Gashshootu soorro lophonna latishsha woy baonna huno abbitanno. Soorrote hedo amandi amandi garinni seekkanno;amadooshshu bushiro soorro gufidhanno.
Gobbankera yanna yannatenni buximatenni fulate,wolaphote hasatto,miicconna kado giwatenni addi addi yannara millimillo kalaqante sa’ino. Mite dancha soorro abbitanna miteno hexxo uyitannote. Mite soorro latishshunna wolambinatu kaayyo abbitanna mereeroho kakkachuullunna uminsa hasatto roorsidhannori gufissanna la’nanni. Konninnino gobbanke baca dhagge sayissanni techora iillitino.
Tini ilamatenni ilama reekkinanna techora iillitino hexxo gobbatenna dagate hexxo sinqisidhe soorrote millimillo,bero kalaqantino soro taashshatenni gobboomitte hexxo loosunni leellishate dandiissanno haaro polotiku hedonna baqqeenyi Itophiyaho leellinkunni sayinsummo Badheessu agani 24,6ki diro kiirsiisinoho.
Daganke latatenna gobbate gede kaajjitino mittimma safo aana sufate hasatto aana safantino tini 6 diri soorrote dhagge fooliishsho albi soorrote dhagge gedenni qarrissanno jiffa giddo sa’’ate gadachantino. Gobbanna dag abaca kakkalamooshshe baattanno gede gadachitino ikkito xiiwo kalaqqinonkanni. Kayinnilla soorrote gashshooti kaajjilli dagate beeqqonni kaajje techora iillino.
Tayixe 6 diri balloota seeda dirrara keeshshitino dagate xa’mo,latishshunna wolaphote hasatto, jawaata daga jirsinni soorrote gashshooti kalaqamanno gede kaayyo kalaqqinote. Itophiyu daga hattenne yannara kalaqqino mittimma keerenna Itiophiyu lata tiyyidhannorira kayinni illensa duu’mitanno gede assinoho. Kayinnilla daga foolensa shitto afoonsa shitto assidhe soorrote gashshooti safamara qeechansa fultino. Kuni gicilsinonsari kayinni Itophiya fooliishsho hoolate giddono ikko gobbaanni heedhe dandaaminsare assitino;ikkollana Itophiyu kaajje sufino;dagaseno hattonni.
Sorrote gashshootinni gobbate daggino sooro naadanna jawaachisha hasiissanno. Bushinorenna xeinoreno naqqasa hattonni. Illetenni leellinori giddo taxi yite keeshshitino Bayiriidi Itophiyu kofatto techo caabbicho burqisate deerra iillase mitte naqaasheeti. Jajjabba pirojekitubbano gumulo afidhanni no.
Soorrote gashshooti gumi mereerinni Sidaamu daga seeda yannara umise umose gashshatenna latate diru dirunkunni xa’midhanninna kakkalantanni daggino hasatto techo dawaro afidhe wolaphitinoti dimaanxannite.
Soorrote gashshooti abbino guma la’inori galatunna irkote gaado harissanni afantanno. Ee; Soorrote gashshootinni dayino guma coommishi’nanni gufisannore effi’ra hasiissanno. Hattono guutinokkire mootimmate xawo assano bilchaatanna busultino daga horoonsidhanno soorrote hasatto hayyooti.
Sayinsummo lamalara Sidaamu qoqqowira Hawaasinna Aliyye Sidaami zoone teesaano Hawaasi quchumi mesqel Addebaabayete “Keerinkera agaraano ikkine uurrineemmo; soorro kaajjinsheemmo” yaanno adawarshinni keerunniha irkote dira harissino.
Irkote diri aana afamatenni sokka sayisinohu Sidaamu qoqqowi pirezidaantichi kalaa Desta Ledamo “ Itophiyu baalunkunnita ikkitinohu soorrote mootimmanniiti” yaatenni Sidaamu qoqqowi soorrote mootimmanni afi’rinota haammata qeelle sufisiisate wole yannanni aleenni loonsannita qummeessino.
Pirezidaantichu ledanni, “Ninke anfoommo’ne , ninke massangeemmo’ne yitannori sa’ino yanna laooshshe amande soorrote harinsho gufisate assinanni millimmo co’ontanni adhamooshshe diafidhino” yaatenni soorro borreessiissino qeelle kaajjinshe sufisiisatenni daga soorrote mootimmanna massagaanote qotira uurritinno gede buuxinsino. Ee;dayino guma la’nanni galatanna soorro sufisiisa Itophiyu hembeelameenna bushase la’’ase hexxitanno bissa irraawisanno.
Sidaamu daga taalleenyanna wolapho afidhinohu soorrote mootmmanni ikkinoti ayerano xawoho.
Wolaphiniro,keeru hee’riro,mittimmanna halamme kalaqanturo lophote doogo fanote. Mittimma booreessitannori cancu giddo uminsa horo agarsiisidhannoreeti. Ee; maammaashshu “Cancu mooraanchoho elanno” yaanno. Soorrote barrinni hanafe kalaqamino canco dancha kaayyo gede horoonsidhinori dhaggete diinnanke soorronke bidhattote gede kiidhite kalqoomu bare gattukkinni gobba hanaffino soorrote doogonni gufidhanno gede dandaaminsare assitino.
Insa gantino gano gede ikkoommero techo gobbanke diigantannonkanni. Dagate kaajjillinna mittimma kayinni techora iillishshino. Hakkawaro Ikko xaate “No More” yine halammi mittimma techono diinnankera bee’o uyite foonqe kalaqqannokki gede giddooyidi mittimmanna gutama doorshu nookki doogooti. Konnira kayinni daggino soorro irkinsanni gufisannore effi’ra hasiissanno.
Bakkalcho Dotteessa 3, 2016 M.D
