Wo’manti Kiristinnu amma’no harunsaano hawalle tayxe Mootichu Yesuusi Kiristoosi kaote ayyaanira iillishi’ne! iillishinke!
Ayyaana laise Itophiyu Wongeelu Roobooti amma’note mini loosu massago boorde gambisaancho, Sidaamu qoqqowi Wongeelu amma’no minna boordete gambisaanchinna hattono Itophiyu Wongeelu amma’note minna mittimma Riftivaali mishiine amaalete boorde gambisaancho ikkinohu Wongeelu soqqamaanchi Yooseef Yotona ledo keeshsho assinoommo.
Bakkalcho:- Yesuusi Kiristoosi manchi beetto hursatenna cubbunni gatisate laino shettonni rosicho adha hasiissannonkeri maati?
Paaster Yooseef:- Yesuusi Kiristoosi kao hendanni woyte balanxe sutamasi qaangeemmo. Sutamasi qaangeemmo woyte manchi beetto cubbunni gatisate umosi sayse ee shetto laino. Kiristoosi hattenne yannara laino shettonni manchi beetti baattote aana hee’ranno yannara xaaddannosi shetto baala cincatenni sa’’a hasiissannota leellishanno. Tenne ikkitonna harinsho giddo Kiristinnu amma’no rosiissannonkeri bacare ikkinota le’noommo.
Shetto xaaddannositano harunsaanosira balaxe kulanni keeshshinonkanni. Konni kaiminni, “shetto/jifo/ xaaddanno’nekki gede kaajjitine huuccidhe” yaanni qixxaawanni keeshshinonkanni. “Ane ledo heedhiniro keeru bati’rannonne; kalqete heedhini geeshsha kayinni shetto xaaddanno’nena jawaatte; xaaddanno’ne shetto kayinni anenni qeelantino” yee harusaanosira jawa hexxo aannore coyi’rinonkanni.
Mootichu Yesuusi Kiristoosi hattenne yannara umosi woffi asse harunsaanosi lekkano hayishshino. Kiristoosi massagaancho ikke hee’renni harunsaanosira noosi ayirrinye leellishateeti lekkansa hayishshinohu. Massagaanchu harunsaanosi hiittoonni ayirrisanna Isi nookkiwa hiittoonni ayirrisamatenni saysa noonsata rossanno gede leellishinonsa.
Yawo macciishshantannosi massagaanchi wolootta harunsaanosi cubbunni woy hunotenni gatisate hattono hasiisannokki assooti giddo e’annokki gedenna mimmitoho hajajama hasiissannonsata rosiisanno assooteeti leellishinokehu Yesuusi biilinke.
Kaaliiqi Yesuusi Baca shetto iillitusi yannara baala dihifatinonkanni. Kaote ayyaana qaangeemmo woyte Mootichinke Kiristoosi baca qaraartanno shetto cincatenni dandiinota huwanteemmo. Jawa waaga baatisiissinosi kakkachuullira nafa maaro uyno. Gatona yee maaro aa rosiisino lawishshankeeti. Konninni, heeshshonke giddo baala baca danchummate rosicho afi’ne hee’neemmo gede assinonketa ronseemmo.
Bakkalcho:- Yesuusi Kiristoosi kaonni Keeru, baxillu, hexxo, qeellenna cinca lainohunni amma’note uurrinshuwa hiittooni harunsaanote (dagate) rosiisa noonsa yaatto?
Paaster Yoseef:- Cincate tiro seekkine huwatate cinca jiffanno ikkito giddoonni sa’’a hasiissanno. Mootichinke Yesuusi Kirisoosino shetto xaaddusi yannara cincatenni sa’’a calla ikkikkinni saysinota shettote doogga baala lawishsha asse rosiisinonke. Heeshshonke giddo xaaddannonke shetto cincatenni saysa noonketano rosiisinonke.
Konne rosicho gobbanke xaa yannara noo akati garinni la’neemmo woyte babbaxxitino qooxeessubbara keerunna hobbaatu booraambe; hattono danchuri macciishshamannokki ikkitubba kayinsanni kulleemmo. Mootichu Yesuusi Kiristoosi kayinni xaaddinosi ikkitubba lawishsha assanniiti rosiisinonkehu. Kiristinnu heeshsho rosiissannonke garinni, gobbate woy kalqete keeri geanno gede balaxe manchi beetti giddosinni keeru maccishshamasira hasiisanno. Meessaneeti keeri hee’riro maatete keeri hee’ranno; maate keeraabburo qachu keeraawanno. Qachu keeraawiro gobbate hobbaatu hee’ranno. Mittu mittunku manchi keeru macciishshamisiro baalunku keeraambeemmo.
Xaa yannara gobbanke shetissanno assootubba la’nummo bikkinni Mootichinke Yesuusi Kiristoosi saysino doogganni rosatenninna cincatenni sayinsummoro dancha hexxo heedhannonketa hendanniiti hee’ra noonkehu.
Shettotenni co’itte ikkitino kalqe dino. Konni kaiminni, hiitti shettono xaadduha ikkiro manchi beetti cincatenni sae qeellete iilla dandaannotaati rosiisa noonkehu. Kiristoosino keeru doogo leellishinonke daafira Isi rosiisinonkeha dancha rosicho calla harunsanna Isinni calla addaxxa noonke.
Bakkalcho:- Mootichu Yesuusi Kiristoosi qeelletenni ka’’ara albaanni suttinosire nafa gatona yee maaro aasinni manchi beetti maa rosa noosi?
Paaster Yooseef:- Kiristinnu heeshsho meessaneetira calla hee’nannita dikkitino; woloottu daafirano huuccinannite. Wolootta irkinsannite. Qarru giddo noore kaa’linanni heeshshooti. Mootichinke Yesuusi Kiristoosi baattote aana baca gaance kalaqantinota tirino. Gatona yaa rosiisinonke. Araarama rosiisino. Kiristoosi baxille, keere, araarsannoha ikkinota leellishinonke. Mimmito gatona yaa rosa noonke. Ninkeno sayinseemmo doogga baalantenni danchumma loosa ronsummoro gobbankeno keere ikkitanno.
Xaa yannara ku’u ko’oye xiiwa, kisa, gaance kalaqantanno doogga kalaqa, kaphunni giwanshiisha, ayirrisa hasiissanno bissa shollishate assootubba hala’lite leeltanno. Loosannoha jawaachisha hasiissanno. So’rinoha amaalle so’rosi taashshi’ranno gede assa hasiissanno ikkinnina xonanna shollisha gara dikkitino.
Assootisinni so’rinohu heeriro woyyaabbino hedo shiqinshe harinsho taashshi’ranno gede assate. Konni kaiminni, gobbankera keerunna hobbaatu hee’ranno gede annu annunku giddosinni keere ikka noosi. Kiristoosi lawishshino ninke keeru noonkere ikkineemmo gedeeti. Keeru noonkere ikkateno xaaddannonke ikkitubba cincatenni sa’’a noonke. Amma’note harunsaano Mootichu Yesuusi Kiristoosi leellishinonke lawishsha seekkine harunsa noonke.
“Halaalu, heeshshonna doogo aneeti” yiino. Doogo leellishinonke. Mootichinke Masiqalu aana sutame mundeesi duninota qaangeemmo. Madi’rinota qaangeemmo. Shettosi qaangeemmo. Doogonke baalantera Isi sinqe ikkinota huwanteemmo. Cubbo loonseemmokki gede qoropha noonke. Magano waajjanna ayirrisa noonke. “Heeshshote buddeeni aneeti” ani eemmo buddeena itannohu hegerera dihudi’ranno” yiino. Konni ayyaaninni maalasinna mundeesi lawishsha assine qamasate amuraatinnino baxillesi qaangeemmo. Amma’nonkenni kaajjineemmo gede assannonke.
Bakkalcho:- Kiristoosi kao qeelletena; qeellesi hiittoonni qaangeemmo?
Paaster Yooseef:- Qidaamete barra honse saate geeshsha quuxxotenni sayinsoonni. Lubbosi sayse uyi gedensaanniiti fooliishhso ikkinohu. Mooticha Yesuusi Kiristoosa Masiqalu aaninni dirrisse madaarate xa’mo shiqishino manchi keeraancho; Kiristoosi wodani noosiho. Yooseefi yaamamanno dureessinna Kiristoosi baxilli noosihura reeshsha uynoonnihu Manchu hattenne gobbara egennaminonna maccaha ikkino daafiraati. Wole hedo ka’annokki gede shettino daafiraati manchoho uytinohu. Madaarri yannarano agartannorira balanxe qorophishsha uyneennaati. Mannu mito woyte mitu coy sai gedensaanniiti huwatannohuna “mine’ya techo loose sayikki barra uurriseemmo” yee coyi’rinonkannina; tini yaatto kao ikkikkinni digatanno yite huluullantu. Kaosino diammanneemmo yitu. Umihunni, “kaino yite qaalesi kaajjishate hashshu taalo dagge reeshsha moorte waamma mullicho assitara dandiitannona seekkitine agarre” yinoonnisankanni. Layinkihunni, waammate ayno kisannokki gede kinchu aana Roomu mootimma sumudinni malaatinsoonninkanni. Qoleno, kincho shotu garinni kayinsannikki gede hedatenni kaysa dandiinannikki jawu kinchinniiti waamma tu’noonnihu.
Kai gedensaanni waammasi marte la’ino meentino kincho insa kayisa dandiitannokkiha ikkinota huwattinohura ayi kaysi yitanni gunguntinonkanni. Meentuno shitto buurate ikkinnina hexxo heedhunsarono kaonnire kayinni diheddinonkanni. Qoleno, kinchu aana sumudunni malaatinsoonni daafira kinsummoro Roomu mootimma seerunni xa’mitannonke yite huluullantino daafira kincho ayi kayisa ikka yitanni martu yannara waammate aaninni kinchu gongo’me kaino.
Kuni yaa Kiristoosi hakkuri mannoota jaddo loossannokki gedeno gatisinonsa. Kaosinni manchi beetti cubbo duqqatennino sae hakiichonni rosiisannoreeti assinohu. waammate aaninni kincho ayi kaysino yineenna mannu Roomu mootimmanni seerunni xa’mamannokki gede assatenna kincho duqqitanni hunkiitannokki gede umisinni kaote wolqanni kincho gongo’mishe kayse waammate giddonni fulino. Kuni yaa mannootu jaddo loosse xa’mantannokki gede agarinonsa yaate.
Meentu kincho ayi kaysanno yitanni martu yannaraati “Heeshshotenni nooha reytinori mereero mayra hasidhinanni; kainona hadhe” (Luqaas 24:5) yitanno huuro macciishshitinohu. Hakkiinni huuro macciishshite manna laweennansa wirri yite la’anno woyte soqqamaasinete. Hakkiinnino, meentu Geliila hadhe harunsaanosi Pheexiroosiuura kultanno woyte Pheexiroosi witiite mare waammate giddo hasi yannara xaanxe madaarroonnisi hocco calla afe fushshino. Kunino Kiristoosinni ammantinori shettote giddo keeshshiturono mitto barra kaonna qeelle heedhannota leellishanno. Wolu garinni xaaddino shetto baala sa’anno yannara he’mitannori batidhanno. Kiristoosi qeelletenni kainota affinokkiri reyino, qeelamino yitanni woloottu Isinkura qolte he’mitinosinkanni.
Mootichu Yesuusi Kiristoosi kao keere buuxissinote. Qeelle keereho. Qeelle amma’notenni hexxo assi’nanni harinshooti. Konnira, Kiristoosi kao qeelle ikkitinohura hiikko garinnino xaaddannonke shetto mitto barra qeelletenni sa’neemmota ikkitanno. Maganunni addaxxitannori hiittenne yannarano wolqataammaho.
Tenne uulla woy kalqe aana xaa yannara yaadisannori bacuri kalaqamanna la’neemmo. Jawa hekkonna shettono sayinsoommo yanna noonkanni. Kayinnilla, Maganunni addaxxitannori hiittenne yannarano qarrinsanni fulate wolqa afidhanno daafira qeelle afidhanni heedhanno.
Xaa yannara hexxo mursiisannori bacuri kalaqamirono albillicho kao noota hexxo assi’ra noonketa rosiisannonke. Ammanaasine xaaddannonsa shetto sa’eenna qeellete iillitannota heda noonsa. Hiitti shettonna qarrino mitto barra sa’’annota hendeemmo gede rosiisannonke harinshooti Kiristoosi kaonni ronseemmohu.
Amma’note uurrinshuwano Kiristoosi kaote ayyaana ayirrinseemmo woyte harunsaano amma’nonsanni kaajjitanno gede assanno rosichono uytanno.
Bakkalcho:- Gobbankera xaa yannara babbaxxitino amma’note uurrinshuwa mittimmatenni ikkite dagate, gobbatenna kalqete keeri daafira huuccatto assatenna dhuku noonsakkire kaa’late assooti rosamanni daynona; kuni rosichi hiikko garinni sufa noosi yaatto?
Paaster Yooseef:- Babbaxxitino amma’no harunsaano mittimmatenni ikkite gobbatenna dagate keeri daafira huuccatto assi’ra amma’nonsa lawishsha assootunni leellishshanno. Hiikkuno harunsanno amma’no widoonni Gordu mootimma e’neemmo yiteeti ammantannohu. Hiittenne amma’no harunsaanono amma’nonsa guma leellishate assitannore la’neemmo. Qarrantinore irkissanna, buxane kaa’litanna, xissantinore xa’mitanna, usurantinore xa’mitanna woloottano Qullaawu qaali giddo worroonni hajajo wonshitanna la’neemmo. Amma’no yaa Maganu wolqaati. Techo taalinokkiri ga’a taalanno yine hexxo assi’nanni harinshooti. Harunsaano amma’nonsa fajjitanno garinni assootunni leellishshannore umonsa woffi assite qeelamatenni lawishsha ikkannore leellishshanno. Konne assitanno woyte, “hudi’reenna ditissinoonnie; kalleenna diuddisiissinoonnie; goo’reenna dihayikkissinoonnie” yiino qaale wonshateeti. Hudi’rino manchira sagale hasiissanno. Kallino mancho uddisiisa; goo’riinohura kokke shaqqishi’rannore shiqisha; hoogginorira noonkehu aaninni beenke aa Qullaawu qaalinni worroonni hajajooti.
Mootichinke Yesuusi Kiristoosi rosiisanni; hudi’reenna ditissinoonnie yaa noosihu noosikkihura diuyno yaateeti. Dhuku noonsakkiri woy hoogginori Maganu su’minni xa’midhanno woyte “Maganu Oohe” yine sa’’a digaraho. Hooginohura uyniro Maganoho uynoonni gedeeti. Hoogginorira aa dandiinanni uynikkinni sa’’a digaraho. Ninkeno, jironkeno, loosinkeno Maganunnireeti. Konnira, amma’nonkenni bikkammeemmohu wolootta kaa’latenninna baxille leellishatenniiti.
Konnira ayyaana ayirrinseemmo woyte calla ikkikkinni hiittenne yannarano ikkiro hiittenne amma’no harunsaano Kaaliiqi hajajo gumulatenna lawishshasi assootunni leellishate rosichi kaajje sufa noosi. Noosihu hooginohura aa hasiissanno. Qaru giddo noori daafira huuccanna shettonsa beeqqa hasiissanno. Xissantinore ikko usurantinore xa’ma hasiissanno. Dhuku noonsakkire towaatano hattonni Maganu albaanni jawa waaga afisiissanno.
Bakkalcho:- Mannu baalunku amma’no noosiho; kayinnilla mimmitu ledo sumimme hoogino; gobbate keeri ba’’anno gedeno korkaata ikkanna la’nannina,manchi beetti hiittoonni seejjama noosi yaatto?
Paaster Yooseef:- Gobbanke baalinkete. Noonketi mitticho gobbaati. Mootichinke Kiristoosi wirro daanno geeshsha manchi beetti uullate aana keeshshannota seekke kulinonke. Amma’note qaali garinni gobbanke Gordu aanaati yineemmo. Gordu mootimma ha’neemmo geeshsha kayinni yannate geeshshira tenne kalqe aanaati hee’neemmohu. Gobbanke Gordu aanaati yinanni faarsinummorono kiisenke giddo kayinni hee’neemmo ollii teessaanchimmanke xawissanno kaarde (mattaawoqu) hee’ra gadachote.
Uullate aana hee’noommo geeshsha keerenna ga’labbo booreessannore assa dihasiissanno. Yannate geeshsha hee’neemmo uullanke (gobbanke) keeri daafira duuchanka woyte yawo adha noonke. Sambata Magansi’ne Sanyo soodo gobba hembeelannore assinanniri digaraho; hiitti amma’nono difajjitanno assooteeti. Baalunku manni keeru daafira loosa hasiissanno. Mootichinke Yesuusi Kiristoosi keerenke ikkinota rosiisinonke garinni amma’note uurrinshuwano keeru daafira rosiisa noonsa.
Keerenke buuxisiissannoti mootimma woy wole bissa assine heda dinonke; mittu mittunku manchi amma’nosinni kaajjanna keeresi umisinni buuxisiisi’ra noosi. Dagate daafira, gobbatenna wo’mante kalqe keerira gobba gashshitannori daafira Magano huucci’ra noonke. Mesaafinti maxaafi giddo Diboora coyidhanni; ‘’Gashshaano massaggino daafira; dagano fajjonsara hajajantino daafira Magano galaxxeemma” yitanno. Massagaano doogo leellishshanno; daga kayinni harunsitanno. Konnira, woyyaabbino doogo leellishshanno massagaano danchu laooshshinni irkisa hasiissanno. Kalqe wo’mante keeri daafira hajama noonke.
Bakkalcho:- Ayyaana laisse ledotenni hawalle iillishi’ne yitanno sokka saysa hasi’rattoro?
Paaster Yooseef:- Itophiyu Wongeelu Roobooti amma’no harunsaano, Sidaamu qoqqowi wongeelu amma’no minna mittimma massagaanonna harunsaanora, Kiristinnu amma’no harunsaano baalatera hawalle tayxehu Mootichinke Yesuusi Kiristoosi kaote ayyaani su’minni keerisi batira’nera halcheemmo. Mootichinke Kiristoosi kaote qeelle ayyaanira hawalle tashshi yii’ne; hawalle keeraanchimmatenna mittimmatenni iilishi’ne! yaate baxeemmo. Wo’manti Kiristinnu amma’no harunsaano ikkito gobbanke daga baalanti Mootichinke Yesuusi Kiristoosi kao qeelle ayyaani korkaatinni ayyaana ayirrinseemmo woyte qarru giddo noore towaatatenni; xissantinore xa’matenni; hoogginore kaa’latenni Mootichinke Kiristoosi lawishsha assootunni leellishshanno gede amadisiise sokka’ya sayseemmo.
Bakkalcho:- Yannakki fajjite ledonke assooto keeshshora wodaninni galanteemmo.
Paaster Yooseef:- Anino galateemmo.
Amsaalu Felleqe
Bakkalcho Dotteessa 24, 2016 M.D
