Hawalle dayitta
Fichee-Cambalaalla
Gudisse hagiirssiissanni
Sidaamuyita daga;
Fichee Sidaamu dagati
Shaafeeta buuro intanniti;
Gudumaale fulle
Qeexaala kandayti
Seennuno hattonni
Hore ga’nannoti;
Wedelluno ka”e
Faaro kaddannoti;
FICHEE….
Ise daggannanni
Heeshsho hagiirreho
Giwanshonna gimbe
Furduggi araaraho!
Ficheete ayyaani
Baalaho baraaraho
Ficheete ayyaaninni
Kaayya Xaado sidaamaho!
FICHEE…
Fichee ati
Wore afirootta,
Itiyophiyunni fulte
“UNESCO” eootta
Kalqe kalqoomaho
Dona ikkootta;
Seessenna melegge
Kalqete leellootta!
Foole su’niissi’niro
“Sidaama..Sidaama”yaatta
FICHEE….
Dagakki naaxisse
Burraaqisse xenxeqqisse
Atootisse melegisse
Atoote xawisse
Balchoomanke fiite
Atootte hee’ri misse!
FICHEE….
qaricho Fichee-Camabalaallanke
gidisse kultaati
bude balchoomanke
qolonna gonfa
uddire biifanke
lolloqa wonqo
amaxxo seesanke
buurisame shaafeeta
inte duuwanke
ninkera ayirradotewe
Fichee-cambalaallanke.
FICHEE…
fichee-cambalaallayti
dhaggese baete
ayyaanto barra la”e
iima beeddahete
ayidde tini
mami gobbarano dinoote!
sidaama calla afantaate
Fichiinay barra
qawaado
cambalaalla
qawaallanku soodo
macciishshe xaggete odoo.
FICHEE…
fichee bire
hundii daggewote
awuru awutuuttuy taraabbewote
tareessinay tewora abbinoyte
alame kalqete leellinshoyte.
gobbate donira
Unescote maarekkinoyte.
FICHEE…
SIDAAMU baalu
Ficheete ayyaanira
qacce qamattetey
timawo adaarera
“Hawalle iillinummo”yaanni
konni haaruu dirira
BURSI,WONSHINNA MALGA
biifa biifaansi yiinori
qeexaalansa balka
aane aane naqanni
BALEELUNNA LOKKA
dirame tenqe assanni
HOROOREESSUNNA HOOKKO
ille daaqqawori
DAARRA,GORCHEE, LAKKO
“daammowe”yaanni
DAARRA OTILCHUNNA CUUKKO
wala wala assitanni
illensa luulakko
CIROONE,WONDI,XEXICHUNNA DAALLE
budunni galate
afidhewokkiri taalle
bushshu qawaaxxiroe
ikkoonke’ne ille
SHAAFAAMU,WONDO GANNATENNA DOORE
mitteenni gamaba yite
HARBAGOONINNA CIRRE
HAWAASA xaadde
HAWEELINNA HULA
Cambalaallate ayyaanira
qeexaalansa wala
DAAEELU CABBENNA DARAARU
Ficheete ayyaanira
ikko’ne baraaru
YIRGAALAMENNA,BOONI BANSI
insa qeexaali
horontay dansi
“ayidde cambalaalla..”yaanni
BURRUNNA SHABBADIINO
aanaho lexxitanna
faranje baara widiino
Cambalaallate daande
danganni DAAYYE
DAAYYE manni
budunni dureeyye
Sidaamu qawaaxxaamu
budusi offollo gadiide
Taarreqeny Tsigge (hanafaancho borreessaancho)
Badheessa 2017M.D
Bakkalcho Badheessa 26, 2016 M.D
