Addis Ababa:- Wondo Gennetete quchumira giddo eo gamba assatenni ijaaroonni quchumu latishshi jawaachishannoha ikkinota IFDR Quchumunna Safote Latishshi Ministeritte Caaltu Saani xawissu.
Ministeritte Caaltu Saani Sidaamu qoqqowi Aliyye zoone Wondo Gennetete quchumi giddo loosantanni afantanno addi addi pirojekitubba tenne lamalara towaanyo assitino.
Dukko Caaltu towaanyo assitu yannara xawissino garinni; quchumu umisita giddo eo gamba asse jawa safote latishshuwa ijaaranni nooti lowo geeshsha jawaachishshannote. Quchumma yannaasincho assinanni loosirano jawa lawishshaati yitino.
Sidaamu Qoqqowi Quchumunna Safote Latishshi Biiro Sooreessi kalaa Ashshaagire Jembere isi widoonni; quchumaho loonsanni hee’noonni safote latishshi loossa jawaata ikkitinota kule; quchumaho hasiissanno xintu latishshi loossa hala’ladunni kaajjite suffanno gede irko assinannita xawisino.
quchumu dagata seeda yanna xintu latishahi xa’mo qolate quchumu gashshooti hiittenne yannanni aleenni kaajje loosanni afamannota coyi’rinohu kayinni Wondo Gennetete quchumi gashshooti kantiiwi Injiiner Temesgen Terrefeho.
Konneno, IFDR quchumunna safote latishshi ministere ministeritte Caaltu Saaniti assitino towaanyonni buuxa dandiitino yiino.
Towaanyo aantete loonsanni loosira gobbate gede ikko qoqqowu mootimmanni jawa illacha tunganni gede dancha kaayyo kalaqqannota ikkase xawisino.
Tayxe amandoonni 585 miliyoone xaphooma baajeette giddo 362 miliyoone ale ikkitannota kaapitaale baajeette gaamme quchumunnita giddo eo seerunni gamba assine haammata xintu latishshi loossa murci’ne loonsanni afamannita kantiiwu Injiiner Temesgeni lede buuxisino.
Gaazeexxu odoossaanchinni
Bakkalcho Dotteessa 10 / 2016 Hamuse
