1 Jalli yaa:- Maciishshammete nervuwa (sensory nerves) gawajjamansa anfeemmohu umi malaati jalli yaatenna qimaxaxxate macciishshamme angate, qubbete, lekkatenna lekkate qubbe aana kalaqanturooti.
2 Macciishshammete nervuwa loosinsa macciishshammete sokka soyaa ikkanna gawajjo xaaddanno woyte keeshshite jalli yaate widira soorrantannoti qimaxaxxate macciishshamme macciishshantannonke. Yannantenni hasiisanno xaginaate afi’ra hoongiro tini macciishshamme wole mannimmate kifilla tuqqara dandiitanno. Xisso yannate harinshoni lexxitanni barru barrunku heeshshonke gufissanno.
3 Xisso:- Wolu nervete xisso malaati giirate macciishshammeeti. Togoo macciishshamme anganna lekkate aana kalaqantannota ikkitanna wole xissote malaatinni baxxitanno. Xisso kalaqantannohu macciishshammete nervuwa aana kalaqantino gawajjoonniiti.
4 Mikitate daafura:- Mikita milli yitanno gede assitannos okka sayissanno nervuwa aana iillitino gawajjo mikitate daafura kalaqqanno. konninni sainohunni mikitate jawaantete dandoo ho’litara dandiitanno. mikitankera sonkanni sokka garunni iilla hoogguro qaafate qarrammeemmo. angankenni uduunnicho kayisatenna cu’mine amadate didandaamannonke. nervete gawajjo korkaatinni mikita horote aana hossanno yanna ajjannow oyte umisenni daafurtanni dagganno. mikitate daafura nervete gawajjo gobbaanni Paarkinsenete dhibbi, Diske shirri yaate, Istirooke labbino xisso malaatta ikkitanno.
5 Mikitate miicamme:- Millimillote nervuwa aana iillitino gawajjo mikitate miicamanna goshooshama abbitara dandiitanno. Mikitate miicamanna goshooshama umisenni gawajjantino nervuwa aana kalaqqanno millimmonni gawajjo batissara dandiitanno. Mikitate miicama kalaqantannohu millimillote nervuwa batisse loossurooti. Miicamate macciishshamme shota, mereerimanna lowo geeshsha kaajjado ikkitara dandiitanno.
6 Hunkuu qarra:- Bisu kifilla kaa’litanno nervuwa gawajjantanno woyte ‘Autonomic Neurotapy’ yinanni xisso kalaqantara dandiitanno. Autonomike nervuwa gawajjantanno woyte hunkuu qarra kalaqqara dandiitanno. Mitu mitu manni aana luphi yino hunkii kalaqamannoha ikkanna woloottu aana kayinni hunkuu ajinoha ikkanno. Hunkuu garunni fula hoogiro mannimmanke iibbille garunni agara didandiitanno. Luphiima mannimmate guunte millimo yannara qarru bati’ranno.
7 Mule mule shumate mine ha’ra:- Shumate ufuuffa shuma garunni amaddanno gede batinye nervuwa mitteenni loosa hasiissannonsa. Nervete gawajjo kalaqantanno yannara ufuuffa shuma mule mulenni fushshate wo’naaltanno. Nervete gawajjo shumate ufuuffa mikitta gurdamanna shoshshogga garunni gumultannokki gede gufissanno. Shumate ufuuffa qarrira wolu kaimi hee’rara dandaanno. Ilino amuwinna sukkaarete dhibbi xissamaano aana kalaqamanno qarraati.
8 Kaajjado umu damuume:- Elektirike amaddinoha lawanno garinni shilli assa labbannoti harancho yannara keeshshitanno kaajjado umu damuume nervete gawajjo malaate ikkitara dandiitanno.
9 Mannimmate uurrinsha agadha hooga:- Mannimmate uurrinsha agadhate qarrama woyi gaggawa wole nervete gawajjo malaateeti.
Bue:- Dokter Taariku Dobaro Giddoyidi xisso baxxino xagisaancho
Kiddist Gezzaheny
Bakkalcho Dotteessa 10 , 2016 M.D
