Poletiku daddalira marquullu kakkalantu. Keeraano lubbonsa hooggu, mitootu kummatenni kiirranniri darantu. Mitte gaamo poletikira Itophiyu daga waaga baattanni afantanno.
HWHT Itophiya diigate mixosi jeefo gantannosi gede marquullu miqicho cancante mundeensa duntu. Kipho gobbano dagano waaga baatisiissanni no yineemmo wote korkaatunniiti. Iltino ama qansidhukkinni, otoottose mundee qoortukkinni; marqunnihu miqichu dhaabbatikkinni Affaarete qoqqowira “Qaal Kuuma” shigiggissanno gawajjo 170 qaaqquulli aana iillishi.
Qaaqquullu mundee raartanni no; qaaquullu mundee maganu xa’manni no!! qaaqquullu mudee Cancishaanchu HWHT angara no! ila noosihu baalu kuri qaaqquuulli mundee rabbisate mittimma ka’’anno yanna tenneeti. HWHT massagaano Oosonsa Awuroppahonna Ameerikaho rosiisidhanni, iibbino mini giddo gashshitanni; buxanete ooso dodo duubbunokkire,qante bowirtinokkire, sagale duubbe ittinokkire;uddidhe biiffinokkire,busha dancha badde affinokkire darate xeeunna arrishsho gatannansa dukkanu giddo gaa’litinore poletiku daddalira, biilloonyu goo’ro kassi assi’ratewe mundeensa duni. Maganu ille Affaarete du’nantu mundee HWHT anganni xa’mano.
Qaaqqokki hanqafidhe qoraho wodhootta ama yee!!! Loosuwinni higge qaaqqokki godoshshiishatto baali, tenne HWHT marquullu qaaqquulli aana iillishshu hilonna barshe kalqete leellishatto halaalu naqaasheeti. Dhagge habbannokki barshe ikkinota huwati. Kalqoomahono huwachiisha atenna ane qeechaati. Itophiyu daga yee!! Itophiya si”atanno diini daanno wote noohe mittimma xaano leellishshanni noottoti addaho. HWHT wirro muqaaqannoha laweennasi Mangiste loosidhe galtino daga gatensa loosidhara uyino kaayyo dago assidhe sircho gudate assoote harunsite leeltannona wirro muqaaqqannokki gede anga amadamme sharrama techooti.
Xa noo halaali konneeti; Affaarete qaaqquulli goofo lawishshaholla kayisoommona Cancishaanchu HWHT May kaadiraho beebbaataamma shakki assinoti dhagge di habbannote. Kalqete dagoomi kayinni macciishshe macciishshinokkiha lawe “macca’ya hashuwaho” yino. Seeda diro Tigirayete qoqqowira ilte ilante ciirte;qarransa beeqqite,kancafare gargaratenni kaa’litanni hattono hudi’rinoha damoozinsanni itissanni keeshshitino Aliye hajajo olanto barra daafurtanni hose hashsha kalaqamu goxicho goxxinowa shigiggissanno dano iillishe shakki assinoti kalqe affinote;ikkollana hedessi assite macciishshitinokkiha labbe cancishaancho HWHT hale ikkitino Ameerikinna galchimi gobbuwa saalsiissannote.
Cancishaano HWHT gaamo iillitu base baalantera qaaqquulle, seennenna geerra gamba assite shitanni noota Affaarete qoqqowi moottimma gashshaanchi Awwel Arba bero xawisino.
Cancishaano gaamo qoqqowo horritino basera qaaqquullu, seennunna geerru aana mittimmate doddolte waantanni afantanno.
Tini cancishaano gaamo Itophiya diigatenna dagase hembeelsate wo`naalsha assiturono diseekkannonsa. Bero Itophiyu olantonna Addi wolqa kaajjado cigilensa juntu aana diriirsitara Xaphoomu ministrchi borro mininni shiqqino woshshatto shiimare dagate bee’o uyitinote.
Affaarete daga Itophiyu wolambinate dikisiiseemma yite waaga baattanni afantanno; baalinke hee`noommowa gobbankera dandiinummore baala assatenni gadachanke fullammora hasiisanno.
Cancishaano HWHT kakkachimmatenni ayi kisannoe yee cenne gobbanke ayyirrinyenna keeraanchimma kisanno garinni ilamate aana gumulino horronna sircho hunate assooti kalqe tiyyidhe gibbannoho. Ikkollana maccanke hashuwaho yite Cancishaancho junta kaa’late sammi yitinori saaltanno barri muleeti
Ayyirrinyinkenna tii`inke aana daayinoha gaamote horro albi annuwanke gede saalfachishe qolate hiitte yannanni ale daga mittimmansa kaajjishshe qaafa gadacha ikkitino yanna ikkasenni kalqoomu dagoomi huwatinoha lawanno.
Xa kayinni tenne kakkacha micciirantino gaamo higgenni baqqi yitannokki gede kaajjado cigile mittimmatenni Juntu aana diriirsa doorshu nookki doogo ikkitinota huwante qooxeessa baqqeenyunni agadhine kakkalntu qaaqquulli rabba qollanni yanna tenne ikkitinota duuchunku huwano.
Kaaliiqi gobbanke towaato!
Bakkalcho Woxawaajje 6, 2013 M.D
