Tayixe Yesuusi biilinke kaote ayyaani Dotteessa 27ni hosanno. Dotteessa 27 Qeellete barra ikke gobboomu deerrinni ayirranno barraatino. Kalqete shetto qeelinohu Yesuusi kaino barrino konne barra hosasi qeelle erote ero assitanno.
Kaote ayyaani Kiristinnu amma’no rosiissanno garinni manchi beetti cubbira Masiqalu aana lubbosi sayise uyino mootichanna biilo hattono xagicho ikkino Yesuusi biilinke reyoo qeele kaote ayyaaninni kaino barra qaagate ayirrinsanni barraati. Kuni barri qeelletenna kaote ayyaanaati. Qeelle heedhannohu sharronna shetto heedhurooti.
Yesuusi mootichinkeno manchi beetto woxxate tenne kalqe qarra lae shettote masiqala duqqe loosinokki cubbinni ninke cubbaataammaho sutame kayinnilla madaarrisihunni sayikki barra Manchu kayisara dandaannokki kincho gongo’mishe kaino. Hawalle hagiidhinoommo;hawalle konne barra iillishinonke! Kaino!
Kuni barri Yesuusinna manchi beetti mereero hajajama hoogatenni kalaqamino babbadamooshshu danqara araarunni gundoonniho. Manchi beetti balaxxino hundi hunonna cubbi Mootichu Yesuusinni woxxamatenni diiganteenna haaro heeshsho,kaote qullaawi ayyaaninni hegere heeshsho uddi’rinonna gordu kaayyo afi’rino haa’ru barri safooti.
Kuni xawadu barri daara Yesuusi tunsichoho jifamino,mishamino,heminoonnisi. Ayyaana korkaata assatenni Bakkalcho gaazeexinni ledo keeshsho assinohu Itophiyu Wongeelu Roobooti amma’note mini loosu massago boorde gambisaancho, Sidaamu qoqqowi Wongeelu amma’no minna boordete gambisaanchi hattono Itophiyu Wongeelu amma’note minna mittimma Riftivaali mishiine amaalete boorde gambisaanchi Yooseefi Yotonihu “Ateneeto qolle atera he’minihero hakku kaokki barraai” yaanni xawisino. Ee;Yesuusi waamma diige kai yannara qachaho gunguntanni Yesuusiranni qolte isire isiranni he’mitino bissa noonkanni. Hatti he’ma kaote malaateeti. Gobbankerano xa giddo hee’ne meessinni kayinsanni bushiinshanni su’mi Itophiyu qeelleranna jireenyira malaateho.
Duucha dandaanno magani umosi heeshshi asse masiqalu aana sutame shetto adhino. Konninnino tunsote heedhanno dagara xawaabba ikkino.
Kao xawaabbaho;qeellete. Xi’mote tunsichinna tunso qaltino gomichi gedensaanni dayino soodimari bakkalchi yesuusaati. Baca shetto jawaatteenna hexxo murranniri bati’reenna afi’noonni hexxote caabbichi lallawi Yesuusi kaonni kuneeti kalqete keere ikki.
Shettote gedensaanni kao no. soodara kairo tunsanno. Yesuusi ka’’ara yanna iillitu woyte xi’mo tunso kalaqantino. Faasiiku hagiirreho. Faasiiku kao gobbankera xa noo ikkito ledo xaaddannote. Gobbanke baca jifo,baca gooddonna bobbaaddo sa’anni no. kuri alillichonna eelallicho kaote lallawaati.
Yannate gobbanke halaali kaote albaanni noo yanna ledo mitto lawanno. Sa`nanni hee`noommo yannano kaonkera shinqanni hee`noommota kultannote. Gobbate gede hexxonke daafira baantanni hee`noommo waagi ga`a kao duduwannonke dhukaati.
Mooticha amadate, shetisate, ganate, sutate loonsoonni sharre gobbanke cancishshanno hedubba ledo mitto lebbanno. Philaaxoosi anga`ya mundeetenni co`ittete yaasi, Berbaani tirte co`icha mooticha suttanna tini baala xaa yannara noo hedubba leellishshanno misileeti.
Yuhudi Yesuusa baxannohu gede kaphunni sunqasi, gedensaannino sajjoo diinaarenni sayise hirasi, kuni gobbatenni itte duubbe diigganno hallanyoota qaagiissannonke. Mitte soodonni Phexiroosi Yesuusa diafoommosi yaasi, Yihudaoo labbinori fulte gata ammantinoha labbe gobba finqiltinore xawisanno.
Masqalu hundanni baxxitinokkiri Yohaannisiuu gedeeri qole gobbate ammanante, halaalunninna cincatenni uurritino keeraano qaagiissannonke. Tenne baala soodannokkiha lawanno yaachishanno hashshi gedensaanni gobbate gede tunsichinke soodanni no. Sa`annokkiha lawanno dambali giddonni fulle halchonke cu`mi`nammora hiixantanni hee`noommo.
Kao konnino sae tunsichunni xawaabba, eelallichotenni gottimma, qeelamatenni qeellete widira massitanno doogooti. Gobbankenna daganke aana ikkanni noo keeru hoongi, koyeno ko`ono reyonna shetto kaote albaanni noo Kiristoosi sayisi yannaati. Sa“annokki hexxote barrira dooramate qarru giddoonni ha’ra gadachoho.
Kiristaanu gede “dirrinke” yine Hosaana iillineemmo woyte, kaiminke shetto nooha ikkirono; gawalonke kayinni kaote. Qarrubbanke agadhineemmo kaonkera wolqa ikkite qeelle abbitankera waalchunniwa iillishshinonke, goofimarchu doogo aana uurrissinonke.
Kaonke hawarro soojjaatu ragaanni fultanno. Techoo hexxonke, kaonke barri daanno woyte hatte yannara Itophiyu qarrubba guunjote gede ba`anno. Kaoseno qaalimmatenni sa`e cu`minanni halaale ikkitanno. Dancha kaote ayyaana!.
Bakkalcho Dotteessa 24, 2016 M.D
