Chayinu giddo mittu lowo geeshsha hayyichu Zeeni fullanke (Zen Philosophy) rosiisaanchi noonka. Mannootu isi kaa`lo afiratenna hayyo cu`mirate baca kiilomeetirubba hodhitannonka.
Mitto barra mittu rosinohu (fullahaanchu) amaale afirate rosiisaancho towaatanno. Fullahaanchuno Zeeni heeshshote fullanke daafira rosate daynota coyi`ranno.
Boode xiqqeessubba gedensaanni hasaawu hanafi. Fullahaanchu buqqeesi “baalankaricho afoommo yitannotenni” wo`mitinotanna umisi laooshshi, hedonninna egennote co`ichimmanni ammananno daafira hasaawisi yannara rosiisaanchu coyi`rannorenna rosiisannore macciishshantenninna illacha aantenni roore umisi dhaggenna fullahaanchimmasi daafira hasaawatenni rosiisaanchu coyi`rannokki gede kaayyo ho`lannosi.
Rosiisaanchuno ge`netenni mitteenni shae aggara hedo shiqishanno. Wosinchoho (fullahaanchoho) shiqishino birciqqorano shae xorshannosi. Birciqqo wo`mitu.
Ikkolla ikkinnina rosiisaanchu du`nantannano ikkiro shae xorshasi diuurrisino. Kursete aana du`nanta geeshsha shae xorshannisi noonka. Shae baattote aana saeno fullahaanchu jakkeeti aana du`nantanni noonka. Fullahaanchuno maala`latenni la“anni “agurissi! Birciqqo wo`mitinowe. La“a didandaatto” yaanno.
Rosiisaanchu muushshi yaanni “birciqqokki mullicho assi! Atino tenne birciqqo gedenni surrekke geedhitino hedubbanninna amma`nubbanni wo`mitinota ikkasenni iimaho wole haaro egennonna hedo adha uurrisootto yaatenni coyi`re birciqqo mullicho asse higanno gede seejjisi.
Ninke heeshsho giddono barru baala mittu dani dhagge kalaqantanno. Baalanka coye anfe gundoommoha lawannonke. Konni daafirano “ge`ne wodaninni macciishsha hattono wolootuwiinni rosa dihasiissannonke” yine surrenke akkalunni wonshine haaro coyibbara mullicho assa hoongoommo! rosa hasi`nummoro kayinni gaangaawinke baalu rosiisannoho.
Rosate qixxaawa ikkinummoro afate his`noommo coye dihoongeemmo; afi`nummo hedeweelcho baalantenni rosate qixxaambo, egennonkera baqqi yinoommore ikkino, lophote umonke injeessino. Gadachamme ikkikkinni hasi`nenna fajjootinkenni egennote baari giddora e`no, daaha hoongummorono e`ne shiimunni rosiisi`no. Rosu dandoo dixa`manno, woxeno dihasi`ranno, noohe yannanni boode calla hasi`ranno.
Bakkalcho Dotteessa 3, 2016 M.D
