Mitte yannara reyote sokkaasinchi mittu manchiwa daannoti… “jaala’ya techo ate barraati adhammohera dayoommo” yaannosi. Manchuno masillaawe “kayinni diqixxaawoommowe” yee dawarannosi. Reyote sokkaasinchino “hige xaate asse afeemmori dino liiste’ya aana noohu umihu ate su’maati”.
Manchuno hexxo mudhatenni “maayyexa hanni shiima geeshsha fooliishshiri intannire abbeemmohena; anino maate’yanna jaalla’ya keerunni yeenna hakkunni gedensaanni haadhe harattoena” yeenna sokkaasinchuno manchu hedonni sumuu yee ofolli. Tenne giddo manchoho mitte hedo daggusi.
Sagalete giddo goxanote xagicho wore sokkaasinchoho uyi. Sokkaasinchu tenne sagale ite gudihu gedensaanni hakkawontenni kaajjado goxano giddo uwita manchu rahotenni sokkaasinchu mulinni su’mu borreessamino liiste kayse isi su’ma umihunni hune eela masse borressi. Sokkaasinchu kaajjado ikkitino goxanonni baqqi yee ka”annoti “maayyexa jaala’ya assoottoe awuutora lowo geeshsha galateemmo danchu garinni wosinsiroottoehura techoora eelinni hanafeemmo” yii.
Aye manchino barrisinni disa”anno, ninkera yinoonniha ayeno gatisa didandaanno. Kaaliiqi borreessinohanna murino barra ayno soorre didandaanno.
Abbebech Maatewoos
Bakkalcho Dotteessa 3, 2016 M.D
