tii“i`nera, dagoomittete xaadooshshi`nerano ikko bisu keeraanchimma`nera lowontanni qara ikkinohura techo ga`a yitinikkinninna dinye amaddinikkinni konne akata biddi assate wo`naalle. Kaaliiqi keeraawino goxicho oo`ne!
Abbebech Maatewoos
Bakkalcho Onkoleessa 1 / 2016
